كلام ساكت5(لو كل زول شال مقشاشة كان الخرطوم نضفت)

مقدمة :
يحكي ان الامام الشهيد حسن البنا دخل احد مساجد صعيد مصر في اول ايام رمضان ووجد المصلين متشاكلين في عدد ركعات صلاة التراويح .. ناس يقولو نصلي عشرة ركعات .. وناس يقولو نصلي اربعة عشر ركعة .. وناس يقولو نصلي عشرين ركعة .. والنقاش محتد بينهم لدرجة كبيرة والقيامة رابطة جوه الجامع .. قام خطب فيهم الامام حسن البنا وقال لهم : ( اما أنا فأري أن لا نصلي التراويح ) .. فاستغرب الجماعة : كيف يعني يا مولانا ؟ فقال لهم ( ان صلاة الترايح سنة مؤكدة .. أما التوحد وعدم الاختلاف وعدم التفرق فهو فريضة . اما سمعتم بأمر الله سبحانه وتعالي : واعتصموا بحبل الله جميعا ولا تفرقوا ).
الكلام السـاكت :
كلكم متابعين للحاصل الايام دي من مشاكل بين مصر والجزائر والسودان والسب واللعن .. وسحب السفراء والتكسير والتخريب .. ودا كان حاجة متوقعة واكتر من كده لولا لطف الله بفوز الجزائر علي مصر .. طيب طالما دا كلو كان معروف حا يحصل .. ما فينا زول رشيد يقول يا جماعة : ( أما انا فأري ان لا تلعب المباراة ) ؟ ما كان ممكن الفيفا بتاعكم دا يلغي المباراة حفاظا علي المصلحة العامة أو تتدخل جامعة الدول العربية بدل ما تجتمع سنويا عشان تشجب وتدين وتندد .و هسي عليك الله لو المشجعين السودانيين الوقفو مع مصر ولا الجزائر لو كل زول شال ليهو مقشاشة مش كان الخرطوم دي نضفت من الوسخ العليها دا.
خاتمة :
كم تحسرت ألف مره علي صرف ملايين الدولارات علي استاداتنا لاستقبال الضيوف و ( اللعب ) .. بينما يموت أطفالنا ( بالجد ) في المستشفيات من سوء التغذية . قال روح رياضية قال .. بلا هلال بلا مريخ بلا لمه .. ودمتم سالمين .

والله صدقت با ود العم ........ شغلونا الساسه بالفارغه ....

[b]اما انا فاري بان تعاد المباراه من جديد وسنقف مع المنتخب الجزائري وعشان المصرييين يشوفوا النجوم في عز الظهر { والله حا نهريهم هري غير هري الجزائريين}

سيرة وانتفتحت .... والله يا هيثم كلامك مئة بالمئة طبعا الرياضة لايمكن الاستغناء عنها بس هذا لايمنع الدولة باهتمامها بانسان السودان الطيب الذي عانا ما عانا طيلة هذه السنين لامتين نشوف الناس مرتاحة من غرف البلاعة وذلك لعدم وجود الصرف الصحي ومتين نلاقي لا وجود لبتاع الورنيش اقصد تكون الشوارع مسفلتة من الباب الي الشارع طبعا نحن في السعودية لانعرف ورنيش ونلاقي جزمنا تعيش سنة كاملة وهي جديدة ولكن لما ننزل السودان ننقي احسن الماركات واغلاها ومن اليوم التاني يا بتاع الورنيش وينك ....
انا لو تماديت في هذا الموضوع حا أخرم عشان كدة ما داير اغير مسار الموضوع لكن سوف اكتب عن تجميل العاصمة والسودان أجمع .

سلام يا دكتور ،، وكل عام وانتم بألف خير ،، والله يا دكتور كلامك سمح بس انت ما شفت كاس العالم واحتفالاتو ياخ كل حاجة بتمشي براها حكاية انو المبارة تقام في السودان دي برضو ليها فائدة كبيرة للبلد وجابت دخل كبير للنادي وللحكومة ولبعض المواطنين وجابت سمعة كويسة للسودان واها المصريين اعتذروا ليها وجابو وزراءهم ومدرائهم عشان نحن ما نزعل منهم وبي فهمك ده معناها الصين ما فيها أي زول جعان لانو الشفناهو في الأولمبيات في بكين ده كان شئ غريب جداً .. وبعدين وبصراحة شديدة نحن شعب غير منظم إطلاقاً وشعب بحب النظافة بس ما قادر يتنضف .

مشكور يادكتور علي الباب الهادف رغم مسماه .
ياأيمن رائي (لو الكبار اتنضفوا ،الصغار هينين)،وبتفق مع مجدي انو المشكلة مشكلة ادارة ماشعب .
يعني لو انت قاعد في مكتب مكيف ونظيف وجابوا ليك ان شاء الله بس علبة بارد ،بعدماتشرب حتودي العلبة وين ؟اعتقد انك مستحيل ترميها في ارضية المكتب وحتشوف اقرب سلة وترميها فيها .
طيب انت مامن الشعب والمفروض تكون وسخان ومامهتم بالنظافة !!!
عموما الكلام ده قبل كده في زول قالوا وانا حأعيدوا (الشعب محتاج بس توفير بيئة كويسةوعمل غربلة للناس الماسكين الادارات . وانك توهموا بانه هو شعب نشييط ونظيف وحتلقي منو اكتر مما تتوقع )

كل عام و انتم بخير ...اتفق تماما مع الاخت ايناس غير اني اريد ان اضيف ما سمعته عن استاذي عندما كان يحكي لنا عن شكل الخرطوم في الخمسينات بعيد الاستقلال وكيف انها كانت من انظف و اكثر المدن نظاما و كيف انو السودانيين عموما كانوا يهتمون بمظهرهم و بنظافه شوارعهم يعني المشكله ليست في الشعب ذاتو و لكن في الاداره العاملا لينا رسوم نفايات على الفاضي و ما حاولوا انهم يعملوا شبكة صرف صحي زي كل بلاد العالم ....لكن المسأله و الحاجه الجد بتحير هم المصريين الذين اثبتوا و بجداره انهم ممثلبن درجه اولى و الاعتذارات دي كلها ما منها اي فائده بعد ما شهروا بينا في كل القنوات الفضائيه و المحليه و الجزائريين الما خلوا حاجه بوراهم ما كسروها او خربوها المفروض احنا نعرض في التلفزيون كل الهمجيه العملوها في بلدنا و نطالب بتعويض مادي و نفسي ولا شنو يا جماعه

سلام خفيف


اتعملت اكتر من حلقة فى وسائل الاعلام اتناولت موضوع المبارة بين المصريين والجزائريين والاعتذار المصرى للجمهور والحكومة السودانية.ومع ذلك كل زول فى نفسه غصة .
النظافة اولا واخيرا سلوك فردى يبدأ من الزول نفسه ويتدرج الى البيت المكتب الحلة القرية المدينة.....الخ بتتدخل فيها الدولة بهدف تنظيمها لكن قد تكون النتيجة غير مرضية للعديد من الاسباب ( سياسية / مادية /تخطيط ،/ سؤ ادارة / اسباب علمية وعملية / وغيرها)
وبمعنى تانى لو كل زول وفروا ليهو الامكانيات ح يخلى بيته جنة. ولو ذادوا الامكانيات شوية ممكن نخلى الشارع انظف ولو وفروا لينا زيادة كمان ح نخلى الحلة كلها انظف وهكذا فالمشكلة كبيرة ومتشعبة والحكومة عندها اولويات مجدولة فموضوع النظافة داير جهد مادى وعملى معنوى شعبى وحكومى.وفعلا لو كل زول شال مقشاشة الخرطوم ح تنظف.

اشكر كل الاخوة الذين عقبوا علي الموضوع محمد عبدالدائم / سراج /مجدي/ابو ريناد/ايمن / ايناس/ مروة/ نادية.. وكل من اطلع علي الموضوع لكن القضية اتخايل لي ما قضية امكانيات .. القضية قضية ثقافة وتربية ونحن جيل ما اتربينا علي النظام بتذكر مره كنا راكبين في عربية ومعانا خواجية بعد شربنا البارد ( موبايل )قمتا جدعت العلبة الفاضية بشباك العربية قامت الخواجية استغربت قال لي ليه عملتا كده ؟ قلتا ليها اصلا الشارع وسخان .. قامت ردت وقالت لي :لو أي زول رمي علبة وقال الشارع اصلا وسخان معناها الشارع ما حينضف الي الابد.. وكان هذا بمثابة درس في الاخلاق بالنسبة لي .. قايتو جيلنا دا الفيهو اتعرفت ان شاء الله الجيل الجاي يكون احســـن .
اما قضية التعويض المادي والمعنوي دي فكرة جميلة يا مروه .. بس ما تقوم تكون زي تعويضات الزريبة

التحية للجميع ,,

والله كلنا نتمنى ان نرى سودانا في قمة الدول , وعاصمتنا الجميلة من أجمل العواصم وأنظفها , ولكن ليس بالتمني وحده تتحقق الأحلام .

بمناسبة موضوع النظافة دا وعدم اهتمام السودانيين بنظافة شوارعهم بالرغم من اهتمامهم بمنازلهم وبذل كل الغالي والرخيص من اجل اظهار المنزل في أجمل صورة من الداخل والخارج ( طبعا بغرض التباهى والبوبار) , اذكر الحادثة دي , وهي حادثة حقيقية حصلت في احد شوارع الخرطوم الرئيسية , وهي انه واحدة جارتنا في الحي كبيرة في السن ومعاها بنتها جايات من مشوار , البنت أشرت لي بتاع أمجاد ولما وقف أسرعت قبل أمها عشان تتفق معه علي المشوار , وفجأة سمعت صوت أمها وقعت علي الأرض , فرجعت مسرعة لمساعدة أمها , ولكن للأسف وجدت أن أمها كسرت رجلها ( المخروقة ) وبعد ذلك تم اخذ الوالدة للمستشفي لإسعافها , ولكن للأسف الشديد الوالدة توفت بعد كم يوم نتيجة لشدة الوقعة وارتطامها بالأرض , حتي هنا والقصة عادية , ولكن المأساة تكمن في أن سبب انزلاق المرأة ووقوعها علي الأرض كان هو ( قشرة موزه ) رماها احد الماره دون أي مراعاة لما سوف يسببه هذا الإهمال من نتائج حتي ولو كان فقد احدهم لحياته .

نسأل الله العفو والعافية والمعافاة الدائمة في الدين والدنيا والآخرة .

اخي الكريم ابن العم العزيز / عبدالعزيز دراش حفظك الله ورعاك ولكاتب هذا الموضوع كل التحايا والود...

حقيقة لقد مررت في السباق وعلقت علي هذا الموضوع ولكن ما دعاني للتعليق مرة اخري هذا الحادث المؤسف الذي ذكرته .. ولو كنا نتبع بعض توجيهات نبينا الكريم عليه الصلادة والسلام بالرغم من اننا مامورين باتباع كافة توجيهاته لكن حالنا غير حال واقلها اماطة الاذي عن الطريق .. والنظافة من الايمان وكل هذه الجماليات التي بعد اكثرنا عنها وكل همنا انفسنا وبس ( انانية الانسان )..
والله المستعان وربنا يحرمنا هذه الوالدة الكبيرة ويدخلها جناته وانا لله وانا اليه راجعون ... ودمتم في حفظ الله