| معلومات مغلوطة | |
|
+5MARWA سراج الدين عثمان محمدين الدحيش أيمن فضل الباري نادية حسن عمر 9 مشترك |
كاتب الموضوع | رسالة |
---|
نادية حسن عمر مشرفة قسم المناسبات
عدد المساهمات : 396 تاريخ التسجيل : 20/03/2009
| موضوع: معلومات مغلوطة الأحد نوفمبر 01, 2009 3:18 pm | |
| 1/ سم العقرب قاتل : غلط ، يعتقد الكثير منا أن لدغة العقرب قاتلة والحقيقة أن أشد العقارب سمية لاتقتل الإنسان العادي ولكن قد تتسبب بموت الطفل الرضيع أو كبير السن ومريض القلب إذا لم يتم العلاج. فعند لدغة العقرب لاقدر الله إعرف بانها لاتسبب الوفاة وبالتالي لاتخف وحافظ على هدوئك واذهب لأقرب مستشفى. معظم وفيات لدغات العقارب تحدث بسبب السكتة القلبية من الخوف!!!
2/ بعد وجبة دسمة لابد من الحركة لهضم الطعام : غلط ، لأن الحركة سوف تقلل الدم الواصل لجهاز الهضم وبالتالي تتباطأ عملية الهضم . الأسد مثلا بعد تناول وجبته الدسمه يرتاح تحت ظل الشجرة وتصرفه هذا غريزي يعني هو الصح J . 3/ القطط تحب أكل الفئران: غير صحيح فالقط لا يأكل الفأر إلا مضطرا ولكنه يلاحقه من باب التسلية واللعب، يعني تضييع وقت بس،، يتبع........ | |
|
| |
أيمن فضل الباري المستشار الفني للمنتدى
عدد المساهمات : 186 تاريخ التسجيل : 16/03/2009 العمر : 44
| موضوع: رد: معلومات مغلوطة الأحد نوفمبر 01, 2009 8:58 pm | |
| شكرا .. نادية فعلاً الموضوع جميل انا لم قريت كنت جاهز للمغالطة بس اتأكدت انو معلوماتك صحيحة . لك التحية . | |
|
| |
الدحيش
عدد المساهمات : 498 تاريخ التسجيل : 08/04/2009
| موضوع: رد: معلومات مغلوطة الأحد نوفمبر 01, 2009 11:10 pm | |
| مشكورة جداً يا نادية على المعلومات الجديدة لنج .. لكن الشئ البستغرب ليهو .. منو المشى وسأل ليهو كديسة عن حكاية سك الفأر دي ..! يعني هي الكديسة القالت كده .. وللا العلماء قالوا عنها كده ...؟ تحياتي وتقديري | |
|
| |
نادية حسن عمر مشرفة قسم المناسبات
عدد المساهمات : 396 تاريخ التسجيل : 20/03/2009
| موضوع: رد: معلومات مغلوطة الثلاثاء نوفمبر 03, 2009 3:08 pm | |
| بقية : 4/ الأسد يعيش في الغابة: وللأسف حتى في المدارس يكرر هذا الكلام وبنفس الصورة. والصحيح:- الأسد يعيش في مناطق الحشائش والسهول ولا يسكن الغابات الاستوائية أبدا .
5/ كهرباء 220 فولت أكثر تكلفة من 110 فولت : الصحيح:- انه لايوجد فرق من ناحية الاستهلاك ولكن الفرق في شدة التيار المار بالسلك والتي تتسبب في سخونة واحتراق الأسلاك وهي تتناسب عكسيا مع فرق الجهد، يعني: لو في جهاز يعمل ب ( 2000 وات ) يحتاج ل 110 فولت سوف يمر بالسلك 18 أمبير أما لوكان يعمل على 220 فلن يمر بالسلك الا 9 أمبير فقط .
** بمعنى اوضح ان الأجهزة التى تعمل على 220 فولت أكثر أمانا من التى تعمل على 110 فولت . 7/ الأعشاب الطبيعية لاتضر : كثيرا ما نسمع هذه الكلمة وأحيانا من بعض الصيادلة للأسف . يقولون ان هذا الدواء مركب من اعشاب طبيعية اذا لم ينفعك فلن يضرك ، ويفوت عليه ان بعض الأعشاب سام وبعضها يسبب حساسية لبعض الناس .. ** تذكّر ان الأعشاب تحتوى على مركبات كيميائية مثلها مثل بقية الأدوية ولكنها لم تحضّر بالمصنع بل هي طبيعية . 8/الإكثار من السكريات يسبب مرض السكري : غير صحيح ، لأن مرض السكري سببه تلف خلايا بيتا في البنكرياس أو عدم فعالية الأنسولين المفرز داخل الجسم . وهذه تحدث لأسباب متعددة ليس من بينها أكل الحلويات. يتبع............ | |
|
| |
أيمن فضل الباري المستشار الفني للمنتدى
عدد المساهمات : 186 تاريخ التسجيل : 16/03/2009 العمر : 44
| موضوع: رد: معلومات مغلوطة الثلاثاء نوفمبر 03, 2009 3:21 pm | |
| والله يا نادية لك التحية مرة اخرى .. معومات غالية في الأهمية وفي إنتظار المزيد | |
|
| |
سراج الدين عثمان محمدين
عدد المساهمات : 254 تاريخ التسجيل : 21/03/2009 العمر : 58
| موضوع: رد: معلومات مغلوطة الثلاثاء نوفمبر 03, 2009 4:14 pm | |
| [b] شكرا ناديه علي المعلومات لكن حكايه الاعشاب الطبيعيه سامه لااعتقد ذلك فنحن ناكل اللالوب والنبق والحُمبُك واغنامنا تاكل العُليف والخُريم والسعده من مصادرها مباشره اي من الاشجار دون تدخلات كميائيه ولم نسمع يوما واحدا بان فلان مات متسمم او الغنمايه اكلت حاجه من الشجره واتسممت وهذه هي قدره القادر 000 والله شنو يادكاتره المنتدي | |
|
| |
أيمن فضل الباري المستشار الفني للمنتدى
عدد المساهمات : 186 تاريخ التسجيل : 16/03/2009 العمر : 44
| موضوع: رد: معلومات مغلوطة الثلاثاء نوفمبر 03, 2009 8:04 pm | |
| دحين يا سراج السيكران ده مش من الأعشاب ؟؟ وطالما انو (بيسكر) او بيفقد الوعي معناه عندو تأثير على الرأس ،، وبرضو راجين رأي الدكاترة رغم انهم ما بيحبو الأعشاب ولو لاقين طريقة يطلعوا النعناع من المعجون كان طلعوه | |
|
| |
MARWA
عدد المساهمات : 32 تاريخ التسجيل : 02/10/2009
| موضوع: رد: معلومات مغلوطة الثلاثاء نوفمبر 03, 2009 11:37 pm | |
| | |
|
| |
hytham
عدد المساهمات : 78 تاريخ التسجيل : 10/03/2009
| موضوع: رد: معلومات مغلوطة الأربعاء نوفمبر 04, 2009 4:37 am | |
| الاخت نادية موضوع مفيد .. واتفق معك ( جزئيا") في مسألة لدغة العقرب وان الوفاة في معظم الحالات تحدث نتيجة الصدمة العصبية نتيجة الألم الشديد والخوف وان السم ( في معظم الحالات ) قد لايؤثر تاثير خطير عشان كده مسألة ( التفصيد بالموس ) دي موضة قديمة ..والعلاج بيكون باعطاء بنج موضعي في مكان اللدغة لتخفيف الألم بالاضافة لترياق العقرب . اما موضوع الاعشاب فان معظم الادوية مستخلصة من النباتات وتم تجريبها علي حيوانات المعمل ومعروفة الجرعة والاثار الجانبية .. مش زي الاعشاب ( اخد ليك سفــة ) و( شيل ليك كتحة ) يعني ممكن تبلع ليك (حلبـة ) عشان توقف الاسهال بعداك تفتش للحاجة البتحلك بالسلامة من الامساك زي ما حصل لي قبل ما اتوب من الاعشاب ليوم الدين . | |
|
| |
بخيت الحاج المدير العام للمنتدى
عدد المساهمات : 201 تاريخ التسجيل : 06/03/2009
| موضوع: رد: معلومات مغلوطة الأربعاء نوفمبر 04, 2009 7:51 am | |
| العزيزة نادية
مواضيعك دائما حية ومثيرة للجدل والمداخلات الجميلة ,,,,,عملت مرور اعتقد انه كان جميل ولكن وبكل اسف عندما اردت ارساله اتمسح وربنا يقدرنى على المداخلة مرة ثانية ولا يفوتنى ان اسجل صوت شكرى وتقديرى لهذه المسماة(نادية) لانها وكما ذكرنا جمعا هى الزهرة البرية للمنتدى بل هى نوارة المنتدى لها منا جميعا الشكر الجزيل ولو اننا عاتبين عليها وعلى خالها لدخولهم الكثير لمنتدى الجعليين ولا باس من ذلك ولكن نريد 99.5%من الوقت ل (منتدى قرية الحتانة),,,,, مرور على الموضوع الاول: 1)سم العقرب انا اشاركها الراى ومن قديم الزمان احتفظ بمعلومة بان سم العقرب غير سام اى بمعنى اذا استخلصنا سم العقرب وتجرعناه عن طريق الفم شرطا ان لا يكون هنالك جرح او غيره فى الفم فان السم لايقتل بل تأثيره سوف يكون جانبيا وكذا ولكن اذا لدغت فان السم سوف يتفاعل كيميائيا مع الدم ويعمل التسمم والالآم التى يشعر بها الملدوغ ,,, وازيد معلومة صغيرة وهى كانت مغلوطة كذلك فى فهم الناس وهى (الخنفساء خادم العقرب)ولكن الصحيح هو ان العقرب هى خادم الخنفساء واترك المجال لاحد البيطريين المنضمين للمنتدى,,,,,, 2)يقول اهلنا السابقين من تغداء تمدى وهذا يوافق كلام عزيزتنا نادية وبخصوص الاسد كلام صاح ومجرب كمان وانا بنفسى كل يوم افعله و برجى(الاسد) هذا والله اهم شىء فى كل معلوماتك!!!!!!!!! 3)المعلومة الثالثة والله يانادية اول مرة اعرف انك من هواة افلام توم وجيرى,,لان المكان الوحيد الذى يمزح القط مع الفار هو شاشة التلفاز واذا (مغالطانى) يا بت ود بت محمدين ويا بت بت ود محمدين جيبى ليك (بيرجر) فى صحن وجيبى فار فى صحن تانى وجيبى الكديس وشوفى بيختار شنو بعد داك انا متأكد بعد داك الفار سوف يصيح ويبكى ويقول (احسبو لعب,,,,)
لك التحية عزيزتنا نادية ومزيدا من التواجد,,مزيدا من النشاط ومزيدا من التألق ومزيدا من المعلومات المغلوط فيها,,,,,,,,,,
ومن الحتانة سلاااااااااااااااااااااااااااااااااااااااام
| |
|
| |
نادية حسن عمر مشرفة قسم المناسبات
عدد المساهمات : 396 تاريخ التسجيل : 20/03/2009
| موضوع: رد: معلومات مغلوطة الأربعاء نوفمبر 04, 2009 2:20 pm | |
| بشكر الجميع على المداخلات والاطراء والمرور. لكن اسمحوا لى بأن اعبر قليلا فى كلمات موجزة: الموضوع قد يكون فكرة يؤخذ بعضها من مصادر مختلفة لكن لاحظوا معى الفائدة الاكبر تكون دائما فى المداخلات والاثبات او تصحيح المعلومة من قبل اعضاء المنتدى ومن ذوى الاختصاص.. وبرضو فى انعاش للذاكرة والعادات والتقاليد ومرور على مواقف الحياة اليومية.... ده كلو غير الدافع النفسى لبذل المزيد من الجهد... وذى ما قال هيثم بالنسبة للاعشاب انا برضو عندى موقف لا يمكن ان انساه وهو اكل اكثر من لالوبة واحدة.
*** جرب يا سراج واكل ليك ثلاثة اربعة لالوبات وشوف البحصل ليك بعد داك... | |
|
| |
ايناس فضل الباري
عدد المساهمات : 44 تاريخ التسجيل : 29/04/2009
| موضوع: رد: معلومات مغلوطة الخميس نوفمبر 05, 2009 12:26 pm | |
| مشكورة يا نادية على المعلومات المفيدة. وعاوزة اقول انو اي دواء سواء كان أعشاب او مواد كيميائية ضار اذا ما اتاخد بالطريقة الصحيحة،وبعدين الهواء البنستنشقه ده مامواد كيميائية والبروتينات والدهون ،معناه اي حاجة اذا اتاخدت وفق حوجة الانسان ليها ماضارة، والاعشاب البصنعوا منها الادوية مخضعة لرقابة من قبل مختصين من ساعة زراعتها لغاية مايصنعوا الدواء ويجربوه على حيوانات المعمل زي ما قال دكتور هيثم ،يعني يا نادية الصيادلة لمن يقولوا(الدواء ده اعشاب لو مانفع مابضر ) قصدهم اذا اتاخد بالتركيز الصحيح وفي الوقت المطلوب وفق وصفة طبية . ويا أيمن الدكاترة الانت بتقول عليهم ديل بيدرسوا علم النبات وكيفية استخلاص الادوية منها يعني ما بكرهوا الاعشاب (داووا كل مريض بنباتات ارضه فهي اجلب لشفائه ) ابوقراط | |
|
| |
نادية حسن عمر مشرفة قسم المناسبات
عدد المساهمات : 396 تاريخ التسجيل : 20/03/2009
| موضوع: رد: معلومات مغلوطة الخميس نوفمبر 05, 2009 3:16 pm | |
| عارفة يا ايناس كلامك ده ذكرنى بموضوع قريتو قبل كم يوم . يقولوا ليك :قاطع قاطع قاطع...... قاطع المنتجات الأمريكية لأنها بتدعم اسرائيل. قاطع المنتجات البريطانية لأنها تدعم أمريكا. قاطع المنتجات الدينامركية. قاطع المنتجات الهولندية.قاطع المنتجات الألمانية .........معظم المنتجات من الدول دى..... نجى للمشروبات ؟؟؟؟؟؟؟ خاصة البيبسى و الشوكلاتات
--ما تشرب البيبسي لأنه يحتوي على مواد تنظيف و عصارة خنزير. ما تشرب ريد بول لأنه يسبب العقم.. ما تشرب شامبيون لانو غير خالى من الكحول ما تشرب عصائر طبيعية لانو فيها مواد ملونة وما تشرب عصير غير طبيعي لأنه كله ألوان صناعية ومواد حافظة. ما تشرب عصير طبيعي لأنه يأتي على شكل عصارة مركزة (عصير الماذا مثلا). [طيب نشرب شنو نشرب عرديب و كركدى وتبلدى و ...............الخ. اما عن الاكل بنلقى الآتى:- ما تأكل لحم البقر لأنه يسبب جنون البقر. ما تأكل الجداد بعمل انفلونزا الطيور
ما تأكل خضار و لا فواكه لأنها كلها هرمونات وكيماويات. ما تأكل معلبات لأنها تحتوي على مواد حافظة.. طيب يعني ناكل شنو ؟!!! المكيفات: كيف فى نصائح برضو ليها:- ما تدخن و ما تشرب شاي و لا قهوة علي الريق. ما تأكل مباشرة بعد الاستيقاظ من النوم. اشرب ثلاث اكواب من الماء على الريق لاذابة الدهون مع ان شراب الموية على الريق برهل البطن. ما تخت الموية في الثلاجة داخل علبة بلاستك لأنها مسرطنة.. و اياك تشرب من الماسورة لانها ما صحية. ما تشرب موية من الماسورة لأنها معالجة بالكلور ولمن يذيد بغير ريحة وطعم الموية. و ما تشرب موية صحة لانها مكررة و فيها مواد مسرطنة. ما تشرب موية الزير لانو فيهو طحالب.........
ما تشرب موية بعد الأكل بتعمل غازات. طيب نشرب موية من وين يا ربى؟؟؟؟؟؟؟؟؟؟؟؟؟؟؟؟؟ بالنسبة للكلام :-يقولوا ليك ما تتكلم بالموبايل بدون سماعة اضان عشان الموجات بتأثر على خلايا المخ. و ما تتكلم عن طريق السماعة عشان الكهربا الساكنة.
ما تتكلم بالموبايل والمطرة صابة عشان بجذب الصواقع. ما تتكلم بالماسنجر لأنو بيضعف البصر. نتكلم كيف. ذى زمان نفرد مساحات للتلاقى وتبادل الحديث. فى العربية والجو سخن يقولو ليك: ما تشغل التكييف بتاع العربية اول ما تركب لأنه مسرطن. وما تخلي الهوا يجي من بره لأنو ملوث. ما تلخبط الفريون بالهواء الجاى من بره لأنو بيأثر على العصب فى الوجه. نعمل شنو؟؟؟؟؟؟؟.ببساطة تركب عربية من غير تكييف. وبرضو فى نصائح من نوع ثانى: اطلع في الشمس عشان فيتامين "د" و ما تطلع في الشمس عشان الأوزون بيعمل سرطان. واطلع فى الشمس عشان تروح البهق و تحرق الدهون.وما تطلع فى الشمس عشان ما تتلف اهداب الشبكية. طيب نطلع متين؟؟؟اكيد بالليل بس.
وده غير فتاوى التحريم الكتيرة؟؟؟؟؟؟؟؟ فتوى تحريم الكوكاكولا و فتوى تحريم "البوكيمون" و فتوى تحريم "البلايستيشن فتوى تحريم سماعة البلوتوث وفتوى تحريم الدردشة " الشات" واخرها فتوى تحريم ايسكريم الشعلة" بسبب تحريم مادة الجيلاتين. فى النهاية نعمل شنو؟؟؟؟؟؟؟؟؟ ناكل شنو ونشرب شنو ونتنفس شنو؟؟؟؟؟؟؟ | |
|
| |
الدحيش
عدد المساهمات : 498 تاريخ التسجيل : 08/04/2009
| موضوع: رد: معلومات مغلوطة الخميس نوفمبر 05, 2009 6:05 pm | |
| والله صدقتي يا نادية .. الناس عاملة زي حجا مع ولدو .. ركبوا الحمار الإثنين قالوا ما عنهدم رحمة .. ركب جحا خلى ولدو قالوا الأب قلب قاسي وما بيرحم الصغير .. ركب الولد وخلى جحا قالو الولد ما عندو أدب .. نزلو الإتنين من الحمار قالو أغبياء وما عنهدم فهم .. فده حال الدنيا والناس العايشين فيها .. كل زول عندو رأي مخالف للرأي الآخر .. لكن الإنسان يعمل بقاعدة .. إستفتي قلبك ولو أفتوك الناس لك الشكر يا نادية .. والموضوع جميل | |
|
| |
أيمن فضل الباري المستشار الفني للمنتدى
عدد المساهمات : 186 تاريخ التسجيل : 16/03/2009 العمر : 44
| موضوع: رد: معلومات مغلوطة الجمعة نوفمبر 06, 2009 12:53 pm | |
| المشكلة عندنا في الأعشاب انها ما بتدرس كتخصص يا إيناس يعني في بعض الدول التانية عندها تخصصات مثلاً بكلاريوس في الأعشاب الطبية يعني الطالب ده ح يكون فاهم الأعشاب تماماً وتفاعل كل عشية مع البني آدم والكمية المطلوبة في اللحظة المناسبة وكمان هو بيبحث ويجرب ويستنتج بس في المعامل ،، لكن هنا عندنا كل العشابين ما خدنها بأخوي واخوك بيجرب فيك أكان تعبتك بيديها لي زول تاني بكمية أقل شوية وبينسى انو كل انسان بيختلف تماماً من التاني والزول امتخصص بيسألك أول حاجة عن كل الأمراض المزمنة معاك عشان علاجو ما يتصادم مع مرض آخر ودي ما موجودة عند ناس الأعشاب وانا عندي موقف مع عشبة هي زي الصمغ اسمها (المر الحجازي ) دي رقدتني شهرين والشهر الأول ده ما فيه حركة إلا للضرورة القصوى أملو حسابكم منها شديد ،، وربنا يعافي الجميع إن شاء الله | |
|
| |
عاشق الحتانة مشرف قسم مرقنبو قرنبو
عدد المساهمات : 402 تاريخ التسجيل : 27/03/2009
| موضوع: رد: معلومات مغلوطة الجمعة نوفمبر 06, 2009 11:10 pm | |
|
و الله يا بت محمدين فاتحه ليك باب للغلاط سااااى .. كان تسميهو معلومات للغلاط .
الغريبه الوحيد الكان داير يغالطك سراج ود محمدين .. ما عارفو مالو نخّ ..
لك التحية يا بخيت و يا أبا عثمان ..
بصراحه ده كلو كلام فلسفى .. فيهو تحايل على المعلومات ..
شنو سم العقرب ما بكتل ؟ و الأسد ما بعيش فى الغابة ؟ و ما بعرف شنو .. و الكديس ما بياكل الفار ؟ زى ما قال ليك بخيت دى إلا فى توم & جيرى.
و أيمن يقول إتأكدت ؟!!
طيب سم الدابى كيف ؟
* الحركة بعد العشاء بالذات مهمة شديد .. و أسألى مجرب ما تسألى الاسد ..
* كونو بعض الأعشاب سام و بعضها يسبب الحساسية شئ طبيعى .. و لا ينفى أن بعض الاعشاب مفيد جداً ..
* حبة البركة و زيتها يقال انها تفيد فى خفض السكر فى الدم .. و تفيد فى أمراض أخرى ..
* كثير من الخضروات التى نتناولها يومياً تعتبر نباتات عشبية ..
* ولا ننسى القرفة و الترمس و الحلبة و فوائدها الكثيرة .. و لا تسألى د . هيثم .. و نصيحة ليك و لناس السكرى .. اتناول معلقة قرفة يومياً ..
* و لو داير تعالج الإمساك يا د. هيثم عليك بى لب الحنضل .. فهو أقوى مسهل ..
* أكل السكر لا يؤدى مباشرة إلى الإصابة بمرض السكر و لكن قد يكون عامل مساعد لأنه يؤدى إلى السمنة و زيادة السعرات الحرارية المخزنة فى الجسم .
** و لو جينا للكديس و الفار .. اقول ليك لا مرة لا مرتين اشوف لى كديس بياكل فار ..
بعدين للمعلومية .. الكديس بياكل راس الفار فقط و يترك باقى الجسم .. و دى حقيقة ما دايره ليها غلاط ..
*** قالوا الكديس عزم الفار لتناول وجبة العشاء و عقد صلح .. عشاء عمل يعنى .. و لأن الثقة معدومة بينهما ، أرسل الفار ولده لإستكشاف الامر .. فلما رأى الكديس ولد الفار قال له : حباب ود أب راساً حلو .. فجرى الولد إلى أبوه و قال له : و الله حتى طعم راسك متذكرو .. اخير ما تمشى.
___________________
البارح جيت لقيت الجداد حلبو
إتعشينا منو و باقى اللبن ختو
جا الفار شايل عصاتو من الكديس حجزو ( كدى واحد يغالط )
| |
|
| |
| معلومات مغلوطة | |
|