هل منكم من رأى جنيا او شيطانا رأي العين؟؟.

هل الجن يتمثل في شكل الإنس ؟. أم يتمثل في شكل الحيوان ؟. أم يتواري فقط في الظلام ويصدر الاصوات ولا يُري بالعين ؟.
أنا شخصيا لا ادري .

هل منكم من رأى جنيا أو جنية في أي شكل من الأشكال؟.

أنا شخصيا لم أري أي جني ولا شيطان , لا في شكل إنسان ولا حيوان ولا حتى سمعت صوت واحد منهم , مع إننا ونحن صغار سمعنا كثيرا من الحكاوي عن المناطق المسكونة بالشياطين في الحتانة لدرجة أننا حفظناها وكنا نتجنب المرور ليلا بها , وحتى تاريخ اليوم في منطقة في الحتانة أنا أحاول دائما أن أتحاشي المرور بها بالذات عندما أكون لوحدي و يكون الظلام شديدا و ما في قمر , وهي المنطقة الواقعة بين جبل الحننة وصالة النقر . ومن المناطق التي سمعنا إنها مسكونة ودائما كنا نتحاشاها لالوبة صالح , ومنزل عثمان عبد السلام , والشجرة التي بالقرب من صالة النقر , وأيضا سمعنا عن الشيطان أبو لمبة الذي يضللك ويوهمك انك ماشي في الطريق الصحيح إلي أن تجد نفسك علي قيفة البحر , ويكون غالبا موجود في المنطقة بين قرية الكتواب وقرية الضيقة , وبالرغم من إننا ذهبنا كثيرا في تلك المناطق بالليل خاصة عند نقل خبر وفاة أي احد من القرية إلي أهل الضيقة إلا أننا لم نشاهد هذا الشيطان أو غيره , وأيضا في شيطان كنا نسميه أبو جنازير أو ( شيطان البردبة ) , وهو عبارة عن صوت أقدام حمار جاري وصوت كشكشة جنازير ويسكن في المنطقة بين بئر جدي مصطفي وبئر ناس ود سعد , مع انه عدد من أولاد الحلة قالوا إنهم سمعوه إلا أنني لم اسمع ذلك , و بالرغم من كثرة مشاويرنا بالليل داخل شوارع وأزقة الحتانة إلا أننا لم نري بها أي شيطان أو حتى سمعنا اصواتا غريبة أو مخيفة , حتى أصبحنا نعقد أن هذه القصص التي تُحكي إلينا عن الشياطين هي مجرد روايات من نسيج الخيال , ولو جلست مع عبد الرحمن زوفة يوهمك انه الحتانة عبارة عن معسكر للشياطين ولو عاوز تشوف واحد هس يجيبو ليك من ضنبو .

سمعت احد الشيوخ في احد المحاضرات يقول إن الجن أو الشيطان لايمكن رؤيته في الدنيا بالعين , واستدل علي ذلك بقول الله تعالي { يراكم هو وقبيله من حيث لا ترونهم } . ولا ادري مدي صحة تفسيره لهذه الآية .

طبعا نحن سمعنا كثير من الروايات التي تتحدث عن ناس شاهدوا شياطين في منطقة الحتانة أو المطمر ولكن اغلبها كانت مجرد تهيآت لا ترقي إلي التصديق , ولكن من أشهر الروايات التي سمعناها من بعض المصادر التي يمكن أن تكون صادقة أو من الأشخاص الذين حدثت معهم هي ما قيل لنا عن أن الباقر الشيخ علي – عليه رحمة الله – رأى مجموعة من الجن يصلوا جماعة في الليل تحت الشجرة التي بالقرب من صالة النقر , ولكني لم اسمع هذه الرواية من الباقر شخصيا حتى أتأكد من مدي صحتها .

أو ما سمعته من عمي سليمان – عليه رحمة الله – وكان قال انه عند مرض جدي عمر – عليه رحمة الله – جاء عمي سليمان من الخرطوم بالقطار بالليل ونزل في محطة المحمية وسار المشوار لوحده برجليه من المحطة إلي الحتانة , وانه لم يصادفه أي شيء يذكر , حتى في حجار كرم الله والتي اشتهرت بأنها مسكونة بالجن , ولكن عندما وصل مقابر المطمر وبالضبط في الخور الصغير الذي يفصل بين المقابر ومدرسة المطمر مقابل الكبرى شاهد عجلاً يرعي في تلك المنطقة , مع العلم بأن هذه المنطقة لم يكن بها أبقار في تلك الفترة , وقال انه سار في طريقه دون أن يتعرض احدهم للآخر .

أما الرواية الأخيرة حصلت مع أبي والتي أعتقد أني قد سمعتها منه شخصيا , وحصلت معه خارج الحتانة , بالضبط تحت شجر السندة , وسندة المطمر طبعا كان ليها صالتين , صالة للوصول وهي مجموعة الشجر التي تقع خلف منزل علي حامد النعيمة وكان يتوقف عندها القطار القادم من الخرطوم , وكنا نستقبل عندها القادمين , وكان علي حامد دائما جاهز بالتاكسي ( الحمار ) لتوصيل أمتعة القادمين , وصالة مغادرة وهي مجموعة الشجر التي تقع بجانب منزل حسن عماري وكان يتوقف عندها القطار الذاهب إلي الخرطوم , وكنا نودع منها المسافرين .

يقول أبوي انه حبوبتي حواء – الله يرحمها - كانت قادمة من الخرطوم بعد أداء مناسك الحج في مكة المكرمة , وتقريبا كانت جاية في قطر العمال , وقطر العمال كان يأتي دائما يوم الخميس ليلا من الخرطوم متجه إلي عطبرة , وقال أنا نبهة ناس البيت انه ما في أي حد يلحقني في السندة , واخذ معه لمبة أو بطارية وذهب إلي السندة , ولأنه الوقت كان وقت شتاء والجو بارد قال جلست تحت حائط زريبة علي حامد , والظاهر انه القطر تأخر شويه قام نعس و أخذته غفوة , وهو بين صاحي ونائم شاف امرأة من بعيد ماشة عليه , وتراءت ليه كأنها أم سهمين – عليها رحمة الله – قال قمت من مكاني واتجهت ناحيتها عشان أقول ليها أنا قلت ليكم ما في حد يجي وراي , وفجأة تعثرت قدمي , وكالعادة الواحد في حالة زي دي يقول بسم الله , وفعلا قال قلت بسم الله فاختفت المرأة من أمامي , فعندها قلت في نفسي من المحتمل أن تكون شيطان . ولكن بالرغم من ذلك ظل منتظرا في مكانه حتى جاء القطار واستقبل حبوبتي وذهب معها إلي البيت , ولكنه لم يري المرأة مرة ثانية .

أنا شخصيا لم أري شيطان ولا جان , ومن الأحسن أن لا يصدق الإنسان إلا ما يري بعينيه , فهل منكم من رأى شيطانا .

الرواية دي حكاها لي احد أخوانا الأعزاء , وهو من الأصدقاء القليلين جدا الذين استمتعن بصحبتهم في مدينة الرس , ويدعي إبراهيم فضل المولي , وهو من منطقة تقع جنوب جبل أولياء تدعي ( أم دليبة ) , وكنا نجلس بعد تناول وجبة العشاء في مسطبة أمام بقالة علي الشارع العام ونشرب البيبسي وهو يحكي لي الحكاوي , وهو حاكي بارع جدا وأنا مستمع جيد جدا .
قال لي انه كان موجودا في مناسبة عزاء في قريتهم , وكان من ضمن المعزين رجل يدعي ( بامسيكا ) والاسم قد يكون مألوف لكثير منكم , فبامسيكا هذا هو واحد من أشهر(الهنباتة) في تاريخ السودان , وكان يمثل احد أضلاع مثلث الهنبتة المشهورين , وهم ( بامسيكا ) ( الطيب ود ضحوية ) (حسن ود جمرة ) إضافة إلي رابعهم ( طه الضرير ) , ومهنة الهنبتة في اعتقادي الشخصي قد تكون اشرف من مهنة السرقة , لأنو الحرامي بيسرقك بدون علمك أو حتى يتيح ليك الفرصة عشان تدافع عن ممتلكاتك يعني هي حرفة الجبناء , أما الهنباتي بيأخذ حقك عيني عينك ورجالة , ولو أنت شجاع تدافع عن حقك , إما ترد حقك أو تموت دونه أو تستسلم وتتركه للهنباتي .

قال لي بعد بامسيكا ما قدم واجب العزاء وارتاح فترة من الزمن تجمعوا حوله جميع الموجودين في الفراش وطلبوا منه أن يحكي ليهم شيئا من مغامراته الكثيرة التي عاشها أثناء فترة مزاولته ( للهنبتة ) , فقال ليهم أنا مرت علي حكاوي كثيرة جدا لكن حا احكي ليكم اغرب حكاية حصلت معاي .
قال كنا نحن ثلاثة أصحاب , أنا وحسن ود جمرة و الطيب ود ضحوية , وكنا بنتفاخر بي انجازاتنا في الهنبتة , وقلنا الراجل فينا يجب الإبل ( أم حجول ) وهي ابل نادرة جدا ويوجد في أسفل أرجلها حجول , فكل واحد فينا اتجه إلي جهة , وما جابها مننا إلا حسن ود جمرة , وجابها من كينيا , وجميع الإبل ( أم حجول) الموجودة في تلك الفترة كانت من سلالة الإبل الجابها حسن ود جمرة .
قال أنا اتجهت إلي جهة البطانة وقلت لازم أجيب الإبل دي حتى لو وصلت الحبشة , وقال كان سفرنا عكس الناس , الناس بتسافر بالنهار وتنوم بالليل , أما نحن كنا نرتاح النهار ونسافر بالليل , ونادر جدا نسافر بالنهار إلا لي ظروف خاصة , وأثناء ما أنا ماشي في ارض البطانة والدنيا ليل قلت ارتاح شوية واشرب شاي وبعد داك أواصل المشوار , والمنطقة النزلت فيها أنا اعرفها تماما وعارف انه ما في أي ناس ساكنين فيها لا ناس مقيمين ولا عرب رحل , وبعد ما ولعت النار و شديت الشاي شميت ريحة عطر نسائي ملاء الوادي كله , وأنا احترت جدا العطر دا جاي من وين لأني عارف انه ما في أي ناس ساكنين هنا , وبعد شوية شفت زول ماشي ناحيتي من طرف الوادي , وأنا طبعا دائما بكون جاهز ومعاي بندقية ( خرطوش ) ومسدس وسيف , وكنت مستعد لأي ردة فعل , ولما وصلت طلعت إنها امرأة , قالت السلام عليكم , أنا رديت عليها السلام وقلت ليها تفضلي , وكان في حجر كبير جنبي جلست عليه , قال أنا في حياتي كلها ورغم سفري الكثير ورغم الظلام ما شفت امرأة جميلة زي جمال المرأة دي , بعد داك قدمت ليها الشاي وأديتها تمرات من عندي , قبلت مني علي الجهة الثانية وما عارف هل شربت الشاي وأكلت البلح أم لا , وردت لي الكباية فاضيه , قمت سألتها من وين في الأهل , قالت لي نحن ساكنين قريب , قلت ليها في تنبول , قعدت تضحك وقالت لي لا نحن ساكنين في طرف الوادي هنا , قلت ليها أنا عارف المنطقة دي كلها ما في أي ناس ساكنين هنا انتم سكنتم جداد , قالت لي نحن ساكنين هنا لينا سنين طويلة , بعد داك أنا الشك بدأ يساورني , قلت ليها عليك الله إنتي إنسية والا جنية , قالت لي أنا والله جنية لكن مسلمة , في اللحظة ديك الخوف دخلني , لأنها لو كانت إنسية مقدور عليها لكن الجنية دي يكاتلوها كيف ؟.
بعد داك قالت لي نحن شفناك قبيل وأنت جيت شاقي حلتنا وما تعرضنا ليك وقلنا انك عابر سبيل , لكن لما شفناك قعدت في المكان دا خفنا منك وقلنا يمكن تكون من ناس القرآن تقوم تقرأ علينا القرآن وتحرق أخوانا الكفار الساكنين معانا , لأنو نحن الجن بنختلف منكم بنسكن كلنا مع بعض وما في فرق بين كافر ومسلم , يمكن البيت تلقي فيه كافر وتلقي فيه مسلم ويكونوا عايشين مع بعض بدون أي مشاكل , وأهلي رسلوني ليك عشان استفسر منك , ومعاي اثنين من أخواني منتظرني في طرف الوادي , قال قلت ليها والله أنا ما لي أي دخل بي ناس القرآن وأنا راجل هنباتي قاطع طريق , ونزلت في المحل دا عشان ارتاح بس وهس قايم ماشي خلاص , بعد داك اطمأنت ومشت لي أهلها وأنا لميت حاجاتي واصلت طريقي , لكن من اليوم داك إلي تاريخ اليوم أنا ما مشيت بالجهة ديك بالليل .

قال مرت الأيام والسنين , وأنا تبت من الهنبتة وققرت اني امشي مكة لأداء فريضة الحج , وفي الزمن داك ما كان في مخيمات ولا مباني في مني , وكان الناس بيرتاحوا في ظل الشجر , وأنا كنت جالس براي تحت ظل شجرة جاتني امرأة في متوسط العمر , سلمت علي وقالت لي ما عرفتني؟. , قلت ليها والله ما عرفتك انت منو ؟. قالت لي تتذكر قبل كم سنة كنت في المكان الفلاني وجاتك بنت شابة وقالت ليك كده وكده , قلت ليها فعلا الكلام دا حصل قبل فترة طويلة , قالت لي أنا البنت الجاتك وقالت ليك الكلام داك , جينا ومعاي مجموعة من أهلي للحج , وأنا مما شفتك عرفتك , عشان كده جيت اسلم عليك , وبعد داك مشت وخلتني .

مشكور يا أخونا عبدالعزيز صاحب المواضيع المميزة
أنا ح أجاوب على سؤالك بقصة حصلت معاي أنا شخصياً.
في سنة 2003 كنت شغال في شركة نستلة المعروفة وكان الشغل صعب شوية وبيتطلب إنو الواحد يكون في الشغل الساعة 4 صباحاً غير المجهود الجسدي والذهني في إقناع الزبائن وكتابة التقارير اليومية والأسبوعية والشهرية (يعني كان شغل بيتطلب إنك تكون عايش للشغل وبس) لذلك فضلت إني اسكن براي عشان اتفرغ لشغلي, وقد كان لقيت لي استوديو (غرفة مع مطبخ وحمام بدون صالة) وكانت في الطابق الأرضي في الشارقة, لما سكنت كان المفروض إنو البيت شامل الثلاجة والغسالة والبوتوجاز, لكن كان البوتوجاز علية حالة مايعلم بيها إلا الله, فكلمت المتعهد وقال لي مافي مشكلة ح نغيره خلال يوم أو يومين, بس المشكلة كانت كل ما يتصل بي بكون في الشغل,أخيراً اتفقنا إنو يخليهو قدام البيت ووقت ما اجي ب ادخله وحصل, وبعد ما دخلت البوتوجاز في البيت اليوم التاني أو الثالث إنتبهت إنو في أوراق في الفرن, فتحت باب الفرن ولقيت كمية من الجرائد وفي وسطها كتاب السحرالشهير (شمس المعارف) وكتاب تاني عن قراءة تعابير الوجه وعدد من الرسائل الغريبة وصورة لبنت سورية مكتوب خلف الصورة كلام غريب يصعب قراءته, بسرعة اتخلصت من محتويات الفرن ومن وقتها بدأت حاجات غريبة تحصل (علماً بأني كنت شتاء أوصيف بنوم بعد صلاة العشاء مباشرة) فبقيت بمجرد ما أرقد أول ما خلاص يكبس علي النوم وأكون في الزمن الغير محسوب بين النوم واليقظة أسمع صوت يشبه صوت إنتهاء شريط كاسيت في مسجل يدوي قديم زي طقة كده بس ما عالية أو صوت مفتاح نور قوي شويه, المهم كنت بقول دايماً إنو عادي لأني كنت خلاص نسيت موضوع الفرن علماً بأن الحركة دي بتتكرر في الليلة الواحة أكثر من خمسة مرات لكن في الآخر بنوم, بس بقيت دايماً نعسان وأنا في الشغل, فشكيت لواحد صاحبي الموضوع ده وحكيت ليهو قصة الفرن رغم قناعتي إنو مافي علاقة بين الأثنين, فنصحني الراجل بأني اجيب راديو وأشغل إذاعة القرآن الكريم طول اليوم ومن يومها والأصوات في زيادة(وأنا من النوع الشمّام جداً) فبدأت اشم كل يوم قبل النوم ريحة شخص (راجل) داخل الغرفة, ف أقول يمكن بره لأنو البيت في الطابق الأرضي, المهم بدأت الريحة تزداد وهي ريحة نفس الشخص بس كل يوم بيقرّب مني أكتر وبعد كم يوم بقت ريحة شخصين مختلفين, فقلت يمكن لأنو مابرقد وجنبي اليمين للقبلة, في أول يوم قررت انو ارقد على القبلة وأنا بقفل باب الغرفة حسيت اني بقفل الباب على شخص خارج الغرفة ودفعة الباب دفعته للخارج بشدة, المهم طنشت وقلت يمكن بسبب تغير الفصول الباب يكون اتنفخ شوية, ورقدت وبمجرد ما رقدت سمعت الصوت المن زمان بسمعه بس المرة دي وأنا صاحي, وبدأت تجي ريحة الشخص الأول بس شديدة شوية وبدأت اسمع صوت خطوات علي السجاد, وأنا بين مصدق ومكذب طلع الشخص على السرير لدرجة أني حسيت بميلان المرتبة من جهة وضع رجله الأولى ونط فوقي برجله التانيه وبدأت احس انفاسه في وشي, استمر الموضوع ده حوالي ساعة (وكانت أطول ساعة في تاريخي) بعد كده حسيت بنبرة الزهج في في انفساه وعرفت إنو الموضوع شارف على نهايته بس كيف ح ينتهي الله أعلم فقرأت كل كل الحافظو من القرآن وكل الأدعية البعرفها وهو ما اتأثر ابداً ولم يهتز له طرف (على ما أعتقد) المهم أخيراً وبعد طول انتظار قام من مكانه وبيدينو الأتنين ضغط على صدري بقوة متوسطة ونزل من السرير وبدأت ريحته تبعد رويداً رويداً لغاية ما اختفت, وطبعاً أنا ما نمت لغاية الصباح, بس الغريب في الموضوع إنو الصباح وأنا بلبس ماشي الشغل وبتذكر في الشيء الحصل وبحمد الله إنو ما في إي خسائر في الأرواح والممتلكات كنت بحس إنو الحكاية دي حصلت من فترة مش امبارح بالليل وما عندي تفسير للشيء ده, المهم (يا شباب طولت عليكم) في اليوم داك (وأنا زي ما قلت ليكم بنوم بدري) مشيت بيت خالي وقعدت معاهم لغاية الساعة 2 صباحاً عشان اجي البيت تعبان ومهما حصل ما ح أهتم وفعلاً بقيت دائم السهر لمدة اسبوع تقربياً اجي البيت استحمى وانوم زي الجنازة, بعد كده كان في واحد زميلي في الشغل سوري كان في إجازة ولما رجع ما عرف يسكن وين فعرضت عليه يسكن معاي وبدون مقابل مادي فوافق بشرط إنو ما اصحيو لصلاة الصبح وما أجبرو يشوف قناة الجزيرة طول اليوم فوافقت (طبعاً مكره أخاك لا بطل) وسبحان الله بدأت الأصوات والروائح تقل شوية شوية إلا أن اختفت تماماً وصاحبنا السوري إلى الآن ما بيعرف الحاصل بس مرتين تقريباً قال إنو احياناً لما يكون براهو في البيت بيسمع أصوات ما بيفهمها وبررت ليهو الشيء ده بأنه أصوات الناس في الشارع لأننا في الطابق الأرضي فعمل نفسو اقتنع وهو ما مقتنع المهم أنا مشّيت عليو المكنة ولغاية هسى ما عندي أي تفسير للحاجات دي, بس معروفة الإمارات بالحاجات الزي دي (نسأل الله العافية), وبالرد على سؤال اخونا عبدالعزيز الحق يقال أنا ما شفت بس في حكم الشفت , والله على ما أقول شهيد.
شيخ عبده رأيك شنو؟

انا ما بحب هذه السيرة لكن احكي ليكم الماشفتو....... اولا التحية للدراش والاخ مجتبي ومجدي والحيش في يوم عرس الاخ سليمان ود حسين ود عويضة يديه العافية مشيت اريح عند ناس خالتي زينت ربنا يديها الصحة وبعد ما سمعت صوت الحفلة بدت جيت ماشي من الجهة الغربية للسرايا وانا نازل من منحدر وما خاتي الخوف في قلبي ابدا فجأة التفت الي وراي شفت إمرأة لابسة ثوب بالي وشكلوا واضح ثوب حيران وهي من مشيتها تحكم عليها 62 سنة تقريبا . وقلت في نفسي ممكن المراة دي دايرة مساعدة للوصول للعرس وتاني طنشت مابين هذا التفكير الي ان ادرت وجهي ثانية من الزمن تقريبا وفجأة تجيني حجار بحجم حجارة رمي الجمرات وتضرب في الحيطة كمية مهولة ولمن لن يصيبني حجر ,,, ولفت الي وراي لم اري حد وقلت يا فكيك والكرعين تضرب في القفة ( الفقرة ) قاطعا السرايا غربا شرقا ولاول مرة اشعر بطول المسافة بالرغم لا تتجاوز 80 م تقريبا .... وانتهت ..... اما يا الدراش عن الحمار هذا صحيح ونحن رصدناه مخصوص حتي تاكدنا من صحة ما يقال ... بسم الله الرحمن الرحيم والله انا بكتب شعر راسي حاسي بيه عاملين ليه اسكشوار

يا جماعة الشيطان والجان عرفناهم فى حد بعرف حاجة عن ابو الكباس البخنق الزول النائم وهل هو شيطان ام ماذا .

شكرا جزيلا يا الدحيش على المعلومة ويا حسن على السؤال؟؟؟

شكرا على المعلومة الجميلة والجديدة ... لكن انا عندى تجارب كتيرة مع هذا الاسمه اب كباس وكان مكرهنى النوم. وتانى فى حاجة ومن انا عمرى 6 سنوات كان بجينى راجل فى النوم وبجرى جرى شديد وراى الزول ده ما خلانى الا عام 1998 بعد ان قال لى احد الشيوخ اقرا اية الكرسى واخر البقرة واخر التوبة والاخلاص والمعوذتين .. وبعد ان قرات هذه السور وبعد كم يوم حتى سابنى ولا يوم الليله ما جانى ... لكن ابو الكباس يجينى طوالى ومابقدر يمد ايدو على مهما كان ...لانه مجرد ما يحاول يمد ايدو على انا تلقائيا وانا نائم وبكل هدوء وبكل ثقة قاعد اقول ليه ياهوى انت ما حا تقدر تلمسنى لانك سلفا عارفنى انا عاوز اقرا شنو ... ومجرد ما ابدا باية الكرسى طوالى يمشى ... ويا اخوان اذا قراتم اية الكرسى قيل النوم ما حا يجيكم ... ولكم الشكر .

الأخ حسن تحياتي وأشواقي
مازلت أذكر وصية لي بقراءة اية الكرسي عندما يداهمني اب كباس
حقيقة الموضوع يثير حب الاستطلاع وهذا لما فيه من الغموض
انا لم اري شيطانا ولاجنيا لكني سمعت عن هذه الحكاوي كتير عن الشياطين في الحتانة والمطمر وفي كباري السكة حديد ولا ادري لماذا الكباري بالذات وفي بعض الأحيان تجينا قصصهم من سقادي غرب عن طريق سقرائنا (معتز ومحمد بدر الدين)لهم التحية,كانو بيحكو لينا عن شيطان غريب في سقادي اسمو ابو راس ودة ساكن في بيت مهجور بين سقادي والقوز أو في طرف القوز وهو عبارة عن راس بتاع زول بالليل بيطلع يقعد في الحيطة.وكذلك العروس التي تسكن في اللالوبة بين بابور الموية القديم والبابور الجديد غرب السندة.
أما أب كباس بدأ معاي من بدري في يوم من الأيام رقدت في المكان المخصص لمعاوية أخوي والظاهر كان اب كباس قاصد معاوية وماقدر يفرز بيني وبين معاوية لانو كان بيجي لمعاوية من زمن داخلية العالياب يعني في اوائل التسعينات وكان في الوكت داك كانو الطلبة في الداخلية متعارفين علي انو كدايس الداخلية شياطين وفي يوم معاوية ضرب واحدة من الكدايس ديل بحجر ومن يومها بقي يجيه اب كباس في شكل كديسة وكان كل يومين او تلاتة نحن بنصحي بكواريك معاوية ومايهدأ الا نضربو ونقولو قول بسم الله,المهم اليوم داك رقدت في مكان معاوية ومن يومها شبك معاي انا والغريبة برضو بجيني في صورة كديس اسود.قمت حكيت قصة اب كباس دي لحسن عطا المنان قام وصاني بقراءة اية الكرسي لما يجيني وسبحان الله الواحد بكون صاحي وحاسي بحركة الناس حولو لكن بحس كأنو مشلول.بقيت كلما يجيني أقرا ليه اية الكرسي يختفي
فلك التحية الأخ حسن علي هذه النصيحة القيمة
تحياتي......

الحمد لله رب العالمين والصلاة والسلام على أشرف الأنبياء والمرسلين محمد وعلى آله وصحبه وسلم ،،، ثم أما بعد ،،،

يقول الحق تبارك وتعالى في محكم كتابه : ( يَابَنِى ءادَمَ لا يَفْتِنَنَّكُمْ الشَّيْطَانُ كَمَا أَخْرَجَ أَبَوَيْكُمْ مِنْ الْجَنَّةِ يَنزِعُ عَنْهُمَا لِبَاسَهُمَا لِيُرِيَهُمَا سَوْءاتِهِمَا إِنَّهُ يَرَاكُمْ هُوَ وَقَبِيلُهُ مِنْ حَيْثُ لا تَرَوْنَهُمْ إِنَّا جَعَلْنَا الشَّيَاطِينَ أَوْلِيَاءَ لِلَّذِينَ لا يُؤْمِنُونَ )( سورة الأعراف - الآية 27 ) 0

وأستعرض بعض أقوال أهل العلم في تفسير هذه الآية الكريمة ، لكي نعلم موقفهم ممن يدعي رؤية الجن على حالهم وخلقتهم :

أ )- قال ابن حزم الظاهري : ( وإذا أخبرنا الله عز وجل أننا لا نراهم فمن ادعى أنه يراهم أو رآهم فهو كاذب إلا أن يكون من الأنبياء عليهم السلام فذلك معجزة لهم كما نص رسول الله صلى الله عليه وسلم أنه تفلت عليه الشيطان ليقطع عليه صلاته قال فأخذته فذكرت دعوة أخي سليمان ولولا ذلك لأصبح موثقا يراه أهل المدينة أو كما قال - عليه السلام - ، وكذلك في رواية أبي هريرة الذي رأى إنما هي معجزة لرسول الله صلى الله عليه وسلم ولا سبيل إلى وجود خبر يصح برؤية جني بعد موت رسول الله صلى الله عليه وسلم وإنما هي منقطعات أو عمن لا خير فيه ) ( الفصل في الملل والأهواء والنحل – 5 / 12 ) 0

ب )- قال القرطبي : ( قوله تعالى : ( إِنَّهُ يَرَاكُمْ هُوَ وَقَبِيلُهُ ) ( قبيله )جنوده 0 قال مجاهد : يعني الجن والشياطين 0 ابن زيد : ( قبيله ) نسله 0 وقيل : جيله 0 ( مِنْ حَيْثُ لا تَرَوْنَهُمْ ) قال بعض العلماء : في هذا دليل على أن الجن لا يرون ، لقوله : ( مِنْ حَيْثُ لا تَرَوْنَهُمْ ) 0 وقيل : جائز أن يروا ، لأن الله تعالى إذا أراد أن يريهم كشف أجسامهم حتى ترى 0 قال النحاس : ( مِنْ حَيْثُ لا تَرَوْنَهُمْ ) يدل على أن الجن لا يرون إلا في وقت نبي ، ليكون ذلك دلالة على نبوته ، لأن الله عز وجل خلقهم خلقا لا يرون فيه ، وإنما نقلوا عن صورهم ، وذلك من المعجزات التي لا تكون إلا في وقت الأنبياء صلوات الله عليهم 0 قال القشيري : أجرى الله العادة بأن بني آدم لا يرون الشياطين اليوم ، وفي الخبر : " إن الشيطان يجري من ابن آدم مجرى الدم " " متفق عليه " ) ( الجامع لأحكام القرآن – 7 / 186 ) 0

ج )- قال الشوكاني - رحمه الله - : ( وقد استدل جماعة من أهل العلم بهذه الآية على أن رؤية الشياطين غير ممكنة ، وليس في الآية ما يدل على ذلك ، وغاية ما فيها أنه يرانا من حيث لا نراه ، وليس فيها أنا لا نراه أبدا ، فإن انتفاء الرؤية منا له في وقت رؤيته لنا لا يستلزم انتفاءها مطلقا ) ( فتح القدير – 2 / 197 ) 0

د )- قال الطبري - رحمه الله - في تفسيره : ( قال ابو جعفر : يعني جل ثناؤه بذلك : أن الشيطان يراكم هو ، و ( الهاء ) في ( إنه ) ، عائدة على الشيطان ، و ( قبيله ) يعني : وصنفه وجنسه الذي هو منه واحد جمع جيلا ، وهم الجن ، كما قال حدثنا القاسم قال ، حدثنا الحسين قال ، حدثني حجاج ، عن ابن جريج ، عن مجاهد قوله : ( إِنَّهُ يَرَاكُمْ هُوَ وَقَبِيلُهُ ) ، قال : الجن والشياطين 0 وقال أيضا حدثني يونس قال ، أخبرنا ابن وهب قال ، قال ابن زيد في قوله : ( إِنَّهُ يَرَاكُمْ هُوَ وَقَبِيلُهُ ) ، قال : ( قبيله ) ، نسله 0 وقوله : ( مِنْ حَيْثُ لا تَرَوْنَهُمْ ) ، يقول : من حيث لا ترون أنتم ، أيها الناس ، الشيطان وقبيله ) ( جامع البيان في تأويل القرآن – 5 / 463 ) 0

هـ )- قال الحافظ بن حجر في الفتح : ( وفهم ابن بطال وغيره منه أنه كان حين عرض له غير متشكل بغير صورته الأصلية فقالوا : أن رؤية الشيطان على صورته التي خلق عليها خاص بالنبي صلى الله عليه وسلم وأما غيره من الناس فلا لقوله تعالى : ( إِنَّهُ يَرَاكُمْ هُوَ وَقَبِيلُهُ ) الآية ) ( فتح الباري - 1 / 555 ) 0

و )- وقال ايضا : ( وروى البيهقي في " مناقب الشافعي " بإسناده عن الربيع سمعت الشافعي يقول : من زعم أنه يرى الجن أبطلنا شهادته ، إلا أن يكون نبيا 0 انتهى 0 وهذا محمول على من يدعي رؤيتهم على صورهم التي خلقوا عليها ، وأما من ادعى أنه يرى شيئا منهم بعد أن يتطور على صور شتى من الحيوان فلا يقدح فيه ، وقد تواردت الأخبار بتطورهم في الصور - قلت : وبمثل كلام الحافظ قال السخاوي في " الإيقاظ " – ص 31 000 ) ( فتح الباري – 6 / 344 ) 0

ز )- قال شيخ الإسلام ابن تيمية – رحمه الله - : ( والجن يراهم كثير من الناس ) ( الجواب الصحيح لمن بدل دين المسيح – 4 / 289 ) 0

وقال ايضاً : ( وسلف الأمة وأئمتها وجمهور نظارها وعامتها على أن الجن يمكن رؤيته - قلت : والذي يعنيه شيخ الإسلام – رحمه الله – على أن الرؤية ممكنة في حالة تشكلهم بالإنسان والحيوان والطير ونحوه ، وقد تضافرت الأدلة النقلية الصحيحة على ذلك ، وقد تواتر النقل بذلك ايضاً وقد أجمع سلف الأمة وأئمتها وجمهور نظارها وعامتها على ذلك - 000 ) ( منهاج السنة – باختصار – 2 / 149 ) 0

وقد سئل عن قوله تعالى : ( 000 إِنَّهُ يَرَاكُمْ هُوَ وَقَبِيلُهُ مِنْ حَيْثُ لا تَرَوْنَهُمْ 000 ) وهل ذلك عام ولا يراهم أحد أم يراهم بعض الناس دون بعض ؟ وهل الجن والشياطين جنس واحد ولد إبليس أم جنسين : ولد إبليس وغير ولده ؟؟

فأجاب – رحمه الله - : ( الحمد لله ، الذي في القرآن أنهم يرون الإنس من حيث لا يراهم الإنس ، وهذا حق يقتضي أنهم يرون الإنس في حال لا يراهم الإنس فيها ، وليس فيه أنهم لا يراهم من الإنس بحال ؛ بل قد يراهم الصالحون وغير الصالحين أيضاً ، لكن لا يرونهم في كل حال ، والشياطين هم مردة الإنس والجن ، وجميع الجن ولد إبليس ، والله أعلم ) ( مجموع الفتاوى – 15 / 7 ) 0

ح )- قال محمد رشيد رضا : ( " والجمهور على أن الجن تتشكل " وقال في موطن آخر ( واختلفت فرق المسلمين في تشكلهم في الصور 0 فالجمهور يثبتونه ) وقال المجلسي : ( لا خلاف بين المسلمين في أن الجن والشياطين أجسام لطيفة ، يرون في بعض الأحيان ، ولا يرون في بعضها 00 وقد جعل الله لهم القدرة على التشكل بأشكال مختلفة وصور متنوعة ، كما هو الأظهر من الأخبار والآثار ) ( المؤمنون في القرآن – 1 / 145 ) 0

ط )- وقال أيضا : ( فإذا تمثل الملك أو الجان في صورة كثيفة كصورة البشر أو غيرهم ، أمكن للبشر أن يروه ، ولكنهم لا يرونه على صورته وخلقته الأصلية بحسب العادة ، وسنة الله في خلق عالمه وعالمها ) ( تفسير المنار – 7 / 525 ) 0

ي )- سئل فضيلة الشيخ عبدالله بن عبدالرحمن الجبرين عن إمكانية رؤية الجن على خلقتهم التي خلقوا عليها ؟

فأجاب – حفظه الله – ( الجن في خلقتهم أرواح بلا أجساد كالملائكة والشياطين - قلت : ومسألة أن الجن في خلقتهم أرواح بلا أجساد كالملائكة والشياطين فيها نظر وقد نقلت إجماع أهل العلم بأن الجن والشياطين والملائكة مخلوقات لها أرواح وأجساد لا يعلم كنهها وكيفيتها إلا الله سبحانه وتعالى وقد تعرضت لهذه المسألة سابقا - ولا يمكن أن يراهم البشر عادة لقوله تعالى : ( 000 إِنَّهُ يَرَاكُمْ هُوَ وَقَبِيلُهُ مِنْ حَيْثُ لا تَرَوْنَهُمْ 000 ) ولهم قدرة بإذن الله على التشكل والظهور بصور مختلفة ، فتارة في صورة شيخ كبير وتارة في صورة شاب مكتمل وتارة في صورة بهيمة أو طير أو حشرة ، ويكون لهم أجساد محسوسة في تلك التشكلات وقد يطلع الله بعض الناس على بعضهم فيراهم وحده دون من حوله كما ثبت أن النبي صلى الله عليه وسلم لما تبدى له جبريل رآه ولم تره خديجة – رضي الله عنها - ، ولم يحتجب حتى أبدت بعض جسدها ، فكذلك خلق الجن قد يكون بعض من يخدمهم أو يتقرب إليهم من السحرة والكهنة يراهم دون من حوله من الناس وقد يبرزون لبعض الصالحين أحيانا والله أعلم ) ( المنهج اليقين في بيان أخطاء معالجي الصرع والسحر والعين – ص 247

يامجدي ياأخوي أقوي شيطان شيطان اللاقة أخونا مجتبي محمد أحمدعثمان والله لما قريت موضوعة اليوم داك كلوا ملاوز بالله ما تخوفونا انت سمعت بشيطان ابو عريك بسقادي غرب أسأل منو عبد الرحمن عمي أما عن الحمار ابو جنازير والله مرة من المرات تعمدنا ننام برة الشارع عشان نتحرى الرؤية بس حقيقي دحش شبعان من صوتو يمر من عند بير ناس ود سعد ويرجع بين زقاق جدي مصطفي وعاشة بت نفيسة الله يرحمهم جميعا ولكن ما في ملامح بس صوت يا خوي خلينا السراير وجرينا جوة البيت هذا حقيقة لو ما مصدق بلاقيك وانت عارف يامجدي زمان لمن كنا نقدم واحد والله بس رجالة ساكت لكن القلوب واقعة في الركب لو كشكش كديس تلقاني راقد صوف ,,,\اتحياتي

يا ابو ريناد :

الاخت نادية ليك التحية والتنويه بطريقة راقية حضارية اولا انا اسف للخطأ أنا ما حا أعدل بس حا اصحح ورد ذكر اسم مجتبي محمد احمد واصحح معتذرا مجتبي الزبير عثمان ( وهذه فرصة اترحم علي شهيد الوطن الكابتن الزبير عثمان محمدين وايضا اترحم علي العم والوالد محمد أحمد عثمان رحمة الله عليهم ......

وشكرا أختي نادية .........أما شيطان الغربة الله يفكوا مننا

والله يا شباب زمان أنا وحاتم أخوي جينا بعد اللعب من حلة قدام واللعب في حلة قدام دي اكبر مشكلة بس بتشاطر ونتفولح كدة رجالة لكن الرجفة زي البوكس 76 الطافي بلقات ويارب استر وسبت الاقدام المهم عند بيت حبوبتنا آمنة بت صديق نسمع صوت الدلوكة واقفة لمبة الدلوكة صوت سحارة يعني مي دلوكة جلد بس انا حاتم بس سباق طيران والله لما جينا في زقاق فاطنة بت الحاج وشدة ما كابسين علي البنزين نسمع صوت شبابيك غرفة عمنا حسن فتحت من ضغط الهواء الجايبنوا انا وحاتم اخوي يازول تاني حلة قدام بعند ناس عم محجوب وبس .......

مرة انا وحاتم أخوي الله يطراه بالخير كنا جايين من اللعب من حلة قدام واللعب في حلة قدام يعني راجياك رجعة الله يعديها علي خير لما جينا عند بيت حبوبتنا آمنة بت صديق الله يرحمها سمعنا الدلوكة شغالة شغل جوة البيت والواطة ليل دامس مستحيل واحد يتجرأ ويمثل هذا الدور حتي لو مجنون وانا وحاتم نقوم ونقع وجينا فاتحين فتح مرة اوفوتو ومرة يفوتني ومرة نحازي بعض من شدة السرعة لما جينا في زقاق
أختنا فاطنة بت الحاج الله يطراها بالخير كبسنا الزقاق ومن ضغط الهواء لحدي باب ناس فاطنة بت الحاج فتح وقفل من ضغط الهواء ومن داك اليوم تاني حلة قدام بعند ناس عمنا محجوب الله يرحمه وبس .....

مجدي فتحت باب وزغت مالك بقيت تهلوس ؟؟؟؟

أبو ريناد كتب:

وانا وحاتم نقوم ونقع وجينا فاتحين فتح مرة اوفوتو ومرة يفوتني ومرة نحازي بعض من شدة السرعة لما جينا في زقاق
أختنا فاطنة بت الحاج الله يطراها بالخير كبسنا الزقاق ومن ضغط الهواء لحدي باب ناس فاطنة بت الحاج فتح وقفل .....

و الله يا ابراهيم تنفع مخرج سينمائى ..

بعدين ياخى بدل تقعدوا تحضروا قطع الرحط .. تقوموا فاكين البيرك ..؟؟!!

على الاقل كان تقعدوا تشربوا ليكم سورج .. و طالما فى بيت حبوبتى كنتو أكيد حتلقى ليكم زول تعرفوه ..

بعدين بصراحه الجماعة ديل ما بخوفو .. إنتو ظالمنهم ساى .. هم عليك الله أكان بخوفوا وللا بياكلوا الناس .. إنتو كان وصلتو باب بت الحاج ؟؟!!

لقد ريت بعاتي تعرفو البعاتي ,,,,,,,, ابن عمي عبدالعزيز دراش كيف حالك ... ياخي ارسل لي جوالك علي رقمي ( تجده في بكاقة تعارف) لك تحياتي ,,,

يامجدي يالذيذ يارايق ياريت لو كان قطع رحط كان الواحد رجع مع بنات الحلة بس ياخوي شليل كان مدور في حلة قدام ويا الدحيش نحن مصدقنك كنت تقول القصة والله اخوي مجدي بهندسة تمام يلا علي العموم مستنننكم مع تحياتي