يا ناس الحتانة وين المويه ووين الكهرباء

عايزين زول يدينا معلومات واخر التطورات بالنسبة للموية وللكهرباء....
وينك يا سراج ادينا الاخبار ....

أبو ريناد كتب:

يسئلؤنك يا أبو عثمان عن الماء والكهرباء قل إنها آتية لاريب فيها
بشر أم محمد الموية جات والصريج بلغ عاليها وكمان عن الكهرباء اديها الاخبار وبسرعة عجل ليها
وكمان طمن نادية نفس الكلام قوليها نشوف نخلاتنا رون من ماء رب العباد حاميها
والكهرباء منورة جوة البيوت وبرة كمان يجيك ضاويها

[size=18]الله عليك ياابن خالتي كلامك درر
بقيت شاعر من ورانا ولاشنو؟؟ size]

هذا من بعض ما لديكم يا إبن الخالة وجودكم بالمنتدي ادانا إحساس كل شئ جميل قبل كدة طلبت منك تسجيل عنوانك بدفتر العناوين علي المنتدي العام ارجوا للتواصل سجل ولك مني الف تحية لك واسرتك الكريمة وكل عام وانتم بخير .....

[b] غنن يا بنات العديله لي خلاص المويه جات العديله لي

شكرا ام محمد علي السؤال وشكرا ناديه ..ابراهيم ..خالد
والله من المؤسف حقا والمؤلم جدا ان اعضاء المكتب التنفيذي لجمعيه ابناء الحتانه الخيريه لا تمد المنتدي بالاخبار المهمه مع العلم ان الاغلبيه منهم اعضاء بهذا المنتدي .بل ومشرفين علي بعض اقسامه وقد ناشدتهم من قبل الاخت ناديه حسن لكي يتواصلوا مع بقيه الاعضاء.في منتدي الحتانه ولكن لاحياه لمن ينادي .ياسر سليمان .الصادق ابو منهل ..ناجي حسن .. مع علمي التام بانهم يتصفحون يوميا في المنتدي ..ولايريدون المشاركه ..وانا اقرب اليهم من الجميع ليس لهم ما يمنعهم يا اخوانا عيب والله ان لم تهتم اعضاء الجمعيه الخيريه لابناء الحتانه بتطوير منتداكم فمن يهتم اذا؟ ام ان المنتدي وتطويره ليس من اولوياتكم ..؟ هذا المنتدي سادتي الاجلاء ..هو منارتكم ..وعينٌ لمشاريعكم ...
وتواصل بينكم وبين الاخوه المغتربين ..تلقفو ا منه المبادرات ...اعرضو فيه ما توصلتم اليه ..وما انتم فاعلون .. وحسسونا باننا معكم .وانتم معنا .اجعلو لكم ناطق رسمي يتحدث باسمكم وباب الشوره ابدا ما خرب ..

وبما انني لست عضوا في الجمعيه ولست ناطقا باسمهم ولكنني واحدا من ابناء الحتانه اقول وعلي حسب علمي ومتابعتي مع الاهل في البلد.. انتهي تركيب الصهريج التي تبلغ سعته خمسه الف جالون ولم يتبقي غير تركيب البابور والطرمبه الرافعه ..و قد علمت من اللجنه بان المهندس المختص بهذا العمل سيسافر اليوم او غدا لتكمله ما تبقي من عمل .وقد وعدهم بان القيام بهذا العمل سيتم قبل العيد ان شاء الله
وعلمت ايضا بان اللجنه جهزت احتياجات التوصيل الداخلي من مواسير وبلوفه وخراطييش وخلافه ..وانشاء الله الحتانه رويانه قبل العيد...
اما موضوع الكهرباء ..فالواضح لن يكتمل قبل عيد الاضحي المبارك .والسبب هنالك تقارير ترفع من قبل المهندسين الذين اشرفو علي عمليه شد وتوصيل السلوك للهيئه القوميه للكهرباء بالدامر وهي بدورها ترفع التقارير للهيئه القوميه للكهرباء بالخرطوم ..وذلك طلبا للتصديق علي تقارير المهندسين بالشروع في عمليه توصيل التيار الكهربائي والشاشات للمناطق ..وعلي ضوء التصديق يشرع المهندسين في التوصيل ....وحلك ..
فولله اني اقسمت ان لم اري الحتانه دخلتها الكهرباء لن اصوت في الانتخابات القادمه ولا البعدها ..فمن يريد صوتنا عليه ان يشعر بمعاناتنا ..وكل زول يلعب صالح ورقوا..وشكرالكم

الاخوة الاعزاء...ابناء قريتى..
تحية طيبة.....
.الخال سراج مشكور كتير على تواصل الامل....
كلنا شغالين وعندنا من المشاغل والمشاكل وضيق الوقت ما تعجز عنه ال 24 ساعة حقت اليوم الواحد.
وصعب جدا جدا جدا انك تكون عارف ان فى بعض التطورات الحتخلى الحتانة عروس ليلة زفافها ترقص بين القرى والحلال البعيدة والمجاورة ونحنا نفتش فى ناس اللجنة التنفيذية عشان يدونا بعض الاخبار .
ليه ؟؟؟ ليه؟؟؟ ما يكون فى حديث يومى عبارة عن سطرين يشرح التطورات يوما بعد يوم ويشرح المعانه فى رفع العنت والتعب من الضهور الانتنت من شيل الموية وجر الدلو بالحبل..و المرسال والفتيش على الجاز عشان بس ننور لمبة تضوى لينا ظلمة الليل الهجيع.

نحنا ما دايرين نعرف اسرار اى لجنة لا خدمية ولا تنفيذية..

بس دايرين نكون مع الحدث قلبا وقالبا خطوة خطوة...كتير علينا تدونا الاخبار...

صعب جدا نلاقى اعضاء اللجان والاصعب نحنا ذاتنا ماعارفينهم كلهم.واكثر وقت وانسب مكان نعرف منه الاخبار ونتاابعها هو نافذة المنتدى...
فما تبخلوا علينا بمتابعة الاخبار دى ... ودى ما اى اخبار الواحد يغض الطرف عنها وتمر فى حياتو ساكت ذى اى موضوع يقراه فى جريدة.....

سلام وتحايا شباب الحتانة..
وتهانينا الحارة بإستكمال الصهريج..ومزيد من التنمية ..
ربما الموضوع فيه جزء يخص الحتانة وجمعيتها..انا فقط
إستوقفتني عبارة مهمة وعجبتني جدا كتبها أخونا العزيز سراج حين قال:

(فولله اني اقسمت ان لم اري الحتانه دخلتها الكهرباء لن اصوت في الانتخابات القادمه ولا البعدها ..فمن يريد صوتنا عليه ان يشعر بمعاناتنا ..وكل زول يلعب صالح ورقوا..وشكرالكم).
نعم اتفق معك تماماً في هذه الفكرة يا سراج..
كل القرى الواقعة في محلية جنوب الدامر، ساهمت كثيراً في دعم حزب المؤتمر الوطني "حزب الحكومة"، خاصة وانها الدائرة التي منحت أصواتها بدون تردد للسيد قطبي المهدي.في الإنتخابات الفاتت.
وقطبي عضو هام جداً في حزب الحكومة. وهكذا نجد أن ما قدمته هذه القرى للمؤتمر الوطني كثير جداً.وبالتالي إن الحكومة تجاهلت هذه المناطق، فعلى أهلها وبدون اي تردد أن يساوموا، نعم مساومة رسمية
مع من يريد أصواتهم. المهم ما يدوا اصواتهم إلا بمقابل إكمال الشبكة القومية للكهرباء وبقية الخدمات. وكنت قد قلت هذا الكلام من قبل لأخواننا في الكتواب ولا زلت أكرر فيه.نعم المؤتمر الوطني هو الوحيد الذي في يده كل شيء.وهو خاتي عينو على أصوات تلك القرى..فعليهم بإكمال مشاريع تنمية تلك القرى.
فحقيقي محلية ريفي الدامر هي قرى يمكن تصنيفها بأنها قرى "مقفولة" لمن يدفع لهم بالتنمية. وصبرت كثيراً على تردي الأوضاع الحياتية فيها.
فاتمنى ان يأخذ الناس بهذا الرأي. الذي لا أرى فيه عيباً. الداير أصوات الناس عليه أن يدفع لهم ما يعينهم على الحياة في تلك القرى.
وبكل بساطة رفع شعار "فمن يريد صوتنا عليه ان يشعر بمعاناتنا ويشرع في حلها". وكلما تجمعت هذه القرى على هذا الراي كلما كانت الكلمة أكثر قوة.
وزي ما قلتا إنتا كل زول يلعب لي صالح ورقو..
تحية خاصة لك يا سراج..وإن شاء الله قريب نشوف رمال الحتانة واقع عليها ضو الشبكة القومية

الف تحية لكم جميعاً..وبالتوفيق لجمعية الحتانة..

شكرا أخي عبد العزيز علي هذا الاحساس الذي يشبه فنَك وشخصك الكريم ما قاله سراج أنا وأنت نؤيده بكل قوي واتمني ان يحزو الاخوة حذو الاخ سراج حتي ولو لم يؤثر هذا الصوت يكفي إنه أضعف الايمان وانا شخصيا لم أعطي لمؤتمر أو غيره لان ما عندنا سلب فكيف نرجو من سلب حقنا أن يساعدنا في أدني حقوقنا الشرعية .... لا اريد أطول عليك بس لازم نتواصل لاني عندي برنامج ضد المؤتمر

ياجماعة الخير خلونا من السياسة ( السياسة بتفرق ولا بتجمع ) ونحاول نبني بلدنا بسواعدنا نحن اهل المنطقة وكلن حسب مقدرته وعلاقته الشخصية حتي ولو كانت من الحكام ؟؟؟ بس ما ننتظر من غيرنا شي والا بكون عشم ابليس في الجنة ,, علينا بتوظيف مقدراتنا المتوفرة ووضع الاوليات للمنطقة والشروع في تنفيذها بالقدر المتاح ولا نستعجل وكل بداية لها نهاية ونتمني بان نوفق جميعا بتنمية منطقتنا وبكل الطرق المشروعة ودمتم في غيرة ومحبة للحتانة والسلام عليكم ورحمة الله وبركاته ,,,

بما انها سيرة واتفتحت زي ما بقولو .. فمن حقنا أن نسأل من هم اعضاء اللجنة التنفيذية لجمعية الحتانة ومن الذي اختارهم وهل اتوا بالتعيين أم بالانتخاب . وشنو ما دايرينهم يورونو اجتماعاتهم وخططهم المستقبيلة يا الدحيش ؟ دي جمعية ولا منطقة عسكرية ممنوع الاقتراب والتصوير . اتمني الا يفهم كلامي تطاولا علي اعضاء الجمعية الذين احترمهم رغم اني لا اعرف من هم ولكن من حقنا أن نختار من يتحدث باسمنا .. أو نرجع للاجماع السكوتي .. واختلاف الرأي لا يفسد للود قضية .