كلام ساكت 2(يوميات زول في الحظيرة)

مقدمة : لما كنت صغير بلعب في التراب .. ماما لبستني الجزمة والشراب .. مشيت للافندي اداني كتاب .. قال لي اكتب عربي كتبت حساب.
الكلام الساكت : في يوم من الايام وانا ماشي في (حظيرة الوطن ) الواسعة سمعتا اطفال صغار لسه ما اتجاوزو سن التاسعة بينشدو في نشيد .. سمعتا ليهم واتذكرتا نشيدنا زمان -الوارد في المقدمة- .. سمعتهم بيقولو في كلام غريب وعجيب (مره واحد) ..كانوا بيقولو :
بابا وماما حبوني.. وانا حبيتم بعيوني ..حصاني كبير .. وشعرو كتير .. اخش الجامعة و(ابقــــــــــــــــــي وزيـــــر ) .. اريح ماما وبابا في السرير ..
عند سماعي لهذا النشيد تأكد تماما انو ( الرماد كال حماد )- لحدي ما قلنا بس - وتأكد كمان انو (سجم خشمنا ) زي ما بقولو النسوان ..
نحن زمان الواحد لما يسالوهو داير تبقي شنو لما تكبر يقول يا مهندس يا كابتن طيران يا طبيب يا ويا ويا الخ المهن .. وما كنا بنعرف زاتو وزير دي معناها شنو .. هسي يعني مشاكلنا كلها كملت وبس بقينا راجين الشافع الفنطوط دا يكبر ويبقي لينا وزير .. ويا ريت لو ببقي وزير عشان داير يحلحل لينا مشاكلنا , الشافع دا قال داير يبقي وزير عشان ( يريح بابا وماما في السرير ) ..
انا قايتو يادوب عرفتا ليه الناس بيستخدموا عبارة ( حظيـــــــــرة الوطــــــــــن )
خاتمــــة : اللهـــم لا تؤاخذنا بما يقول الاطفال منــا .. دا طبعا كلام ساكت .. ودمتم سالمين والي ان نلتقي في زقاق اخر من ازقة الحظيرة .

سلام د.هيثم
كلام الساكت (المتكلم) باب اعجبني جداً
شايفك بقيت زي الاستاذ عبداللطيف البوني (كان مصر انو ما يشتري عربيه عشان يركب الموصلات - من الخرطوم الي اللعوته يومياً - عشان يلقى مواضيع ويسمع ونسة الناس...)
انتا اهسه بقيت تلف في (حظير الوطن) وتشوف المواضيع
ارجو الاستمرار علي كلام الساكت (وما تسكت)

يا هيثوم .. ! ياخ الكلام البتقولو ده كان زماااااااااااااااااااااااان .
وبعدين يا هيثوم كل جيل بيجي بثقافتو ونحن كنا جيل يعتبر بدائي بالنسبة لجيل اليوم جيل التكنولوجيا وثورة المعلومات .. يعني جيل اليوم بيحس بهموم الوطن والأهل .. اصلو جيل قيااااااااااااااااادي . عشان كده همه انو يقود الوطن للأمام .. مش يمشي للأفندي !!
بعدين الأفندي الكنا بنقولوا ده منو ؟؟ مش الأستعمار ؟؟ وله انت كان عندك جدك افندي ؟؟
وبعد ما قال لينا اكتو العربي كتبنا حساب يعني ما بنفهم وله شنو ؟؟ يا هيثوم ده كلام إستعمار سااااااااكت ..
لكن إترقبتي انا ح اديك (كلام ملياااااااااااااااااااااااااااان)

مترقبين كلامك يا ايمن

انا ما عارف ايمــــون دا عندو رأي في الكلام الساكت عن اطفالنا ولا عندو رأي في الزريبة أقصد الحظيــــرة ( معليش دا خطأ مطبعي )
علي العموم اتمني يكتب لينا هو والاخ بندر عن تجاربهم داخل ( الحظيـــرة )
ودمتم ســــالمين

موضوع هيثم جد موضوع مهم ياأيمن مع وضوح مغزاه شايفك مسكت طرف الخيط بس ورحت جاريه لكن الخلاصة الحللا هيثم تنبئ عن واقع خطير
زمان داير يبقى طبيب -أو مهندس أو طيار من أجل خدمة الوطن ورفعته الآن يبقى وزير زى ماقال عشان يأكل أبوه وأمه من مال الوزارة دى دايره شرح ياأيمن معقولة بس ونحنا الآن منتظرين تورونا مشاهداتكم فى الحظيرة





ومن الحتانة سلاااااااااااااااااااااااااام

بعدين يا أيمن وإضافة لكلام عبدو
الأفندي البيدي الكتاب ده معرووووف ,هو الأستاذ.!!! ولا كلامي دة ما صح؟

يا عبدو ويا معاذ انا فاهم كلام الدكتور كويس جداً .. عشان كده علقت عليهو . يا دكتور الناس ديل بياكلو من ما جونا يعني من قبل الرابع من رمضان . هسي الجد شنو ؟؟

الأخ العزيز هيثم إشارة لمقالك الأول من المحزن والمؤسف أن يفتح الطريق (للمسعول ) ويتركوا المريض المسعف يعانى آلامه . أرخص شى هو الإنسان فى السودان ، إستقل بعض سائقى الإسعاف صوت الإنذار عبثا ليصلوا بسرعة وأصبح هنالك عدم ثقة من مستخدمى الطريق فى الإسعاف لذا إختل النظام وهى قضية أخلاق وضمير وتحضر فى هذه الظروف بكل أسف يضيع الإنسان ، حتى رجل المرور لم يحرك ساكن ؟عالميا معروف الإسعاف أولا. أما (الفنطوط) الداير يبقى وزير : الحقيقة هناك قصيدة درست فى المناهج التعليمية فى السودان سابقا تحديدا فى الصف الرابع الإبتدائى تقول : إننى طفل صغير إتخذت العلم نورا ..... ياترى ماذا اصير عندما أغدوا كبيرا .....هل ترى أغدوا طبيبا أم زعيما أم (وزيرا) ...... هل ترى أغدوا أديبا أم صحافيا شهيرا ....... ولما كان مهنة الطب فيها من المشقة والتعب والضوابط والقيود الإنسانية ركز (الشطار ) على الوزير لأن كل المهن التى ذكرت تحت إدارة (الوزير ) ثم إختصارا للوقت (والبيع نقدا) ولاداعى للإحراج طالما لدى الصلاحيات وتجاوزو لى (الإستوبات) ويفتحولى الطريق ليه مااريح ماما وبابا فى السرير؟ ( وممنوع التحدث مع السائق)( ونتمنى لك رحلة سعيدة)واللى ماعاجبوا ينزل أقرب محطة .لأن سعادة الوزير سائق قلاب الرماد الحايكبوا على ناس حماد ههههها. دار حوار مع( مسعول ) مياه الخرطوم لماذا تقطع المياه فى الخرطوم ؟ قال البحر رجع 60متر فى يوم واحد ههههههها؟؟؟؟؟ ولذا عطش الناس . طيب لمن النيل يفيض والموية كانت ماشة سااااااااكت إنت قاعد وين ؟؟؟؟ سأله المذيع وماذنب المواطن يدفع شهريا رسوم الموية ومالاقى موية ؟؟؟ رد الوزير المحتج يسلمنا العداد ؟؟؟ هههههها تخيل الرد؟ - ليه؟؟ عشان يموت المواطن بالعطش ؟؟ سأله المذيع وكيف ترجع ال60مترا التى إنحسر إليها النيل ؟؟؟؟ رد الوزير إستاجرنا جرارت من النقل النهرى لنرفع الماء ولمن وصلت جهة وزارة المالية (وحلت) فى الطين (أبت تتحرك) ودى ما مسئوليتنا مسئولية وزارة الرى ههههههههها؟؟؟؟؟؟ يدور الحوار ويقول (المسعول) نحن أرخص رسوم للمياه فى الوطن العربى بعد مصر ؟؟؟ إتصل خبير فى هذا المجال من خارج السودان ألووو ..من أين أتيت بهذه المعلومة ياسعادتو ؟؟؟ وبعد تضريبات طلع السودان أغلى بلد فى العالم فى رسوم الموية وغير متوفرة ههههههههه؟؟؟ وبعدها عرفت إنو حماد غتس فى الرماد...... ولك التحية هيثم . معليش هل الصورة التى خلفك ماخوذة من جبال البلد ؟؟؟؟

المساله يا اخوانا موش يبقى وزير والا طبيب والا حتى غفير المساله اولا واخيرا فى الضمير الوطنى كيف نربى ابنانا على الوطنيه

الكلام الساكت سكت ولا شنو يا هيثم وايمن