لقاء الإسبوع مع سراج الدين عثمان

سيكون لقاء الإسبوع مع العضوسراج فبدون حواجز الباب مفتوح ولمدة إسبوع نتمنى كرسى ساخن
وذكريات أبو ريناد
عمى بهنس والشلة



ومن الحتانة سلاااااااااااااااااااام

مرحبا بالعزيز سراج فى الكرسى الساخن
1/ اولا بطاقة تعريفية كاملة من انت من هى والدتك وابوك (عاوزتعريف كامل )
2/ ما هو سبب عزوفك عن المنتدى فى الفترة السابقة (بصراحة )
3/ هل قبل كده تعاملت مع الاناطين بتاعين الكورة من فكى وكجور وغيره وهل كورة مازمبى مع الهلال فى الخرطوم ربطوها المريخاب وهل شاهدت قبل كده هلالاب او مريخاب مشوا للفكى لربط اى مباراة .
4/ فنانك المفضل ووجبتك المفضلة وفريقك فى السودان وعربيا .
لك الشكر انا كنت عاوز اسال اكثر من كده لكن الباقى خليتوا للجماعة .

الأخ العزيز سراج تحياتي وأشواقي القلبية وأتمني أن تكون أسئلة الأخوة ساخنة كحرارة عشقل لوطنك الصغير الحتانة
سؤال برىء ماذا تقول في زرقة السماء وتلاطم أمواج البحر الزرقاء( أوعي تفتكرني رشاشه)

مرحب حباب شيخ العرب اتفضل علينا جاى .. يا خوى قالولى انت الليلة حا تكون معانا هنا فى الكرسى الساخن وحسع اتصل على ناسا كتار بلحيل وقالوا جايين حسع وعندهم ليك اسئلة كتيييييييييييييييييرة .. لكن قبل ما يجوا ويسالوا اخير اسال انا .
1/ما هو اجمل ابواب المنتدى .
2/ اين كنت يوم هزيمة المريخ من الصفاقس التونسى وشعورك كان كيف .
3/ اكثر زول شقتوا فى حياتك بحب الكورة وبالذات المريخ .
4/ احكى لنا اطرف موقف مر بك او اخر الاحلام التى حلمتها .
لك الشكر والتقدبر وحسع الجماعة بيجوا ما تمشى اشرب ليك فنجان قهوة لاحدى ما يجوا .

[b]شكرا للاخوان حسن وازهري وجعفر لكني اريد ان اقول سانتظر المهله المسموح بها من المشرفين والتي حددت باسبوع فان كانت المشاركات في هذا الباب من الجميع او من 50% عندها ساجاوب علي جميع الاسئله لانني قد لاحظت بان لقاء الاسبوع كل الاسئله به اجاباتها معروفه للجميع واغلبيه الاعضاء حتي المداومين لايشاركون في هذا الباب وهذه مجرد ملاحظه قد تكون صحيحه وقد تكون خطاء

مجدي يا لذيذ يا رايق زي ما قلت الكرسي دة زي كسرة الشتاء بالسليقة عايز الواحد يأكلها وهي حارة .....
أخي وصديقي سراج ابو عثمان لك التحية زي ما قال عبده نحن فرد بس انا بخفف عليك بديك من بيت القوانص ,

سراج رجل ظريف وطريف ولا يمل ,,,
1/ سراج كان مشارك بشخصية مسرحية كونت من قبل روابط الجامعات للعمل الصيفي وكان زوج واستاذنا العظيم الشيخ الباقر يمثل الزوجة وقام شجار قوي بين الزوجة والزوجة حتي طلبت الزوجة الطلاق سراج طلع من النص والجميع صفق له وموتنا من الضحك هل تتذكر خروجك من النص ؟ وما هو ؟ انت الان رب اسرة حقيقي وفقك الله انت واهلك وحفظ عيالك هل أنت بنفس السخونية ولا تمثيل ساكت؟
2/ في تعريف بسيط ماذا توصف او تسمي الصادق وابراهيم وسراج في زمن الطفولة والصبينة ؟
3/ سراج خمسين كانت مضمونة وفي شمالك دقلاش وراحت عليك أوصف حالك ؟
4/ سراج سائق سيارة كيف تكون اعصابه واذكر موقف من هذا النوع وياريت داك اليوم ياسراج ؟؟؟؟؟؟؟

االاخ سراج سلامات وانت على الكرسى الساخن \س\عرفنك رجل قومى لماذا انحصرنشاط على الحتانة اين المحمية

الخال سراج:تحياتى:
انت تعتبر خزنة من المواضيع والذكريات المختلفة من خلال ذلك:-
1/ اطرف واظرف موقف مر بك فى السوق العربى؟.
2/ اصعب موقف مر بك فى السوق العربى؟.
3/ ممكن تتخلى عن " الصعود " فى يوم من الايام؟
4/ اصف شعورك وانت داخل كورة هلال x مريخ؟ والمريخ كان مغلوب........

الزعيم – سراج أهلا وسهلا بك تفضل بالجلوس :

1- إجتهدوا كثيرا فى الموسم الرياضى - محلية جنوب الدامر – هل تعتبرها تجربة ناجحة ؟؟ أم محبطة ؟؟
2- أنت شاعر ليس بالسهل – متى تعلمت كتابة الشعر ؟
3- قرى المحمية تنقصها الكثير من عوامل الإستقرار والخدمات ، وهى محتاجة لعضو برلمانى ، وقع الإختيار عليك لخوض إنتخابات بعد تقديم الدعم المادى واللوجستى لحملتك الإنتخابية هل أنت مستعد ؟
وماهو مشاريعك للحتانة والكتواب ؟؟ وتغييرات وإصلاحات تحلم بها ؟؟
4 - لاحظت غرام الجيل الثالث منكم بالحتانة – سراج – عبدو- أبو ريناد – معتصم – حيدر العطا – الدحيش
عاشق الحتانة – حسن عطال المنان – ناجى بينما غاب الجيل الثانى من هذا الغرام – فتيح عبد الرحيم –
فتح الرحمن محجوب – أسامة عبد الله – ودالقراى – شيخ على الباقر – محمد يوسف لماذا ؟؟
تحياتى ومودتى

اذن قد تحق الهدف واستطعت ان استدرج الاعضاء لهذا الباب حتي ادردش مع الاهل والاصدقاء والاحباب واقول انا جااااهز للكرسي الساخن
اخونا حسن عطا المنان اعرف لك نفسي انا ابن الحتانه ووالدي من الحتانه ووالدتي بنت الحتانه ولدت بالحتانه وترعرت بالحتانه تعلمت فيها وتخرجت منها روحي بها وقلبي معها اتنفسها في انفاسي اهلها اهلي وانا اتشرف بان اكون واحدا منهم وساموت بها ومن اجلها انشاء الله ...ديل اهلي تسربوا في مسارب الروح بقوا كلي ..محل قبلت القاهم معايا معايا زي ضلي...تصور ياحسن لو ِ ماكنت من زي ديل كان وا اسفاي وا مأساتي وا زلي
صدقني يا حسن ليس هنالك عضو من اعضاء منتدي الحتانه يستطيع ان يبعد عن منتدي الحتانه ساعه واحده لولا الظروف التي تجبر الجميع وانت سيد العارفين فمنتدي الحتانه الكل يجد فيه نفسه مع الجميع نجد فيه الاهل والاحباب والاصدقاء والجيران فمن الصعب العزوف عنه

اما موضوع الاناطين فهو موضوع طويل وممتع وانشاء الله سيكون لنا فيه الكثير وخاصه في مجال كره القدم مريخ ..هلال

مازمبي والهلال ياحسن دي من اجمل ماشاهدت وعليك الله الهلال ده عاوز زول يربطو؟ هو مااصلو مربوط براهو في البطولات الخارجيه وبعدين الهلال ده ليهو ستين سنه بالحاله دي باقيلك ان مربوط تاني البطلقو شنو؟

الفنان المفضل ده موضه قديمه كان زمان الشباب بحبو البنات ومابيقدرو يتكلمو معاهن وعشان الواحد ماعندو موضوع بيقوم يسأل

البنت انتي فنانك المفضل منو عشان يعمل ليهو موضوع ويربط مع البنت ويجيب ليها هديه شريط كاسيت للفنان المفضل ويقول ليها صدقي انا فنانك ده برضو فناني وهو تلقاهو لاسمعو ولاسمعبو ..المهم انا اعشق اغاني السيره والدلوكه والشتم بالذات

اكلتي المفضله كسره بي ملاح كُرْاره اعني الاسم واقصده عشان عارف في ناس في المنتدي حناكيش مابيعرفو ا ملاح الكراره وماسمعوا بيهو زي الفنان المفضل والشريط واذكر ان الوالده رحمها الله حكت لي قصه مع اخيها عبد العزيز البشير ..قالت عبد العزيز عندما كان صغير كان بريد ملاح الكُرْاره ريده شديده ..ففي احد الايام حضر اليها في البيت الساعه خمسه يعني العصر ..فقالت له الليله ياعبد العزيز عندي ملاح كراره سمح خلاص اعمل ليك منو غداء ؟؟قال لها اعمليهو طوالي منتظره شنو..فعملت له الغداء فجلس في الارض ليأكل وعندما اكل اللقمه الاولي والثانيه قعد يجعر ويبكي بي حرقه وهو ينظر للاكل فسالته الوالده الله يرحمها مالك بتبكي ياولد قال لها وهو يجْعُر انا شبعان ماقادر اكل ..قالت له طيب خلاص ماتاكل قوم اغسل يدك وماتبكي قال لها برضو مابقدر اخلي الملاح السمح ده بكره بلقاوهو وين؟...ودمت ياحسن

اخونا ازهري لك التحيه وللاسره الكريمه

ياشيخا سؤالك البريْ عن زرقه السماء اعلم جيدا انك لاتقصد الهلال ..فطالما كان الحديث

عن السماء وزرقتها فلابد من الحديث عن الهلال فياريت لوكان الهلال مثل

السماء ..فالسماء تمطر كل سنه والهلال ستين سنه مانقط ولا نقطه ياكافي البله ..عشان كده

ياازهري قررنا نحن جماهير المريخ ان نؤدي صلاه الثتسقاء عسي ولعل الهلال السنه ده ينقط مطره ..عفوا يجيب كاس من الخارج

اما تلاطم امواج البحر تذكرني بتلاطم دفاع الهلال اما هجوم مازمبي هههههههي

لاتبخل علينا فقد رأينا فيك شاعرا يغزل الحروف كلمات تحتاج الي لحن يسكر بيت القصيد..
ودمت ....لك مني التحيه.

[b]جعفر العطا سلااااام
سمعنا ياجعفر بالكثير من الاغاني التي تمجد العربات وسائقيها مثل ياسايق

الفيت...وعربتك الكامري ...وكريسيده بي سيده ...وياسايق يارايق وقف وقف...وياسايق

البوباي الله لي...النار شوتني براي الله لي. .. دحين ياجعفر ما في اغنيه تمجد سايق

الطاحونه؟؟؟؟ والله ظلم

اما عن اسئلتك والله انا عندي شك البيسال ده ما انت ..لكن برضو حا نجاوب ليك ...

المنتدي يا البيسأل نيابه عن جنقر ..ليس جماله في ابوابه وشبابيكه انما في تجمع الحبايب

والاهل .في ناسو وحراسو..في اهله... في من نشتاق اليه فنجده بيننا... باختصار كل الجمال
وهبوهو ليهو وجعل السحر في انامل اعضائه وزواره

المريخ والصفاقص التونسي كنت داخل استاد المريخ اشاهدها من علي المدرجات

باعصاب منهاره ومنفلته وكنت متوتر جدا عندما احرز الصفاقص هدفه الثاني نعلنت بهاء

الدين حارس المرمي وقلت له بانفعال انعل ابو امك ياعب يامعفن وكان امامي احد الجنوبيين
فقال لي ماتقول له ينعل امك فقلت للجنوبي ينعل امو وامك وام العبيد كلهم ونزلت فيه

بالبونه ..فشيت غبينتي في الجنوبي المسكين .وطبعا الجماعه حجزونا ...وفي لحظه الشكله

الصفاقص جاب القون الثالث فقمت قلت للجنوبي المريخ ده خلينا ليك شجع انت عبيدك

دالعاجبنك ديل ..وخرجت من الاستاد والي البيت فورا لم اخرج منه الا ثاني يوم المساء خوفا من شماتت الهلالاب

المواقف الطريفه كثيره تحتاج للكثير من الزمن وساحكيها لاحقا


الانسان الذي يعشق الكوره والمريخ بي شده هو احد مشجعي المريخ الذي ربطني استاد

المريخ فهذا الرجل يحضر الاستاد قبل الكوره بساعات طويله وعندما تبداء الكوره لايشاهدها

خوفا من هزيمه المريخ ويكون حائما وسط الجمهور وعندما يهتف الجمهور لهدف ياتي ويسال من الذي احر زهدفا . ويخرج معنا دون ان يشاهد المباراه ويفضل يغالط كانو شاهدها

[b]محمد خير وينك ياسقادي الحره ياام خيرا جوه وبره ...ابقي واصل ...

اولا منتدي الحتانه بالنسبه لنا هو الرئه التي نتنفس بها وهي التي دائما ما نجد فيها انفسنا كما قال الاخوان ولكن بالرغم من ذلك لم ينحصر نشاطنا فيها فقط وقد شاركنا في اغلبيه منتديات الجعليين وفي منتدي المحميه الام بالذات لنا الكثير من المساهمات بل انا من اوائل الاعضاء المسجلين فيها باسم ود الحتانه .. ولازلت مواصلا فيه ولن تهوني علينا يامحميه يوما ..مع خالص الشكر والتقدير لك...وما تطول الغيبه...

[/b]ونواصل الردود لبقيه الاسئله غدا .............

............ وياناس الحتانه.....


...... عواااااااااااااااااااااااااااااااااااااااافي .........

عشان أتاخرت علي الرد ياسراج اديك سؤال واحد كارب ولو أتأخرت تاني حا أكفتك بسؤال



ســــــــــــــــــؤال : ـ

أول حرف أنجليزي كتبته بالنار علي يدك ؟
طبعا الحبيبين كلهم بعرفو الكلام دة

عوااااااافي يا ناس الحتانه ..ونواصل الجلوس معكم للرد علي اسئلتكم الحاره جافه صيفا ودافيه ممطره خمسات في الهلال

اخونا ابراهيم ابوريناد ليك وحشه والسلام للقدامك
ياشيخنا والله انت ما شاء الله عليك ذاكره شباب
اولا عزيزنا وصديقنا ابو ريناد.صدقني لم اكن اتذكر تلك المسرحيه ولا
خطرت يوم علي بالي ان لم تذكرني انت .ذكرتني جيدا ذلك الدور الذي لعبته في هذه المسرحيه وعلي ما اعتقد كان في مدرسه سقادي غرب ولكنني لم اتذكر ماذا قلت للشيخ علي الذي كان يمثل الزوجه عند خروجي من النص . فارجوا ان تذكرها وتذكرني بها

ونحمد الله كثيرا بان السخونه قلت كثير مما كنا عليه في زمن الشباب
فقد اصبحنا عاقلين وسبنا الشفتنه والتمثيل
والله يا ابراهيم من اراد ان يتمتع بالكشتينه فعليه ان يتفرج في دقلاش فهو يكون فاكهه التربيزه واكثر الناس جرسه عندما تكون قافل وتكلموا تاني مابيجدع ليك بايظ ً
,وياابو ريناد لوكان الله عاوز يفرج فيك خلقه اتمنيص من دقلاش

لانني لااملك عربه الان فان اعصابي هاديه وعندما اكون سائق اكون اكثر هدو ولكن احيانا القدر يعمي البصر ففي مره من المرات كان ابراهيم وزوجته المرحومه اميره رحمه الله عليها معنا في البيت وعندما ارادا الذهاب الي منزلهم اصريت عليهم ان اوصلهم بالعربيه فاخذت معي زوجتي وكنا انا وابراهيم عرسان يادوب وعندما وصلنا شارع الحريه مع تقاطع جامع ابراهيم مالك لم انتبه للشارع الرئيسي وفجاءه اراد سائق حافله هايس ان يخزن خارج الشارع لينزل احد الركاب فوجدته امامي . حاولت ان ادوس الفرامل فشبك الشبشب مع الابنص وضغط علي الابنص {الشبشب ماشبشب عريس جديييد} حتي دخلت في باب الحافله فاخذت العربه يمين وهي بنفس السرعه وكان الشارع مليان بالناس وحاولت ان اتفادي الناس وبعد مشيت مسااافه استطعت ان اتحكم في العربيه ووقفت ..فاذا بسائق الحافله والركاب يجونا جاريين وهم يرددون تضربتنا
ا وعاوز تجري كمان ...والمصيبه بعد ماصدمتهم حاولت ان اشتبك مع سائق الحافله وقلت له كيييف تقول عاوزين نجري انت اصلو عاوز تعملينا شنو ...وبالله ماتقل ادبك عاوز تصلحها بنصلحها ليك .. عاوز الحركه جيب ناس الحركه . صاحبنا هنا استجاب للتهديد والوعيد {وشاف الحنه في يد ابراهيم حنه علينا} .قام قال والله العربه دي ماحقتي نشوف صاحبها البيقولو انا بعملو ..المهم في النهايه ساوينا الموضوع واتفقنا ..وخلاص ماشين وكل زول ركب عربته اذا ببوليس حركه يقف امامنا ويقول هي هي ماشين وين تعملو حادث وتعطلو الشارع هو الشارع ده حقكم ..فانا قلت له وانت من قبيل وين يافالح الناس عملت حادث واتساوت وانت عاوز تجي تحاسبنا .. ده الحادث قدامك ارسمو لوبتقدر{اول مره اشوف عريس لميط} ..وقامت معركه كلاميه بيني وبين بوليس الحركه تمشي معاي مابمشي .اركب معاي .ما بركب {عاوز اثبت للعروس وراك راجل} وصاحبنا ابراهيم يحنس بي جاي ويحنس بي جاي واخيرا ذهبنا مكتب الحركه ودفعونا غرامه ومشينا والمصيبه عندما وصلنا مكان الحادث ابراهيم حلف انا ما اوصلهم وانا حلفت اوصلهم الظاهر الراجل خاف علي نفسه من حادث ثاني ..تخيلو معي خرجنا من البيت الساعه عشره مساءعدنا اليه الساعه اثنين صباحا والله ياابو ريناد مشوارك ده كلفني جنس زمن وجنس بشتنه

الصادق سراج ابراهيم اشقي ثلاثه اصدقاء في زمن الطفوله واجمل ايام في حياتي كانت تلك الايام ..التقي والدباس ..عبد العجور معليش ,سوق اللحد والمحطه . رمضان والمنقه.. امبور والامين عثمان .انها ايام ياابو ريناد ليت الزمن توقف عندها قليلا ...واخيرا يا ابو ريناد استعد لحديث الذكريات فالمنتدي ينتظره الكثير منها وياريت يكون في باب في المنتدي يسمي بحديث الذكريات...ودمت صديقي ودامت ايامك سعاده ...

اخونا طلال وين يافرده ياصفوه

والله من مالقيتو حلم تمنيت ان لااحلم مثل هذه الاحلام المزعجه واكيد ان وجدت في احلامي بان المنتدي سيغلق .لن انام الا الابد حتي لااحلم..بس اكون صاحي لو نعست اربط شعري علي الثقف بحبل عشان لو حاولت انوم الحبل يشدني من شعري واصحي ...{القصه دي
قابلتك وييين ياطلال}..وطالما انا صاحي لن افقد صديق ولاموضوع ولاذكري لانني لسه صااااحي { سقده بس}

اما شعوري بعد هدف مازمبي الخاااامس شي عجييب والله فبعد الهدف الخامس تمنيت ان لاتنتهي هذه المباراه وذلك حتي نري المزيد من الاهداف ..فمتعه المتعه ان تري الكره تتهادي داخل شباك الهلال حتي ولو كانت من فريق درجه ثالثه والمهم عندما انتهت الكوره انا كنت مييييت من الضحك ههههههي .قال كاس العالم للانديه قال..ههههههي والله ياطلال انت بتاع كدايس
واخيرا ..تحياتي لك وللاسره الكريمه ووالدنا خليل

بنت اختي الحبيبه ناديه

والله انا عندي جنس مواقف محرجه ومضحكه تحيرك

اطرف موقف مر بي وانا في السوق العربي كان في التسعينات عندما كنت اعمل مع بعض الاخوان من الدويم وكان عندهم واحد مجنون وعندو نفسيات بيجيهم مره مره وانا ماعارفو مجنون ..وزولنا ده جنو وجن الزول البعاين فيهو فمره اتي الي الدكان وانا كنت واقف بسلم في بضاعه صاحبنا جا دخل جوه الدكان وانا عاينت فيهو قايلو زول حرامي عاوز يسرق حاجه فقلت للزول المعاي راغب الزول الجوه ده مايقوم يسرق حاجه فقال لي ده زول من بلدنا ماتشتغل بيهوا .المهم واصلت في عملي اسلم في البضاعه فاذا به يباغتني ويديني ليك كف لما اضاني صنت وقام جاري .فقمت سكيتو ليك وقبضتو واديتو ليك الواطه وقعت فيهو ضرب شديد وهو من تحتي يكورك اهلو جو يفكوني منو ماقدرو .وياسراج الزول ده عندو نفسيات فكو.وانا اقول ليهم انا زاتي عندي نفسيات.ياسراج الزول ده مجنون..اقول ليهم انا زاتي مجنون ..المهم بي قدره قادر حتي الزول ده فكيتو. بعد مافشيت غبينتي وشفت وشو بقي كلو دم .وبيني وبينك { الكف ده للليله حارقني}

اما اصعب موقف فهو قصه عاوزه ليها يوم كامل عشان احكيها وهي اشبه بقصص المسلسلات ولكن ساحكيها في مره اخري لضيق المساحه والزمن

انا دائما عندما اكون في كوره مريخ هلال والمريخ مغلوب طوالي بعمل مشكله مع اي زول حتي ولومريخابي المهم بتفشي في اقرب زول
واذكر قصه من قصص هلال مريخ مره كان المريخ متقدم علي الهلال في الدوري الممتاز بي سبعه نقاط .فسافر الي بورتسدان وتعادل مع حي العرب وذهب الي عطبره وتعادل مع الامل .والكوره البعدها كانت مع الهلال واذكر اتي جمال الوالي في الصحافه ليعزي في وفاه عمنا عبد الرحيم الله يرحمه فكان كل المريخاب يتحدثو معه في كوره الهلال القادمه .فقلت له والله انا ما يهمني حي العرب ولا الامل .بس مباراه الهلال القادمه لو المريخ انهزم فيها لو شفت ليك زول داخل الميدان فهو انا والله لابعرف صفوه ولاغيرو و اقرب لاعب اقابلو انا بدقوا وبخش السجن اليحصل يحصل ..قال لي بي ثقه انا زاتي لو المريخ انهزم من الهلال ساتقدم باستقالتي ..المهم طمني انو المريخ حايغلب .ويوم الكوره وانا اجلس في المساطب الشعبيه خلف المرمي الجنوبي وكان حارس المرمي بهاء الدين الله لاعادو..واثناء الكوره ما لاعبه الحكم احتسب مخالفه للهلال خارج خط 18 تصدي لها ريتشارد احرز منها هدف ميييت دخل بين ايدي بهاء الدين .فما كان مني ودون ان اشعراقتحمت السور الفاصل بين الملعب والجمهور ودخلت الملعب وجري علي بهاء الدين .ولحظتها هاجمني اثنين من رجال الشرطه ومن خلفهم ضابط برتبه عاليه اتو مهرولين خلفي وامسك بي احدهم بعد ماخلاص قربته لي بهاء الدين فقاومته وحاولت الفكاك منه الا ان اتي الاخر والضابط واراد احد العساكر ان يضربني بالخرطوش لكن الضابط قال لهم مافي واحد يضربو{الله مرقني من جنس علقه}فاخذوني خارج الملعب وامرالضابط احد العساكر بان يسلمني للعربه خارج الاستاد .وفي اثناء خروجي من الاستاد والعسكري يمسك بي وانتبهت لصوت جماهير الهلال يرتفع فجاءه ..اتاريهم جماعتنا جابوا قون تاني وانا ماعارف ..احرزو قودوين.فسلمني العسكري للملازم والذي كان غاضب جدا سالني بي نهره انت عملت شنو فاخبرته بما حدث زولنا طلع مريخابي زعلان زي قال لي ديل لاعبين عواليق ساكت امشي اهلك طوالي.هسع الهلال احرز الهدف الثاني
ياريت لوكان سكت من تلك اللحظه اصبحت لا اسمع لااري لااشم وطوالي البيت جاك زول .وصلت البيت وفتحت الباب بررراحه .اولادي ماشعروبي والصالون فلللي وعاهدت نفسي ان لا اكلم اليوم إنساً ولاجنيا.....والشيء الغريب انو جمال الوالي بعد الكوره طوالي تقدم باستقالته
مع تحياتي لك وللاموره مزن

[b]ويبقي التواصل بيننا .غدا انشاء الله

ويانااااااااااااااااااااااااس الحتانه عواااااااااااااااااااااااااااااااااااااااااافي

صدقنى يا عزيزى ما دايرك تتكلم لى عن الكورة .. لأنى عارفكم ما بتتغالطوا .. ياخ سته سنه نحن راكبين فوق ضهر الحمار و إنتو ماسكين الضنب و جارين ..

و الله أنا لو كنت مريخابى ما كنت أعكس الكلام و أقول مريخ هلال ..

إنت عارف دى زى شنو ؟ زى شاى باللبن .. كسرى بى ملاح .. الأول و الثانى .. المال و البنون .. ... إلخ
لو جبت إى كلمة قبل التانية الصورة بتبقى مقلوبة .. يا مغلوب ..

طبعاً من حقك تقول أى كلام فى هذا الكرسى .. لكن عيب عليك يا وصيف تقول أجمل مبارة مبارة مازمبى و الهلال .. و ذلك لسببين ... اول حاجة أنتو مالكم و مال مازمبى .. وين عمايلكم أنتو مع الهلال .. اسع عليك الله الزول لو سالوه فى البيت بقول أرجل أنا وللا راجل امى ..؟؟

الحاجة التانية هى تقديم إسم مازمبى على إسم الهلال ..

صدقنى تأخيرك لإسم الهلال بعتبروا مفخرة لينا .. لأنك لو قلت هلال مريخ .. أو هلال مازمبى .. أو المال و البنون .. بكون كلام عادى ..لكن عندما تقول مريخ هلال أو مازمبى هلال أو البنون و المال بكون كلامك زى الزول اللسانو أغلف .. وهذا هو تميز الهلال عن بقية الأندية .. يجعلكم غـُـلف .

**
ما علينا ... خلينا فى السؤال ..

-هل تزوجت عن حب ؟ أم كانت صدفه ؟؟
-ما هو رأيك فى الزواج من الاهل ..و بأيهما تنصح الشباب.. الزواج من القريبة.. أم الزواج من الغريبة ..؟؟؟

[b]ونواصل الردود...عبد المنعم اشواقنا ليك ..كيف اخبار الاخوان محمد..عبالعزيز..لانراهم في المنتدي ..لعل المانع خير

وعلي الكرسي جلسنا ...

تجربه الدوره الرياضيه اخي عبد المنعم .هي ناجحه بكل المقاييس .حيث كان الهدف رفع اسم المناطق .ووضع خارطه الطريق لها لتنمو وتزدهر ويبقي اسمهاخالدا .وفي هذا النقطه اظن اننا قد اصبنا النجاح .وادخلنا اسماء ثلاثه مناطق كانت مجهوله وغير معروفه بالنسبه لانسان جنوب الدامر فكان اسم الكتواب والحتانه والعوضاب يتردد علي كل لسان .واصبحت الفرق الثلالثه بعبعا مخيفا لمنطقه جنوب الدامر .فالمطمر اصلا كانت معروفه باسم المجالس .وهي التي كانت تمثلنا في جميع المناسبات السياسيه والخدميه فلذلك كنا تحت غطاء منطقه المطمرولم يكن لنا اسما في هذه المنطقه فالدوره الرياضيه ادخلت هذه المناطق من اوسع الابواب فكان الاسم والرسم ونالت العوضاب شرف التنظيم فكان اسمها وميدانها .حديث اللجان المنظمه للدوره .ونالت الكتواب شرف الدخول لدور الاربعه برغم حداثه التجربه فاصابت النجاح وكان الاسم .ونالت لقب الحصان الاسود في الدوره .والحتانه برغم انها معروفه رياضيا لبعض مناطق الجنوب الا ان شهرتها عمت كل القطاع فكان الخوف من اسمها الذي اكتسبته في هذه الدوره بالذات سببا مباشرا في عدم حصولها علي كاس البطوله وذلك بتحذيركل مناطق الجنوب منها من قبل من تابعها من الجمهور واعضا ء اللجنه المنظمه وهو ماجعلهم يحترموها كخصم قوي فكان الاستعداد الجيد والتواصل مع الملعب فلذلك خرجت من ربع النهائي ...اذن اخي عبدالمنعم تحقق ماهدفنا له من هذه الدوره فاخرجت البطوله الحتانه ..الكتواب ..العوضاب ..اسما ثم معني وهذا ما كان فاصبحت ..الاسماء..في .. كل مكان...

انتخابي للبرلمان لخدمه المحميه ..هذا ما اتمناهو دائما تراودني مثل هذه الاحلام ..وكنت دائما اقول عندما اقدم خدمه في مجال عملي .لاي شخص من منطقه المحميه عموما ويريد ان يكافأني بالاجر ..ليت لي غيرعملي هذا لاقدم به اكثر مما اقدم ..لانني لااملك في يدي غير عملي لاخدم به احدا من اهلي اومنطقتي فان وجدت نفسي في هذا البرلمان ..تأكد انني لن ادوم فيه كثيرا .لان التُهم ستلاحقني كثيرا بانني منحاز لخدمه منطقتي المحميه وقراها دون غيرها..وهذا شرف لي ولن اندم علي وظيفتي ..

الافكار كثيره والمشاريع كبيره فالاصلاحات والاحلام لتعمير وتطوير منطقه الحتانه والكتواب اكبر مماتتوقع وتتصور ولاغرابه في ذلك فهذه المناطق احق من غيرها بعاصمه الولايه .واظنك توافقني الرأي بان مستوصف الكتواب الخيري واستاد الحتانه الرياضي هم اقرب الاحلام للتحقيق .وعليك ان لاتنسي مااتفقنا عليه في صيدليه الواحه الشعبيه و الذي قارب علي النهايه

غرام الاجيال لمنطقه الحتانه هو غرام موزع بالتساوي بين كل الاجيال بل هنالك من يعمل في خدمه الحتانه من وراء المجهر امثال فتح الرحمن عبد الرحيم قائد كل الاجيال ...فالجميع عاشقا للحتانه كل بطريقته وكل جيل وضع بصمته في خدمه الحتانه ..وهنالك الكثير منهم يعمل خلف الكواليس ..لايهداء له بال الابعد ان ينجز مهمته علي اكمل وجه ..ودونك قائد الركب مدير منتدانا العام البخيت فهو عاصر كل الاجيال ولازال يواصل المسيره ويتقدم ركب الجيل الثالث بذات الهمه والنشاط القديم المتجدد..

اما عن الشاعريه والكتابه وزمنها ..اذكر ان صديقي وبان خالي احمد البشير قد سالني من قبل نفس السؤال و قال لي متين بقيت شاعر يااسماعيل حسن..فكان ردي له بهذه الابيات...

ماني فنان لا ملحن لاني شاعر

اصلي انسان وبي حواس مليان مشاعر

بكتب الحرف البحسو وبغزل الكلمات خواطر

نحن اصلنا من قري بنريده حلتنا ونفاخر

والبطن والدانا واحده والترابط بينا ظاهر

والكتبتو عن الحنان حقيقه ما كان بس مظاهر

نحن مما قمنا اخوه لا بنخاصم ولابنفاجر

القصيده طويله اخي عبد المنعم فزمن الكتابه قديم ..وهي لست بشعر بل هي كلمات و معاني تنفجر كلما جاشت دواخلنا بالذكريات فنعبر بها عن احاسيسنا ان زارنا الحزن تكون الدموع كلمات وان كان الفرح يبقي الحرف زاد...فلازلنا نتحسس الطريق .ربما تكون كلماتي .. هي تعبير عن اهاتي ..في لحظات الضيق ..
...ودمت ...

[b] اخونا وابن عمنا خالد الصفوه .. عوافي ..كاس خارجي مافي ..ممتاز محلي صافي..

لماذا المريخ ؟؟؟ ومن ياعزيزي غير المريخ..
كطفل عند تعلم الكلام يبداء بكلمه بابا فسهوله الكلمه عند الطفل وجمال لحنها يجعله يتعلم نطقها هذا هو حالنا وجدناها امامنا تترددعلي شفاه اخواننا فاعجبنا لحنها وبداءنا بترديها .فعندما استوعبنا معناها
هالنا جمالها وبهرنا نورها فاصبحت نجمه لاهلال معها لها وميض يجعل الكاسات تأتيها عبر اجواء الفضاء..لها وحدها دونا عن كواكب السماء ..وعندما تيقنا انها تسيطر علي الارض كان الايمان بها اغتسلنا وتوضاءنا وشهدنا باننا مريييييييييخاب والحمد لله

والحمد لله ان كل الاسره مؤمنين بالمريخ وربما يكون للفريق منصور تاثير علي بقيه الاسره ومنهم تاثرنا ولكنني منذ نعومه اظافري وقبل ان يدخل الفريق منصور في العمل الاداري بالمريخ كنت انا المريخ انا التاريخ ..فزاحمت الاسره في عشقها فانتزعت منهم حب المريخ الذي اري اني اهواهو وحدي...
....لك وللاسره السلام..من الحتانه