كتََرت الطلة
لامن مسخت على خلائق الله
قلت أقيف ...
أشوف الناس بتكتب كيف
وأتعلم حرف حرفين
من ناجى وسراج الدين
وأفضل أتوه
مع همسات
أخونا الزين
وأشوف ود ماجد الفنان
وأعيش اللحظة منو حنان
لى ضل عليفة فوق القيف
وأسرح بس شوية وأدوش
مع دراش ...
أدخل وأقعد فى ضرا الدانقة
وأمرق زى ولد نفاش
وقفت كتير....
زى سخلا مرق من بير
وإدردق ملاه الطين
وإذكرت بندر شاه
وود علوى
وأخونا أمير
وزرت أخونا ود رجبة
غشيتو كمان محمد خير
وفى الأخير
ود الصول
عليك الله
أكتب كلمة فى الإيميل
لليهم سنين وسنين
وللغابوا وماظاهرين
لى ود طيبة والعاشق
ولى واحد بقولوا عليهو سيف الدين
وبعد شهرين ....
وحاة الله ...
ماشفناه يمين
أبو التومات عماد الدين
ود الصول عليك الله
أكتب كلمة فى الإيميل
لى ناساً كتير زينين
ناس رايعين ........
ناس حلوين........
ياهيثم وين بالله
ليك مده ...
والسنده
غرامو غريبة يرتد
بعد مانارو تشتد
وياأيمن غيابك شايفو إمتد
ووين يادحيشنا يارائع
أقول ياإخوانى إيه جد
وباب الريده ماإنسد
ويانادية ...
إزيك ؟
ووين نازك؟
ماسوت ملاح الروب .؟
وماقدرت تخت السلطة فى الماعون ؟
وماعرفت تعوس الكسرة بالطايوق ؟
ويانادية ..........
عليك الله ....
وين هادية ؟
ماقالت مابتعرف شفا الحنقوق !
طلال والله كلك زوق
عاشق النجمة زوقك فوق
وياخالد ود الشيخ
عليك الله
أظهر وتوق
وعاين للنجوم الفوق
مابتشبه
رمال حلتنا .......
جبال حلتنا.........
قمارى الحلة
لمن فوق شجيراتن
يسون قوق
أخو الإخوان وود العم
كتير والله مشتاقين
وينا أختنا ........
والتانين........
مجاهد لينا منو سنين
ومهند أصلو مابى يبين
نزار بالله وين الخال ووين ناجى
صحيح لى دارنا مافاضين
وعاملين فيها تغيانين
حسن معليش .......
أقولك أيش.......
أقبل عذرى لومافيش؟
حبى بختوا ليك بقشيش
عادل إشيقر......
وأبو ريناد...
وأختنا وداد
شوقن زاد
لى بلداَ
حنينا حصاد
تشوف أولادا ناس عالين
فى كل مواقع الدنيا
ساس وعماد
هالة وإيناس
وزول وناس
كم حبوه كل الناس
إسمو بخيت وأبوه الحاج
عامل لينا كم نفاج
مرة نزور فريق أمبور
ومرة على فريق قدام
نخش الروب
نسوى الويكة
نعوس الكسرةفوق الصاج
وأبداَ لينا مو محتاج
وخلف لينا أحلى مزاج
معاه مشينا لى مرقنبوا فى بيتوا
كتبنا قصيده فى كم باب
لعبنا الكورة بالشراب
وعشنا مع الجميع
أحباب ...
وكتار والله
ناس رائعين
ماسميتم .......
إلا مع النبض ماشين
وفى خلج القلوب عايشين
ودعتكم الله ياحلوين
ياقاعدين......
وياغايبين.....
وعليكم الله لو يومين
فى كل أسبوع
نتسالم........
ونتقالد.......
ونتونس
عليكم الله
بس يومين
نعزى بعضنا فى الأتراح
لو مات لينا زول غالى
نهنى بعضنا فى الأفراح
نسير زولنا بى فال العديل والزين
عليكم الله ياحلوين
عليكم الله ياحلويييييييين
ومن الحتانة سلااااااااااااااام
أبو عروة الزبير محمد أحمد( مكتبة المجرة) 16/ رمضان