كلام ساكت 3(ليس بالحب وحده يحي الانسان)

مقدمة :
ما عاد يا دنياي وقت للهوي ..
ما عاد همس الحب في وجداني
الحب : أن نجد ( الرغيف ) مع الصغار
الحب : ان نزرع الاحلام في أيدي النهار

الكلام الساكت :
في يوم من الايام وانا راجع من امدرمان للخرطوم فكرتا اقعد شوية في حدائق ( حبيبي مفلس ) .. اترددتا وقلتا بيني وبين نفسي هسي لو البواب بتاع الحديقة قال لي ممنوع دخول ( الفرد ) الا تكون ( جوز ) .. قايتو اتوكلتا ودخلتا ( حبيبي مفلس ) .. لقيت الناس (اتنين اتنين فرح يتكلم بلغتين ) .. ياربي الناس ديل بقولو في شنو ؟ طيب لو قال ليها بحبك وقالت ليهو وانا برضو .. تاني حا يقولو شنو ؟ احتمال يكونو بفكرو يحلو مشلكة الشرق الاوسط . المهم ما همانا .. وفضلت قاعد علي صخرة تحت شجرة ظليلة .. وتذكرت قول الشاعر :
ثاو علي صخر أصم وليت لي ** قلبا" كهذي الصخرة الصماء
وانا قاعد وبتأمل في الماء والخضرة والوجه الحسن .. رأيت امراءة يتجاوز عمرها الخمسين شايلة في يدها اليمين حفاظة ايسكريم ( دندرمة زي ما كنا بنسميها زمان ) وفي يدها الشمال طبق فيهو فول وكبكبي وفشار .. ويا الله يا الله قادرة تمشي .. ناديتها عشان اشتري منها.. وقلتا ليها يا حاجة انتي بعدا ما كبرتي بتشتغلي ليه ؟
قالت لي : (( يا ولدي لو ما اشتغلتا نأكل شنو ؟ أوبو البنيات كبر ووكت شبابو ما كان مقصر .. والبنيات عرسوهن .. وفضلت واحدة .. والولد عرس وساكن مع نسابتو . والعندو ما مقصر بيها مننا الا ما مكفية .. عشان كدي بشتغل وألقط .. نأكل انا والبنية وأبوها . )) .
خرجت وانا بقول في سري : يا ( حبيبي مفلـــس ) رغم ما فيك من قصص حبكانات .. فيك ماسي .
والي ان نلتقي في كلام ساكت تاني دمتم سالمين .وما بكم من نعمة فمن الله .

الموضوع جميل وهادف فى نفس الوقت ياهيثم..
سؤالى ليك انت اشتريت منها ولا لا؟
زول عنده بضاعة عارف من وين بجيبها و وين ممكن يسوقا ووين اكبر سوق ليها .هنا مربط الفرس. المرأة من خلال عمرها وتجربتها ولفها وراء لقمة العيش عارفة الداقسين( الفارغين) والبدفعوا ويشتروا منها منو؟؟ هى طبعا بهمها تلقى سوق تبيع فيه بسرعة وبسعر كويس. وعارفة السوق وين ومنو البشتروا منها؟
الباحث عن لقمة العيش طريقو سالك اكيد برحمة من الله.......

[b] كل الناس اثنين اثنين انت يادكتور حبيبك ويين

كل الناس اثنين اثنين انت يادكتور مع العيانيين

تحياتي يادكتور موضوع يعجب

يا مجدي بركة السمعنا صوتك .. لكن طلعتا ما عندك اي مشاعر انسـانية انا هسـي افتكرتك حا تقول لي : ان شاء الله تكون اشتريت منها حفاظة الاسكريم وطبق الفول والفشار كلوعشان تمشي تأكل بتها وراجلها (الما كان مقصر وكت شبابو زي ما قالت )..
انت عارف المره دي (بت عرب ومشلخة) كمان امكن تكون دي الحاجة الخلتني اشعر انها مفروض ما تشتغل رغم انو المشاعر الانسانية مفروض تكون تجاه اي زول بغض النظر عن العرق والجنس واللون . ولا مش كده