عادي (كلام لواحد سوداني يرثي الجيل الجديد)

كل شيء بقى لينا عادي لأنو كل شي بقى في الدنيا عادي
كان زمان لما الكبير يقول يا.... تلقى الصغار كلهم جروا قبّال ينادي
هسى الصغير لمن يقول يا.... تلقى الكبير هبّ بروح رياضي
أصلو الكبير بقى كبير بس بالأسم, أهم شيء إنو الصغير يبقى راضي
زمان كان الصغير لو كتلتو ما يولع سجارة قدام كبير, هسى بقى عادي
البنقو عادي, الخمرة عادي, البدرة والجنس وسهر الليالي كلو عادي
ولأنو اختل كل شيء حتى اللغة, كلمة غلط بقى المرادف بتاعها عادي
تمرق الواحدة مع واحد ما بتعرفو, يمشوا شقة كلها شباب, عادي
تلبس محزّق, تلبس ملزّق, تلبس مفتّح, تلبس منفّخ كلو عادي
تسألها أو تكلمها إنو لبسك, إنو شكلك, تقول ليك إنت جادي؟
والله قصة بردون ميي شكلك فاضي
شوف زي ده جاينا من زمن حتشبسوت وعامل فيه قاضي
ماليك دخل بي لا إنت البوي فرند بتاعي ولا إنت دادي
وفي المجالس تلقى كل أب وكل أم يحكوا قصص تبكي الحبايب والأعادي
الولدو مدمن, والبنتو حملت, والضاربو ولدو, والصحى من النوم لقى ولدو بقى اسمو هايدي
كنا زمان الواحد يسمع القصص دي ويقول ربنا يبعد الشر عن بلادي
هسى لو تكون وين وين ما تكون الخطر صبح جماعي بعد ما كان احادي
لو تكون جعلي, محسي, دنقلاوي, نوبي حلفاوي دينكاوي شلك زغاوي نوير مسلاتي شايقي بديري مسيري فوراوي بني هلبه تكون خرطومي من حلفا من نمولي شرقاوي غرباوي جنوبي شمالي اسود ابيض ولو حتى كان لونك رمادي
الخطر خلاص دخل البلد والكل لازم يحارب وابداً ما تكون حيادي
خلي يكون ليك موقف, إلا إذا كنت بالعادي راضي
شوفوا الكان دار للأيتام بقى دور وما فيها ركن فاضي
ولا دور المسنين, يا أخوانا ديل كبارنا, ولا لاحياة لمن تنادي
ديل الربوا وكبّروا وعلّموا وكان في يوم دورهم قيادي
كده خلاص دورهم انتهى ولازم يموتوا عشان نعيش بشكل هادي؟
لكن يا غبيان الدور جايك ارجى الراجيك جهّز ليك ركن فاضي
الديّان لايموت بل راسك أقيف في الدور وابقى راضي
دى جيل لا عندو صغير لا عندو كبير الحساب عندو مادي
الأبو دورو بس يشتغل وبالقروش يملا الأيادي
الخدامة (عفواً الأم) بعد الطبيخ السكوت عن كل شيء ماهو عادي
ودى شيء عادي
أما الأقارب فهم العقارب وهم الد الأعادي
والأصحاب هم الأحباب وهم اليهم الروح تنادي
ويا ويلك لو جبت سيرة عم أو خال ده يكون يوم موتك وإنت راضي
ويا ويل ويل ويلك لوجبت سيرة صاحب أو صاحبة بشكل سادي
تكون على نفسك إنت الجاني واستحمل من فلم (قلاديتر) عرض إفتراضي
يعني ممكن كف ممكن بونية شلوت أو تشابك بالأيادي
ولو كان مؤدب شوية, دعوة في ظهر الغيب,الجلك يتلحس عشان البيت يبقى هادي
ونملأ البيت بالجكاسي وقعدات سمر وشيشة ونقلب بيتنا نادي
دى جيل فرط في دينه, وحتى الكافر فلنتاين عملوا منو بطل صاحب مبادي
ياأخوانا وين الغلط؟ وين الخلل؟ الرد لازم ما يكون احادي
تكون المشاغل والجري ورا القروش خلاهم في وادي ونحن في وادي
ولا يكون ده لحم نبت من سحت والنار لازم تنزل عليو تهادي؟
اصحوا يا عالم العلة في العولمة وبالعمل نعمل مبادي
واللقمة الحلال ولو كانت شوية البركة فيها والله هادي
نجنب اولادنا الجحيم والعدو ال ليهم بينادي
عشان بكرة ما يكون مصيرنا لدار رعاية وللعيال نقعد ننادي

مشكور اخى مجتبى.

كلام كلو صحيح وحقيقى.

تقول بنونة بنت المك:

متين يا على تكبر تشيل حملي ..
اياك على ا لخلاك أبوي دخري ..
للجار والقريب الكان أبوك بدي ..
للغني و الفقير الكان أبوك بِحَجِي ..
للقوي و الضعيف الكان أبوك بحمي ..
لا تعاين الوجوه ...

التمنى ان ترجع الحياه ذى ماكانت.
الفرق بين الغلط والعيب والصاح والكلام والفعل المباح

والوعى بين الجن الفايت الحدود والنصاح.