اجمل رأى حول المنتدى

منتدى قرية الحتانة...
الناظر الى العنوان يقول ماذا خلف الاكمة...
ما كنت متخيلاكم بالكسل ده يا شباب يا العليكم الرجاء يا شيالين التقيلة .
شبكتونا الحتانة الغاليية وكمية من عبارات الحنين والحنان اتاريهو كلام لسان ساكت.

ودايرين نعمل مكتبة كلام زى الزبدة ولا كلام الليل يمحاهو النهار.



اذا عندكم رأى فى حاجة معينة قولوا الكلام ده فى المنتدى ومن خلال اى باب ادخلوا وقنبوا فى الضل وقولوا الفى نفوسكم وفى ضمايركم لكن
ما تقعدوا فى الضرا وتختفوا وتقولو نحنا من اعضاء المنتدى . البلد ما عندها غيركم والمنتدى انتوا اولادو ولو ما ختينا ايد على ايد تأكدوا انه ما ح يلقى لا البكتب فيهو ولا حتى البقرى المواضيع الفيها....

دايرين الجاهز لكن ما دايرين تتعبوا شوية
كلنا عندنا مشاغل ومشاكل فى الشارع فى الشغل وما عندنا وقت
لكتير من الاشياء وبالرغم من كده عندنا امل وطموح..

لكن انتو يا اولاد الحتانة:_
اول ما قالوا ليكم فى رحلة اتكتفتوا واتحزمتوا وقومتوها فى نهار يوم وين المروة يا ابو مروة الحقنا وانجدنا.

ليه التخاذل ده يا متخاذلين.

كيف دايرين الحتانة تكون فوق النجوم او علم يشار اليه بالبنان ويكون منها وزراء وفريق كرة قدم عريق واصيل . وانتو المنتدى ما قادرين او بالاحرى ما دايرين ترفعوهو.


ح نبنيهو ح نبنيهو البنحلم بيهو يوماتى....


بطريقتكم دى. ها ها ها ها .

ما حتتحركوا قيد انملة وما ح تمشوا ابعد من تحت رجليكم.
وعندنا الجمعية الخيرية يا خوفى يكون دوركم وتمثيلكم فيها بنفس المستوى والتخاذل المتدنى ده والاعتماد فيها على فئة معينة.

ولا الجمعية ح تشتغل من نفسها.

ارموا الاتكالية وكل زول يظهر نفسو ويحاول يرفع من ناحيتو قبل ما نقع وما نلقى البرفعنا

تشوف الاعضاء تقول ما شأ الله.

تشوف المشاركات لا حول الله يا معين تعين..
مالكم؟؟؟؟؟؟؟؟؟؟؟؟؟؟؟؟؟؟.
لو بتنوم الساعة عشرة مالو نوم عشرة ونص ادى نص ساعة للمنتدى وافتكر يوم الجمعة والسبت بتلقوا فيهم وقت كفاية للدخول للمنتدى.

وذى ما قالوا:كــــل ما نقول قصرنا اللـيلة يطلـع باكر ليــلاً أطــول
كــــل ما نقول خففنا الشيلة تطلع شيلة باكر أتقل
بس نتحمل و نصبر و نأمل إنو الجايي صباحاً أجمل

بدون تعليق

الأخت نادية ... والاخوان الاعزاء ....رمضان كريم وتصوموا وتفطروا على خير ...وربنا يتقبل الصيام والقيام إنشاء الله ...
الاخت نادية ..لكي العتبى حتى ترضي ...ونرجو المعذرة في الغياب الغير مبرر ..ولكن لنا اسبابنا الخاصة التي منعتنا في الفترة الماضية ...وارجو ان تقبلوا اعتذارنا ..ونعدكم بمواصلة المسير معكم ....
ودمتــــــــــــــــــــــــــــــــــــــــــــــــــــــــــــــــــــــــــــم ....

ان شاء الله يا ياسر .

طالما الهدف والغاية واحدة..

والايد الواحدة ما بتصفق...
واعذرونى اذا كان كلامى شوية حار....