كيف اخترت شريكة حياتك ؟؟؟

احبتي واهلي واقربائي .. اعضاء هذا المنتدي الاسري الجامع ... سلمكم الله ..

الطرح ادناه قصدت من الفائدة والمتعة والمرح اللطيف .. واعني بالفائدة عندما يحكي كل عضو متزوج كيف اختار زوجته .. والمعوقات التي واجهته ( لو وجدت ) يستفيد العضو الغير متزوج من التجربة عندما ي يفكر في موضوع الاختيار ... والمتعة .. لمعرفة المواقف المحرجة واللطيفة .. قبل واثناء الاختيار وردود الافعال بين الاسرتين ... المهم ده الطرح وانتم كملوا الباقي ,,,,,,,, وحواء المنتدي لها الخياار في المشاركة بهذا الطرح .. يعني تحكي لنا كيف تم اختيارها كشريكة حياة لزوجها ,,,,,,,, صدوقني الموضوع لطيف وبرجع الواحد لذكريات جميلة وومتعة .. وبالنسبة لي اسوف احكي كيف اخترت زوجتي في طرح اخر انشاء الله فترقبوه لانه ملئ جدا جدا جدا بالمواقف المرحة واللطيفة ... ودمتم سعداء وركزو معنا ايها الاعضاء العزاب..

ان شاء الله.
ابدأ انت

شكرا علي المرور الاخت الكريمة نادية ... ولكن انا بداء في الاخر انشاء الله او علي الاقل قبل عزيزنا ومديرنا الغالي الاخ بخيت ابو محمد ... وبلاش هروب من الموضوع ,,,,,,,,,, ودمتم سعداء

ياالله عليك اخى محمد داااااااااااااااائما اطروحاتك اقتراحاتك جميلة ومفيدة
تظل السباق دائما ماشاء الله عليك طبعا وانا مارة الموضوع شدانى مع ان من المفترض يدخل
الرجال اولا ونشوف مدى ذكرياتهم ونحن نعقب عليهم بعد كدة ولا كيف ياحواء المنتدى؟؟؟
يلا في انتظارك اخ محمد..
تقبل مروري[i]

؟؟؟؟؟؟؟ ؟؟؟؟؟؟ ؟؟؟؟؟؟ ؟؟؟؟؟؟ ؟؟؟؟؟ في الانتظار ايها الاحبة .... ودمتم سعداء

انا اطلب من ام محمد تجاوب لاننى اقع فى خانة نادية حسن,, وسوف اعطيها الفرصة اولا وربما يكون عندها اشياء تحب ان تذكرها وانا ما عارفها ,,

المهم الموضوع شيق ويجذب الكثير ومشكور كثيرا الاخ محمد عبدالدائم ونتظرين يفضفض ولا يقول كما قلنا انه منتظر ام اواب

لهم ولكم اخوتى خالص التحايا

لنا عودة

ومن الحتانة سلاااااااااااااااااااااااااااااااااااااااااااااااااااااااااااااااااااااام

[b] { الجري ده ما حقي حقي المشنقه والمدفع اب سكلي } اثبتوا يا رجاله

ابداء لكم .. الصدفه وحدها هي التي حددت لي شريكه حياتي والتي ما كنت اظن

ان كانت قصص الحب والروايات التي يحكون عنها ستختار لي اجمل مما اختارت

لي الصدفه .. صديقي مدثر فضل الباري وزوجته كان لهم الدور الاكبر في

الاختيار حيث كانت زوجتي جاره لهم وصديقه لزوجه مدثر .. فلم اكن اعر فها

ولم اشاهدها الا عندما دلني صديقي وقال لي كما يقول الخطاب زمان والله عندي

ليك عروسه بت ناس ومهذبه واهلها ناس كويسيين .وتعال شوفه براك وبعدين

احكم .واصبح مدثر وزوجته كل ما ازورهم في المنزل يزكروني بتلك الفتاه حتي

شوقوني لرؤيتها ..فكان الحدث عندما رزق مدثر بابنه احمد واختار ان يدعو الجيران

والاهل والاصدقاء لمشاركته الفرحه وتناول طعام الغداء بمنزله بالحله الجديده وكانت وكنت

من من الذين وصلتهم الدعوه بطبيعه علاقه الصداقه التي تربطني به والعلاقه التي تربط

زوجتي بزوجته ..فكان اللقاء دون ان ادري انها هي ودون ان تدري انني المرشح ان اكون

لها شريكا من قبل صديقتها ...كانت تعمل بهمه ونشاط وكنت اكثر منها نشاطا والتقينا

هي تعمل في ضيافه النساء وانا اعمل في ضيافه الرجال ..وعندما انفض المعازيم وكل

زهب لحاله سألت صديقي عنها فعلمت انها الشريكه المرشحه ..وقبل ان اعرف بقيه

التفاصيل عن اسرتها واهلها قررت بين نفسي ان تكون لي شريكه ..جمعتنا صديقتها

وعرفتنا علي بعضنا وكانت البدايه والنهايه ..ومن محاسن الصدف ان شقيقاتي كانن من

المعازيم واحدهاهن قالت في قراره نفسها ياريت البنيه ده تكون من نصيب اخيها ..وفاجأتها

قبل ان تكمل مناها وقلت لها ..اريد هذه الفتاه زوجه لي فاجلسي معها واعطيني

انطباعك عنها .. فكان الرضي وتم المني واصبحت خير شريكا لي في حياتي ....

واني راضي كل الرضي عنها في مشوارها معي وهي كذلك... اثمرت الشراكه عن ربحا

ثمينا وكان عثمان - براءه - احمد ربنا يحفظهم وتسلم البطن الجابتم ..

.....ويالله مين اللبعدو.. شدو حيلكم ... وتوكلو علي الله والفيها خير ربنا يسويها

والله عافيت منك يا سراج .... وماشاء الله عليك ... واين البقية يارجالة ذي ماقال اخونا سراج .. ولا الموضوع فيه ان ,,,,,,,,,,,,,, ,,,,,, في الانتظار يا حبايبنا ... وين يا ابوريناد .. احكي ياخي

[b] عوووووووك...............افو.... البلد دي مافيها جعليين والله شنو ؟ علي الحكومات ان تطلق صراح المساجين....... حكومه يا مدام....

يلا ياعم جاك جعلى ( دبل ) لكن ياربى احكي ليكم عن الشريكة الأولى والله التانية أنا عارف الكلام ده بجنن الجنس الآخر وبعض الجماعة كمان المهم أنا حاأبدا بشريكتى الأولى والتانية فى الإرشيف ههههه الحاصل طبعا نحنا فى أنصار السنة عندنا تقاليد متعارف عليها لما تنوى الزواج بتضع شروط معينة لى شريكتك من مواصفات دينية وخلقية وسلوكيات وجماليات ــ أنا كان عندى عشرة شروط ـــ وبعد داك بتكلم الإخوان والأصدقاء يفتشوا ليك المهم سنتين أنا بفتش ماخليت حتة إلا ومشيت قصص وحكايات تعبت كتير خلاص وأنا بفتش وفى مرة من المرات أذكر زوجة صديقى العزيز السر مصطفى قالت لى زوجها إنت عارف مواصفات صاحبك ده مافى إلا فى بت جات قبل ستة شهور كورس ثانوى مع بت خالها فى مدارس عباد الرحمن جات عادية ورجعت ملتزمة كل المواصفات فيها وهى الإن فى حلفا بكرة صاحبى كلمنى قمت قلت ليه كلم خالها ويوم الخميس نسافر حلفا لأنوا السبت إجازة قام جانى راجع قال ماعندهم وسيلة مواصلات إلا قطر يوم الإثنين أناكنت فاكرها حلفا الجديدة طلعت حلفا القديمة فى الأول إترددت تانى قلت ليه ياخى بنمشى ونعتبرها رحلة سياحية حجزنا قمرة معنا نزار حسن عمر وخالها وسافرنا وشفتها وجلست مع أبوها وتم المراد بعد شهر واحد والحمد لله موفقين وسعداء للنهاية ولى منها أربعة بنات ( فاطمة ) ( أمامة ) ( لبابة ) ( خديجة ) وولدين ( عروة ) و( المنذر ) وبنت سلفت ( هاجر) الله يحفظهم و من المفارقات أنا لما كنت بفتش البت دى لا بتعرف الخرطوم ولا جات بل كانت يادوب فى إولى ثانوى قسمة بس أنا أنتظر وهى تجى كورس وزوجة صاحبى تشوفها وتختارها

مين بعدوا يلا

[b] انا متأكد من المدير العام اصلو لا بيخاف من حكومه ولا بيخاف من معا رضه اصلو راجل جعلي جد جد .. لكن صاحبنا الاسمو عاشق الحتانه بيخاف من الحكومه مووووووووووت .. وطبعا بكره حا يقول انا ما بخاف ولا حاجه .. وبرضو ما بيقول ولا حا يقدر يقول اصلو سايقنو سواقه الضأن .... ما تحدر لي بي عينك ... لو راجل قول ...

عدد المساهمات : 498 تاريخ التسجيل : 08/04/2009

التحية للجميع ..
يا أخواننا إنتم مالكم مكبرين الموضوع كده .. الموضوع ده بسيط جداً ..
تجربة الزواج هي تجربة شخصية بحتة .. وليس كل عضو ملزم أن يحكي تجربته الشخصية مع الزواج أو مع الحب أو غيرها من النجارب الشخصية .. والموضوع ليس له أي علاقة من قريب أو من بعيد بالخوف من الزوجة أو الزوج .. فالموضوع شخصي ويحتاج إلى تقدير ذاتي من العضو .. أن يكتب أو لا يكتب ..
وهذا الموضوع كأنك تسأل لك شخص عن شئ قام به للمرة الأولى .. فتقول له أذكر لنا أول يوم (سفيت) فيه الصعود .. أو أذكر لنا موقف أول سيجارة شربتها في حياتك .. أو غيرها من الأمور الشخصية ..
فمن أراد أن يكتب عن تجربته فليكتب .. ومن لم يريد فلا تضغطوا عليه .. وأنا شخصياً لن أكتب عن هذا الموضوع .. لأنه يمثل لي تجربة شخصية وذكرى خاصة جداً في حياتي ..
ولكم التحية والتقدير ..

عزيزنا العزيز الدحيش ... لك الشكر والتقدير علي هذه المداخلة الجادة علي الموضوع ... ولكن صدقتي ما في واحد مكبر الموضوع وكل المسالة مسالة حراك فقط بالمنتدي .. واطلاقا ما مطلوب من واحد وتحت اي ظرف من الظروف بان يحكي تجربته السخصية يعني التفاصيل الدقيقة قي مسالة الاختيار او المحبة او خلافه كل المسالة وحسب العنوان كيف اخترت شريكة حياتك من النحاية العامة للموضوع يعتي تم اختيارها لك او بالصدفة قابلتها يعتي وهكذا واؤيدك بنسة مليار بالمائة انوا الموضوع اختياري وحتي عندما يختار العضو المشاركة في الموضوع فمن ادبيات الموضوع عدم التطرق للاشياء الشخصية المتعلقة به ... واخو سراج من باب المزاح البري بشعلل في الموضوع ... ودمت وحفظك الله

عدد المساهمات : 31 تاريخ التسجيل : 12/11/2009

التحية لكم جميعاً
تحية خاصة لك أخي محمد عبد الدائم
تحية لك من خلال نشاطك المتواصل في هذا المنتدي
من خلال هذا الطرح
شعللتم فينا مكامن نيران قد أطفأت منذ زمن طويل ولكن من يفتح مواضيع مثل هذا الموضوع يكون قد خطر علي باله هذا السؤال أولاً كيف اخترت شريكة حياتي ويبدأ يتساءل عن الطريقة التي اختار بها شريكته ومن خلال ردود الجميع يكون قد توصل إلي عدد من أجابات سؤاله إلي نفسه ،،،،،،،
ولكن يبقي حائراً ليكمل باقي الاجابة علي هذا السؤال ،،،،،،
من المحمية سلااااااااااااااااااااااااااااااااااااام

اهو ياجماعة انبرينا ,,,,

انا الاسد النتر ,,, ان البرجو الاسد,,, انا المأمون على بنوت فرقه ,, انا البضرب فى الانكل وللزول اعيقو,,
انا السواى وما بكاى ,, انا الجهجاه وما دساى ,,,

سؤالك كان شنو يا سراج ؟؟؟ سؤالك كان شنو يا ود عبدالدائم ؟؟؟ كدى ذكرونى !!!! انا طبعا جاوبت لكم سابقا وقلت لكم كدى و كدى,, لكن منو الكان معاى فيكم فى البيت وشاف كيف العين الحمراء ؟؟؟
المهم ياجماعية وخلاصة القول انا اتفقت مع ام محمد على ان نقول:-
والله جمعنا ود وحب متبادل من اخر سبعينات ذلك القرن ولا انسى تلك الخطابات التى كانت تصلنى وانا فى احراش غابات جنوب كردفان اى المنطقة التى يتواجد فيها اخونا المذكور بالخير ( وقالوا قالوا قالوا عليه خايف)
عاشق الحتانة والاخ معاوية احمد عمر اى فى منطقة بانتيو والمجلد حيث كنت وقتها اعمل فى فترة تدريب مع شركة شفرن من قبل هئة توفير المياه فى ذلك الوقت اى نهاية السبعينات,, كنا ننام الليل ونستيقظ على صوت الاسد (برجى ذاتو) والله العظيم ياجماعة ذى ماقلت لكم نعم اسد بعظمته وبشحمه ولحمه ولكن المنطقة كانت محمية ولا خوف من ذلك ,, كانت ايام جميلة ,, كنا بعد العصر نذهب لصيد الغزلان ودجاج الوادى (جداد الوادى) كنا مفتونين بذلك الجو الجميل وبالرغم من ان الثعابين والعقالرب كانت كثيرة وشىء مخيف ولكن كنا مستمتعين بوجودنا فى مثل تلك الاماكن ذات الغابات الكثيفة ,, كنا نتمتع بقطعان النعام الجميلة واسراب الطيور
النادرة,, كنا نشاهد بين وقت وآخر قطعان ابقار الامبررو ذات القرون الهلالية الكبيرة ,, كنا نجد فضلات الافيال ,, والله يا اخوان اصريت واحضرت معى (بعرة) فيل ضخمة (عفوا), كانت مالية الكرتونة والله,
احضرتها معى الى الخرطوم ومعها بذور بامية وهى كمان تصلح لموسوعة (جنس) ذات الارقام القياسية,
طبعا البامية فى تلك المناطق تقوم وتنمو وتكبر لحالها اى (بروس ) بلغة اهلنا الزراعية وتعنى قيام النبات دون رعاية او زراعة الانسان, كانت سيقان البامية اى والله سقان البامية اطول من قامة اطول زول معنا فى المنتدى ,, والساق بسمك الاصبع الكبير ,, نجى لبذرة الباامية والله بقياس حبة( النبقة) وانا احضرت معى كمية من البذور ليس للزراعة ولكن( للفرجة) وارجو من الاخوان عاشق الحتانة ومعاوية يحضروا لى معهم قليل من بذور البامية وعاذرهم من الفيل وبعر الفيل لانه يوجد فى الوقت الحالى الا فى حديقة الدندر او اغنية النور الجيلانى ,,
اخوتى انا جاييكم للموضوع الاساسى لكن (فاصل ونواصل)

الفاصل انتهي عزيزنا الغالي بخيت ومنتظرين المواصلة لهذا السرد الجميل والممتع وماشاء الله عليك الذاكرة جيدة جدا .. ولا ممتاذة ... خلينا نشوف الجائ .. ودمت ..

[b]قلت لي يا خال مشيت غرب السودان عشان تجيب بعر الفيل وبزور الباميه ...ياريت لو كنت عارفك كنت قلت ليك جيب لي معاك صوف قرد عشان نخوفك بيهو ونقول ليك و خخخخخخخ ...كيف اخترت شريك حياتك يابتاع الامبرررو؟

والله ياسراج إنت مصيبه كبيرة ليس جنك ده ماخليتو إحنا قلنا الزول

ده خلاص بعد إتزوج وبقت عنده حكومه أصبح زول تاني

لكن ماشاء الله لحدي الأن محافظ على روحك الحلوه والطيبه.

وتحياتي لزوجتك وبنقول ليها الله معاك

والله سراج ياهو زادتو وكمان زاد جن زيادة ..... بس انا ما عارف داير بصوف القرد شنو ؟ والله ياسراج

أنت تحفة وحيرتنا معاك ..... تحياتي

[b] الله يحفظك ويرعاك اختنا داليا ... عليك الله المدير العام بي حالو هارش من الحكومه برغم تعبيراتو العنتريه { انا الاسد النتر .. كنا نصحي علي صوت الاسد ..انا الشافو خلو ..انا ابوك يامحمد ...انا...انا... انا.. } انت الفيك اتعرفت هااااااااااااااااااااااااارش من الحكومه .يا معارضه ..

[b] اخونا ابراهيم ابو ريناد ... ..انت ياخوي لابد وين ... المدير بي سببو الحكومه باقيا ليهو شوكه حوت انت سببك شنو.. الحكومه سافرت السودان ..تاني خايف من شنو؟ يالله انطلق ... ... الساحه خلا ساكت ... اوعوه تكون برضو انت الاسد النتر الحامي المدير النوم...ههههههي..

عدد المساهمات : 11 تاريخ التسجيل : 03/04/2009

الأخوان سراج ومحمد عبدالدائم لعلكم طيبون
أنا حا أرد عليكم زي ما قال أبو محمد البداية كانت من ذلك الوقت و إنتو تعرفو إنو المنطقة ديك بتاعت كجور و سحر فصاحبكم خلى الشغل و بقى من فقير لفقير لحدي ما لقى ليهو واحد كاارب فربطني ربطة شديدة فكنت الفريسة بين أنياب الأسد ومنذ ذلك التاريخ وأنا أحوال التخلص من قبضة الأسد لكن باين الفكي كارب جدا جدا فهل من مغيث يا أبناء عمومتي أهل الحتانه وأنا قررت الأستعانه بعاشق الحتانة و معاوية أحمد عمر رايكم شنو ؟؟؟؟؟
مع أمنياتي لعزاب المنتدى بدخول القفص حتى ولو بنفس الشرك وللمتزوجين الإبتعاد عن طريق عبدو المسلمابي
ومن الحتانه ألف تحييية

انا بحل ليك المشكلة دى لكن عندى طلبات بسيطة لازم تنفذ وزمان بيقولوا السحر بيضربوه بالسحر انا عاوزك تجيبى لى الاتى :
1/ جيبى لى سحلية برازيلية .
2/ فار استرالى
3/ قرد تايوانى (احذرى من القرد الاصلى )
4/ جنا تمساح من توتى .

ولازم بعد الحاجات دى كلها تقومى الصباح بدرى وتجيبى موية وتكتبى اسم بخيت وتشربيه غلى اللريق ولمدة 10 ايام بعداك الامور بتمشى تمام ...ولناعودة .

يا جبان عايز تفكها عشان بت اعمك ؟؟؟( قال سحلية قال ) كمان برازيلية انت عايز تفك سحر ولا عايز حارس مرمى(بدل اكرم)

اهو الجماعة ظهرووووووا امسك واجد يا سراج وما تخلوه يفلت بجلده وطبعا هو من امثال اخونا داك ( العاشق) ما يسمعنى ويقول كمان انا معاكم والله انا معاهو حتى اكان خواف ( الخواف ربى غياله)
امسكوا فى ود عطالمنان,,, قال عامل فيها فقير وبفكها كمان,, حسن دى مايلعب خارج الميدان ويقول بنتظر التصفيات لازم يا سراج تصوبوا بين العارضتين ويجب ان تقعدوا عشان يقول كيف ناس الرويان جايبنلو الجنان,,(قال سحلية قال) هو متكل على اخوالو الفكى مكى والفكى الباقر لهم الرحمة ولكن ما عندو شىء

وسلامتكم