البلد الليله هلالابى

الليلة دا يوم السودان

البلد الليلة هلالابى

النيل الأزرق نشوان

والأبيض أبيض ياأحبابى

يامشرّف كل الأتيام

فى يوم السعد الافريقى

يا مفرّح كبد الأيتام

باللعب البعد الموسيقى

يا هلال فى جبيرة سودانك

فى جبين الشعب الحبّوب

أبشر لاباشر وأقوانك

ياعريس السمر المحبوب

تعجبنى الرمية الزنجية

لى رأس الحربة النوبية

بى خفة لمسة بجاوية

تتسامى الهامة العربية

وتتناول نسمة صعيديّة

تسكن بى كلّ أريحيّة

ما بين الخصل البنيّة

وزغريدة تبق سودانية

لى أروع دخلة على النية

لى أروع دخلة هلالية

البحر الليلة هلالابى
المطر..

الحجر..

الترّابى

الشدر الشايل متكابى

الساقى عروقو الحطّابى

الشوقو عنقريب هبّابى

الشاقّى مروقوهلالابى

الوسّار ذوقوهلالابى

القمر البيتو قصاد بابى

حبيتو لانو هلالابى

وين تمشى الراضى على المابى

بالشمش الفوقوهلالابى

يا ليم يا الكورة وكت تبقى

أخلاق موروثة مع الخلقة

الغالب حاضنو المغلوب بمودة

وحنية ورقة

وجمهور بيشجع مصحوب

بالنغم الطيب والصفقة

الله ياشعب ياحبوب

ما أحلى الدخلة على المرقة

يا فريق بيطلع كم فرقة

يامارق بينا من الزنقة

وحدنا شبعنا من الفرقة

جددنا عشان نبقى وتبقى

ياريت الطالقة المنطلقة

وعلى بعض طلقة

ياريت يا أبونا يا ابو الحرقة

لو تقرا بياضك والزرقة

الشاعر : حميد
ـــــــــــــــــــــــــــــــــــــــــــــــــــــــــــ

والله كلامك دا ما بعدو كلام,نسانا الدايرين نكتبو عن الهداف العابرة للقارات . لكن يا جماعة (بيني وبينكم) المريخ لسه لم يفقد الأمل. ممكن يسجل أسوأ سجل. وده ذاتو شرف كونك تمرق على يد الهلال بماركة مازدا , في المقبرة (سراج قال المريخ حيغلب) هو الكلام بقروش يا عالم!!!!!!!!!!!!!!!!

عدد المساهمات : 498 تاريخ التسجيل : 08/04/2009

وقّف مشاهدك يا زمن
راجع دفاترك يا محال ..
في السكة موج ازرق هدر
تاريخ ندر إسمو الهلال ..
الملعب الأخضر سكت
سكان الخطوط من هيبتو
كل المساطب من قديم
عرفت جلالو وعزتو
حتى المقاعد والسياج
أدوا السلام لي روعتو
أهو ده الهلال طيبة ومثال
تاريخ عظيم في فكرتو
حيوا الفريق العالمي
حيوا الهلال رمز الفخار
فرسانو قلب بيدق وفاء
ويتفانوا في حب الشعار
جمهورو في التشجيع أبان
في كل حوبة وإنتصار
شمس الرياضة الضاوية نور
عزم الصمود القلبو حار
يا بصمة الدم في العروق
أزرق مع أبيض بحوق
يا مارد أفريقيا الصعب
بين العرب زاهي الشروق
كل ما تواجه تنتصر
لي نصر تاني يجينا شوق
ما أصلو قمنا على الشعار
بيقولو ديمة هلالنا فوق
بيقولو ديمة هلالنا فوق
**********************
أرفع رأسك فأنت هلالابي .. أرفع رأسك فأنت سيد البلد .. أرفع رأسك فأنت حبيب البلد .. أرفع رأسك فأنت مارد أفريقيا .. أرفع رأسك فأنت هلال الملايييييييين
التحية والتجلى والعزة والشموخ .. للهلال العظيم .. الهلال الكبير .. هلال السودان .. والزعيم الأول للكرة السودانية .. وقاهر الوصيفاب .. الفريق الذي لا يهزم أبداً في قلعته ووسط جمهوره ..
لو ما كنت هلالابي .. وا أسفاي .. وما مآساتي .. وا ذلّي ..
دوري الأندية الأفريقية للأبطال .. هو منافسة الكبار .. الكبار فقط في القارة الأفريقية .. وليس لأندية الصف الثاني .. فلا مكان لصغير وسط أندية الكبار .. ولا مكان لمتذيلي المجموعات ..
اليوم أنا أطلب من أي مريخابي أن يعود إلى رشده .. ويتوب توبة نصوح .. وأن يعلن هلالايته بصورة قاطعة .. فالمستقبل هو الهلال .. الهلال الكبير .. هلال السودان .. سيد البلد .. وسيدا .. وسيد أبوها .. هلال الملايييييييييين ..
فلا بديل للهلال .. إلا الهلال ..

طبعاً حدة الزعل بدأت تخف .. و أكيد اليومين ديل ناس الهلال بكتبوا بى مزاج عالى .. و نتمنى عودة الهلالاب الزعلانين " أقصد المريخاب " للكتابة .. فلا يسعدنا هذا الصمت الرهيب من المريخاب أمثال الأخ المدير العام و سراج و طلال و ود قراى و معاويه و حسن عطا المنان الذين كانوا بين الحين و الآخر يحاولوا إغاظتنا بالصفر الدولى ..

و لا نستطيع يا الدحيش أن ننكر أن لا هلال بدون مريخ و لا مريخ بدون هلال .. و الهلال و المريخ هما وجهان لعملة واحدة .. وذى ما شايفين أعلى المنتدى صورة جميله فيها هلال رمضان معاهو المريخ .. لزوم الترضيه طبعاً .. و الكورة غالب و مغلوب .. و يوم ليك ويوم عليك ..

فلن ينتصر الهلال على المريخ إلى الأبد .. و لن ينتصر المريخ على الهلال إلى الأبد

و كل الكلام الذى نقوله هنا من باب المناكفات .. مثل هذا المسدار الظريف للشاعر أزهرى محمد على .. و أتمنى من الأخوان الشعراء امثال الأخ بخيت و سراج و عبده و الزين أن يردوا عليه..

مسدار الهمباته لى سيد الحيشان التلاته

‏اب احمد ولادك استوعبوه كلامك
متحرى الصدق مولاى يعلى مقامك
ابواب الكريم واسعه بتنفتح قدامك
خليه الحسود كان شكرك كان لامك

ابواب القيم نحن بنعلى مسيده
بكل احترام نختار اداره رشيده
فى كل اتجاه نحن بنجيد تسديده
وين بتقبلوا من سيدا سيد ابوسيدا

الليله الهلال هلا وسطع فى العالى
واصلنا الحساب فى حسبة المتوالى
اسفين ياوصيف والله خاطرك غالى
كان ممكن نزيد خفنا استقالة الوالى

كم كانت دروس فى المقبره اتخطاها
وكم خضعت رؤوس فى حضرتو وطاطاها
نيران المجوس اقدامو تتوطاها
والبدخل يكوس بنلحقوا امات طه

وياخوانا البلد بسيدا تحمد سيدا
حرسوها الرجال ديمبا وحموده وديدا
فرسان النزال فى الحوبه اخوان سيدا
والبين الهلال والنجمه حاجه بعييييده

مزقته الشباك تسلم خطاك يامعلم
وليك تعظيم سلام كل البلد بتسلم
انت سليل رجال من الكبار متعلم
العرضه انتشت لكن جنوبها مضلم

باريتو الظنون وهم الامانى الهشه
لا اتحقق حلم لا مغس الهلال انفشه
الممطوره كيف تتبالا من الرشه
ما قصمت زمان ضهر البعير القشه

تلعبوا فى عمود كبت الحقيقه وزورا
لملمتوا الشيوخ وعملتوا مجلس شورى
مسكين القعد فى ضلها المقصوره
كترتوا الغلاط ونسيتوا لعب الكوره

ومادرنالك الكنبه وقعاد الشاشه
والكوره التطير منعول كمان ابو خاشه
ايفوسا الفجع الصفوه وهرد فشفاشه
قوم سخن عديل ادخل مكان الباشا

ياخوانا الوصيف فضح البلد بعكو
يدوه الورق لايفتحو ولا يدكو
كاس افريقيا وين القلت قاطع شكو
شان طولة اللسان طبقنا حكم اب تكو

مابتصل الشباك فى استادو لو كان بتا
والروح يوم تروح واجب سترة الجته
جيب ورقك تعال نبدا الحساب بالحته
نفطر بالهلال والرويه سته فسته

بوظتوا النظام كسرتوا باب الشرده
وبطلتوا الكلام وحرتو ديك يا الحرده
ياخى حرام عليك ماكان بالمقاس يا ورده
دى الصفوه انزوت عملت شتات يافرده

ادمنتوا الغلب لمن بقالكم طبعه
افريقيا وعرب واللبعه فوق اللبعه
محمولات شنو بعد الغلب بي سبعه
والياكلو الاسد احسنلو من الضبعه

بارين الشكاوى اصبحتو وزن الريشه
قايلين الهلال ونسه ومجالس شيشه
زى سيرة الهلال بين الامم مافيشه
ماتقنع تقول منعول ابوها دى عيشه

كدى احسب معاى
نص وارغو ناقص مازدا فى أبو جريشه
كم بتساوى فى حسبة حساب الكيشه
ذى شكل الديوك فى الفارغه تنفش ريشه
ما عاشت بلد فى يوم تشجع طيشه

لو تصبح صفر نحن بنجيبك سالب
وما نصبت شباك تلقانا نحن الغالب
ارفع فى بناك تلقانا تحته عقارب
مانحن القدر والحصوه فوق الحالب

فرسان النزال دايما بسدو الفرقه
فى صدر الهلال باقين حصانه ودرقه
يلعبو بالخصوم لعب العصار بالورقه
واموال الوصيف راحت شمار فى مرقه

عدد المساهمات : 498 تاريخ التسجيل : 08/04/2009

عاشق الحتانة كتب:: وياخوانا البلد بسيدا تحمد سيدا
حرسوها الرجال ديمبا وحموده وديدا
فرسان النزال فى الحوبه اخوان سيدا
والبين الهلال والنجمه حاجه بعييييده

والله يا مجدي صحيح الفرق شاسع جداً والمسافة بعيدة جداً بين الهلال والوصيف ..
والهلالاب من شدة فرحهم .. تاني يوم من لقاء المقبرة .. كلهم جروا المكتبات وإشتروا (جريدة الصدى) .. عايزين يشوفوا (مزمل ابوالقاسم) ح يكتب ويقول شنو بعد الهزيمة القاسية دي .. لكن كانت المفاجأة .. مزمل أبوالقاسم لي يوم الليلة بشكر في الهلال ..!! ما عرفنا الحكاية (غيظ) .. وللا (توبة) .. وللا (إقرار) ..
على العموم ناس سراج وبخيت والصادق وطلال وخالد الشيخ والسمؤل وغيرهم من الوصيفاب .. أظنهم زعلانين وحردانين المنتدى عدييييييييييل ..

الفرح الهستيرى ،،،،،

لاتاسفن على غدر الزمان لطالما رقصت على جثث الاسود ذئاب
لا تحسبن الذئاب برقصها تعلو اسيادها تظل الاسود اسود الذئاب ذئاب.......
،،،،،،،،،،،،،،،،،،،،،،،،،،،،،،،،
مبروك سيد اللبن ،،،
عفوا ..... كما يحلو لاهل الصفر الدولى الكبير سيد البلد،،،،،
ولكن،،،،،
هذا هو حال الكبار
يوم غالب ويوم مغلوب
يوم في أرضك تدمر الأعداء بالستات،،، ويوم تهزم من الأعداء....
يوم تسافر تجيب كاسات ويوم تسافر تجيب سبعات......

نحبك يامريخ

ونهواك
وسنظل نهواك

والحمد لله الذي جعلنا من ابناء القلعة الحمراء ...

هارد لك ايها الزعيم الكبير.....

ولا عزاء للصغار،،،

،،،،فرح الغلابة ،،،،،،،

أكتر واحد مريخابى يعجبنى هو الكاتب حسن محجوب .. راجل دمو خفيف و روحه رياضيه ..

ما زيكم إنتو يا ببغاوات .. ما عندكم كلام تقولوهو غير كلام سيد جرسه الكضاب .. سيد كبت الحقيقه ..

شوف حسن قال شنو ....

* بلغت المهانة بالمريخ أن يطلق علينا إيفوسا رصاصة الرحمة !

* النصيحة ليك يا الله الغلب حار ..

* الأحر أن قلق زرع الأمل فى نفوسنا الكانت منشرحة!

* و بصراحة الماضاق حرقة الحشا يشاهد هدف عمر بخيت فى الإعادة .

* أجعص مريخابى اتسحر بتمرة .. أنا شخصياً الموية ( الزرقاء ) فى تلتلة !

*خالد عز الدين قال بقيتوا مساكين !

*مساكين الهينة دى .. فى قعر الحيط ..

** إنتهى كلام حسن **

**********

إنتو يا مريخاب إتسحرتو بى شنو ..

انشاء اللة يا مجدى بعد فصاحة الهلالاب الكل طموحهم انو يغلبوا المريخ ،،، انشاء اللة تجيبوا الكاس وما تجونا فاضين زى كل مرة ... وماتقولوا الحكم .. والبلنتى ... وطردوا فلان، لكن مرمى اللة ما بترفع ..
فرح الغلابة،،،،،

الكاس كاسنا .. نحن أهلو .. و بنستاهلو ..

لكن يا خوى البلنتيات .. و الجرسه .. و وارقو المريخ حارقو .. دى حقتكم إنتو ...

قال ليك واحد مريخابي مرتو ولدت جابت تلاته يوم مباراة الهلال و المريخ، جاتو نسيبتو قالت ليهو مبروك التلاته، قال ليها عليّ بالطلاق التاني اوف سايد .

عدد المساهمات : 14 تاريخ التسجيل : 12/07/2009

المريخ العظيم
المريخ كوكب زينة للكون
الهلال نورهـ يا خلاى يطشش العيون
المريخ زعيم يا مجدى والغيرة دون
حامل الكاسات امجادو علينا مابتهون
صاحب صولات وجولات يوريك فى الكورة فنون
أفرحوا ياغلابة أصلو الحزن فوكم من زمان مركون
وين أمجادكم صفر ثم صفر والآن الصفر مضمون
افرحوا قليل فان مصيركم محزون
المريخ ماهو التور ان وقع فوقة السيف مسنون
نهواك يا المريخ منتصر نهواك مهزوم
نهواك حامل الكاسات فى العز تعوم
نهواك انت فى استراحة محارب حول نفسك تحوم
كم انت عظيم يا المريخ اصلو العظمة للنجوم
بها نهتدى
ولو تابعت الهلال يامجدى تروح وسط الخرطوم

ذوالفقار الامين ( مكتبة المجرة )

4 / شوال1430

اولا مبروك للهلال التاهل وعقبال الكاس ... المصيبة اذا شلتوا الكاس تانى حا نقول لكم شنوا .. المهم تشيلوا لانكم اجتهدتوا وما عندكم مشاكل داخلية زينا ... والمريخ هزم نقسه لان الغيرة على الشعار انتهت وتحس كان اللاعب وصل مرحلة وممكن يعمل اى حاجة وما فى زول يسالوا عشان كده اخدوا الكروت الحمراء فى كل لعبة ..ولكن انا متاكد انوا المريخ سوف يعود يوما فارسا كما كان ونقول لخالد الشيخ وطلال وسراج ان الهلالاب لهم يوم وهم يرونه بعيدا ونحن نراه قريبا ... والمريخ مريخ ياهلالاب ...

يا حسن ، قالو فى الامثال عنتر قتلة اعمى ،،،

عدد المساهمات : 14 تاريخ التسجيل : 12/07/2009

كل البلد حزنان
نحن الصفوة فى السودان
انجاز واعجاز عالين شان
والينا رزين وفهيم لى هذا الزمن سلطان
دور الثمانية وصلناهو خدمة يمين وعرق جبين كمان
الليلة كل البلد على الزعيم حزنان
اصلو دا حال الكورة الما ليها امان
بتشيل الزعيم بتخلى الخملة فى الميدان
كم رتع الذئب شبعان
مات الاسد يا الدحيش جيعان
كل البلد على الزعيم حزنان
ياالاهلة واجبة عليكم غسيل اقوان
معروف تاريخكم بى الرشاوى وسخان
اثين اطناشر خير برهان
ابليس من فعالكم وقف حيران
الكورة نزاها الكورة امانة ماهى مصارعة تيران
وين انجازكم معلق خيط العنكبوت فى الجدران
نحن تاريخنا معروف بى الكاسات مزدان
كرمنا فى القصر الجمهورى بى النيشان
بس انتوا من بعيد تشوفوا الديدبان
اصبر ياحسن ياعبدو ياطلال يا ابو عثمان
اصلو ديل فاقد شى فاقد الشى طويل لسان
قولوا للدحيش اصح افتح الاضان
بكرة ياما تحصل فضايح يفرتقوكم بى البنبان
ياما تجكلبوا جكليب ماكم ناس ثبتة معروفين من زمان
الخوف تطفش من البلد حردان
الخوف ثم الخوف يوقفونا من اللعب فى كل مكان

عاشق المريخ ذوالفقار الامين محمد احمد

» معالم في البلد
» رجع البلد بعد السنين
» سيد البلد .. بطلاً للدوري للممتاز