كلام ساكت 6 ( اربعة أعوام من التعظيم )

مقدمة:
يا كل مقاييس الرســــم في الدنيا شـــرقي غــربي
حا تلقي شعبنا بالأســــــــم اكتر بلد عاشق النبي
لو لمو ناس الدنيا يوم في ســــــاحة كلها واقفة
اتقـدمت كل الشــعوب و حكت شعورا بلا جفا
حنلقى في آخر المطاف دون اشتراك و مناصفا
هذا الوطـــن أكثر وطن بحب نبينا المصطفى
الكلام الســـاكت :
في يوم 21 ديسمبر 2005 (اي قبل اربعة اعوام ) كنا في موعد مع انطلاقة الاذاعة المباركة اذاعــــة التعظيم ( الكوثر اف ام 92) وحينها صدح كل اهــــل التصوف واهل الفـــن اسمع اذاعة الكوثرا تمدح في سيد الوري 92 متـــــره ) وقمنا وقام كل المحبين للرسول الكريم بتمتيـر الموجة الي 92 .. وبعد عامين بالتمام والكمال من ذلك التاريخ ( اي قبل عامين ) كنا في موعد اخر بالصوت والصورة المره دي مع القناة الرائــــــعة ( قناة ساهور ).. وكم سعدنا ونحن نري الشباب يلتف حول الاذاعة والقناة ..وكان الاحتفال الاول للاذاعة بمناسبة مرور عام بمثابة الاختبار الاول لمعرفة الجمهور المعجب بالتجربـــة الفريدة ..
عند الساعة السابعة من مساء اليوم 21 ديسمبر .. توافدت الجموع كبارا وصغارا .. كان كل شئ مرتب في ارض المعارض ببري .. المسرح الانيق والاضاءة الاروع والترتيب الدقيق للمكان .. ولكــــن .. جاء البرنامج هذه المره باردا كبرودة ايام الشتاء ..حيث كان التقديم يدعو للنعاس والفاصل الاعلاني للاثاثات والسيارات والبوهيات بين كل مدحة ومدحــــة يدعو للنوم .. واغرب مافي الامر غياب كل نجوم الفــن والفنانين الشباب فغاب معتز صباحي وفرفور ونادر وحسين الصادق .. ولولا احد المادحين ويدعي ( علي ) حرك الجمهور بمدحة ( ناس مي مي ) لانفض سامر الاحتفال باكرا..
خاتمـــة :
شكرا لاذاعة الكوثر ولقناة ساهــــور ولكن يبدو انه من السهولة الوصول الي القمة ولكن تبقي المحافظة علي النجاح هي المحك .. وهذا قدرنا ان يأتي علينا كل عام ونحن نشتاق الي العام الماضي ونتحسرعليه . كل عام وانتم بخير وعقبال الشمعة المية .. ودمتم سالمين

ابن عمنا العزيز د/ هيثم ... لك التحايا والود
عندي مداخلة بسيطة بالموضوع ... يبدوا ياخي الفاضل هذه القنوات خالطة الذبادي مع الطحنية .. فيما تقدم من برامج خاصة بمدح الرسول صلي الله عليه وسلم .. ودي وجهة نظر شخصية فيما يعرض من مدائح واقصد طريقة الاداء وليس مضمون المدحة ... لذا لو بدلنا مشاهدة هذه القنوات بسماع اشرطة المداحين القدماء امثال اولاد الماحي وغيره من المبدعون في هذا المجال علي اصله يبدوا لي بكون افضل .. ولا ايه رائك .... ودمت ياخي الكريم في ذكر الله دائما ومدح رسوله والاغتداء به .. ووفقك الله ...

السلام عليكم ورحمة الله
مشكور د.هيثم علي الكلام الطيب حول مدح الرسول الطيب عليه افضل الصلاة والسلام
أنا أري أن الأهم من الكلمة واللحن هو الشعور الذي يصاحب هذه المدائح,صح أن لكل إنسان نفسياته وميوله الخاص في اللحن والالات المستخدمة والكلمة الرصينة والقافية وغيرها لكن يبقي الأصل والقاسم المشترك حب المصطفي عليه الصلاة والسلام.فأكثروا من الصلاة عليه.

سلام للكل
لك الشكر اخى هيثم لفتح الموضوع من جديد.
المديح وما ادراك م المديح.....
حقو نسميها اغانى المديح
والله يا هيثم الموضوع ده جد مثير للنقاش وفبل كده اتناولناه فى المنتدى بصورة ضيقة لكن بتعكس وجهة نظر كل زول ورؤيته للمديح. او المديح المموسق.وكمان فيهو فيديو كليب. سبحان الله
انا عندى اعتراض شديد على مزج المديح بالموسيقى. وبالذات الالحان بتاعة الاغانى يا بلح المدينة.............وتقابلها يا سمسم القضارف .وكتييييييييير من ده.والبنسلين ذى ما قال الدحيش
تمشى مع الموسيقى كده تلقى نفسك بترقص زى دق الزار.
عليك الله ده مديح ده.المديح صفاء ونقاء وتأمل وجلاء
ما من زمان الناس بتمدح بالطار والنوبة الجديد شنو؟
ده باب اى زول يقوم من النوم ويمشى يقيف فى الصف( ساهور او الكوثر)مع تقدير للقائمين على امرهما.اعتبرها فوضى ومصيبة.

واقول ليك الجديد شنو فى الموضع:
شباب عطالة وناس فارغة .
و برضو بقولو عليهو تطور وتكنولوجيا.عليك الله اسمع المديح عند اولاد حاج الماحى..تشعر بنفسك انت طاير فوق السحاب وفى صفاء روحانى .وكمان لو سمعت للسمانى احمد .او عبد الله الحبر او اسماعيل محمد على ( اسمع بلح المدينة عنده).وقارنها بالحديث من مديح الزمن ده....

مديح اليومين ديل عبارة عن طريق للشهرة من باب كبير يشبه باب الغنا يعنى عشان الواحد يصل للقلوب بطريقة دينية. سريعة وساهلة وينقاد مع اللحن ويرقص وفى النهاية يقول ده مديحولو سألوك المدحة كانت شنو ما ح تقدر تجاوب لانك ما سمعت كلمة منها كنت مشغول بالترنم مع الموسيقى.
زمن الرسول ( ص) كان فى موسيقى .

مدح حسان بن ثابت النبى وكذلك كعب بن زهير " بانت سعاد فقلبى اليوم متبول.........الخ"التى البسه الرسول الكريم بردته ثناء له.
ولو ان العلماء ليهم رأى فى انواع من المديح.
شوف الجيلى الشيخ خلا الغنا و بقى يمدح با لطار.......

والعجب لمن المذيع يقول ليك (يرفع النداء لصلاة العصر الشيخ معتز صباحى) وتسمع معتز صباحى ذاتو فى اذاعة الرابعة يجلجل بالغناء.
شوف المفارقات دى كيف

*** المفارقات هي ضحك علي الدقون *** واستهزاء شديد بالمستمعين المسلمين .. والله المستعان.

لك التحية يا دكتور ،، والتحية لكل المشاركين في الموضوع ورغم انو الشباب ما خلو لينا حاجة نقولها بس انا داير الم صوتي معاهم في انو ده ما مديح البعض بيمدح صحيح بس الغالبية (بجغمسوا) ساي ،، والله انا بشوف انو المديح زاتو مفروض يكون عندوا ضوابط يعني ما تقول لي خليها بالنية طالما انك كتبت كلام وجبتو عشان الناس تمدح الرسول وتتذكر الأسوة الحسنة مفروض تمدح بكلمات وألفاظ تليق بقدر الرسول صلى الله عليه وسلم يعني ما أي زول بيكتب كلام يعتبر مادح للرسول ولنا في بيت شاعر البادية الذي مدح هارون الرشيد عبرة
والذي قال ::

أنت كالكلب في الوفاء ** وكالتيس في مواجهة الخطوب
أنت كالدلو ، لا عدمناك دلواً ** من كبار الدلا كثير الذنوب

فالشاعر شايف نفسو مدح هارون الرشيد بالكلام الغريب ده ،، الداير اقولو وده رأي شخصي انو مفروض المادح للرسول صلى الله عليه وسلم يكون قدر مسئولية المدح وإنتقاء وإختيار الألفاظ التي تليق بجلال قدره وبهاء وجهه صلى الله عليه وسلم ما دامت السموات والأرضين .

سلام للكل ..وجزاكم الله خيرا
شكرا للاخ هيثم ..واضم صوتى للاخوة المشاركين فى الموضوع.. لانو في قناة ساهور اختلط الحابل بالنابل واصبحوا ما عارفين هم بيسووا في شنو..الموسيقي وازدواجية الشخصية عند الفنانين مابين الغناء ومظهره الخاص بيهو والمديح ومظهره المختلف تماما . اما القصائد فى ذات نفسها فهى مناسبة كأناشيد للاطفال لانها تتكون من كلمتين كلمتين وقافية مفتعلة كلها اشياء لا يمكن قبولها..وعندي ملاحظات تانية الختم ال بيظهر فى نهاية كل مدحة وعليهو عبارة( محمد رسول الله) ما عارفة يقصدوا بيهو شنو.والقناة نفسها اسمها(قناة ساهور لتعظيم النبى صلى الله عليه وسلم)الرسول صلى الله عليه وسلم عظيم اصلا ومعظم دا امر من الامور المسلم بيها ونحن انما نتشرف بتعظيمه فالاجمل ان تكون (قناة ساهور قناة تتشرف بتعظيم النبى صلى الله عليه وسلم)وصل اللهم على سيدنامحمد صلاة تليق بكماله وجلاله..

التحية لكل الاخوة واثراءكم للنقاش .. ولكن اسمحوا لي ان اختلف معكم جميعا" واقول :
ما الغضاضة في ان تؤدي المدائح بالحان معروفة طالما هي جميلة ومحترمة .. وما الغضاضة في ان يرفع الاذان للصلاة معتــــز صباحي في اذاعة الكوثر وتقلب الموجة لاذاعة الرابعة تلقي معتز ذاتو بيغني ؟؟ ما الغضاضة في ذلك طالما نحن كلنا بنسمع مدائح وبرضو بنسمع اغانـــي .. ( أتامرون الناس بالبر وتنســـون انفســـكم ؟ )
ودي الدنيا كلها كده ودا ما تنافض ولكن هي ســـاعة فســــاعة .. وقصة الصحابي الجليل ويدعي حنظلة معروفة : يحكي انه خرج من بيته وصادفه في الطريق ابوبكر الصديق فقال حنظلة لابوبكر : لقد نافــق حنظلة .. فقال له ابوبكر : وما نفاقه ؟ فاجاب سيدنا حنظلة بانه يكون مع الرسول (ص) وكأنه يري الجنة بعينيه وبعد ان يرجع الي البيت ينشغل بامور الدنيا والنساء والاطفال .. فقال له ابوبكر : اذن لقد نافق ابوبكر ايضا" .. فذهبا الي الرسول (ص) واخبراه فقال لهـــم : لو انكم تظلون علي الحالة التي تكون فيها معي لصافحتـــكم الملائكة في الطرقات ولكنها ساعة فـساعة ( او ما يفيد المعني ) ..
فمن يطالب بان يكون صباحي او محمود عبد العزيز او غيرهم من الملائكة يطلب المستحيل .. اخوتي انظروا الي نصف الكوب الملئ من الكوثر وســـاهور ..
لكم التحية جميعا واختلاف الرأي لا يفسد للود قضية .. ودمتم .

الصوفية الحقيقية سمحة لكن اغلب الطرق الصوفية تغلغل فيها الشيطان فافسدها

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟



ومن الحتانة سلااااااااااااااااااام

[b]صلاه الله علي من واجبالو

سلامي يفوق علي الحصا والرمالو

***

رفعت يديا يا مولاي يسر

علي قلبي المديح اروي وفسر

وعاد القبلي منهم لا أقصر

أنت زو الملك عزو وجلالو
***
ثنيت بالما خلق اعظم عليهو

ده وين في الرسل يقربلو وشبيهو

يوسف كان جميل هو فاق عليهو

مربعه قامتو حاجبو كذا الهلالو
***
حِملت بنت وهب بي من خيارا

ادم جاها اداها البشارا

نبووه الكانو سامعين الخبارا

يهنو لي امنه بالتبعو ورضالو
***
الليله يو م وضعوهو حضرن في مكانا

ام عثمان وام عبدالرحمنا

يقولن بقي نور نبيا زمانا

لي كنعان واليمن ليلهم ضوالو
***
جاتو سعيده الدارين حليمه

ما دارتلو اجُره ولا عزيمه

تقول جيد ليه يا ابو النيه السليمه

الشياه الغا رزه صارن حا لبا لو
***
تقولو الصيده يا سيد النبوه

اليهودي سجني مالي معاهو خوه

تاركا لي اطفالا عاوزه المروه

مِحِسنه ظني فيك يا سيد بلالو
***
قعد احمد ضمين راحت عيالا

تقول لي اصغر الجديان تعالا

ارضعو بي عجل ما عندي بالا

ِضِمني انا القبلي الجمل اشتكالو
***
اصحاب الرسول حقو الفراسه

بحور العلم للدين والدراسه

ما دخلو البنادر للكواسه

بيقدلو فوق رسولهم ما بيبالو
***
بيقول ليك سراج يا سيد عكاشه

يا الحوضك سبيل يروي العطاشه

بخا ف يوم الممات يوم الفتاشه

بدور تحضرني عِن ساعه السؤالو
***
صلي الله ربي ثم سلم

بي عدد الكتاب حلل وحرم

عد وصف الجزولي والله يعلم

هديتا لي رسولنا الواجبا لو

https://www.youtube.com/watch?v=pHExiFPXp9U


حجاج سودانيون‏