لقاء الإسبوع مع عبد العزيزعبد الماجد حمد

لقاء الإسبوع مع العضو النشط صاحب المواضيع الجذابة والمشاركات الفعالة عبد العزيز عبد الماجد حمد نتمنى له وللأعضاء التوفيق فى تسطير صفحة رائعة فى المنتدى


ومن الحتانة سلااااااااااااااااااااااااااااام

الاخ عبد العزيز عبد الماجد تحية طيبة

كلية الفنون الجميلة رغبة أم صدفة ؟
هل راودتك نفسك عن عمل كورسات صيفية بسيطة في مجالك لابناء الوطن الصغير مثال الكتواب والحتانة ؟
هل شجعت من تحب للتخصص بنفس المجال ؟
معرض شاركت فيه دوليا ومدي نجاحه ؟
معرضت شاركت فيه أقليميا ومدي نجاحه ؟
ماذا تعني لك الصدفة ؟
بقولوا الفنانون لهم عالم آخر ؟
ما علاقة بين الفن التشكيلي ؟ والفن المسرحي
أخير لك التحية والود وأتمني لك نجاحا باهرا والي لقلء

سلامات يا إبراهيم..كيف حالك..

قبلي ما ارد عليك يا إبراهيم خليني اوجه تحية لجميع أعضاء المنتدى وزواره ..
وأتمنى ان يكون في هذه الفرصة للإجابة على الاسئلة ما يفيد وما ينفع..

بخصوص اسئلتك :

- كلية الفنون الجميلة رغبة أم صدفة ؟
دخولي لكلية الفنون كان عن رغبة، ولكن قبل ذلك الصدفة كانت في أن اكتشف نفسي في مجال الرسم،
كان عندنا أستاذ فنون في مدرسة الدامر الثانوية، فهو الذي رشحنا وشجعنا ومعي آخرين بأنني لو واصلت في المجال يمكنني ان أدخل كلية الفنون، فواصلت وبعد ذلك اصبحت رغبة. والحمد لله الواحد قدر يدخل كلية الفنون. لأنو الزمن داك كان الدخول عن طريق إجتياز إمتحان قدرات خاص بالكلية، يتم الترشيح له من خلال نتيجة الشهادة السودانية.

- هل راودتك نفسك عن عمل كورسات صيفية بسيطة في مجالك لابناء الوطن الصغير مثال الكتواب والحتانة ؟
- بي كل أسف لم أقم بهذا الواجب تجاه الكتواب او الحتانة، والسبب الحقيقي منذ دخول الجامعة وبعدها، اصبح تواجدي في البلد قليل مقارنة بالفترة السابقة (شكلو البندر أخدنا يا إبراهيم)، ثم بعد التخريج كانت الفترة
أيضاً قصيرة وكلها كنت في الخرطوم وبعدها سافرت السعودية. لاكين بالجد الواحد حاسي بأنو مقصِّر في حاجات كتيرة كان بالإمكان عملها. خاصة وأن بلدنا في اشد الحوجة لأي دعم اي كان نوعه. أتمنى حقيقي ان نقدر على تقديم ما يجب علينا تقديمه تجاه مناطقنا.

- هل شجعت من تحب للتخصص بنفس المجال ؟
- متى ما وجدت من لديه الرغبة في ذلك ولديه ما يدعم رغبته في مجال الرسم، بالتأكيد سأشجعه.وهناك كثير من الاصدقاء والمعارف شجعتهم على ذلك. بالتأكيد كل من لديه الرغبة في دخول الفنون سأشجعه وكثيراً ما احتفي بكل من يلتحق بالفنون.
وحقيقي أنا جد مبسوط لأنو عندنا شباب من المنطقة دخلوا الكلية مثال أخونا أنس فضل..والفنان مبدع هذا الموقع أيمن فضل الباري..وهناك ايضاً الزميلة ليلى عوض- لها التحية أينما كانت واتمنى أن نراها بيننا..
وهناك زملاء آخرين من العوضاب أذكر أخونا بشارة العوض..ومن القلعة الزميلة نازك نمروالزميل فتح الرحمن الدغور ومن سقادي صديقنا محجوب بابكر.. وهناك كثيرين لا أستحضرهم حالياً من المحمية دخلوا هذا المجال..
وأكيد من الأجيال اللاحقة هناك مبدعين قادمين..

- ماذا تعني لك الصدفة ؟ - الصدفة، ليها مكان معين عندنا في مجال الفنون والرسم، ففي بعض الأحيان وأثناء تجريبك لي رسم معين قد تتولد فكرة بالصدفة قد تكون في حد ذاتها عمل متكامل او ربما توحي بفكرة اكبر. فمع التجارب الكثيرة ربما تجد ما تبحث عنه صدفة.
(من ناحية تانية الصدفة برضو بتكون جميلة وحلوة لما فجأة تصادف زول ليك منو عشرات السنين، وتلاقيهو وسط زحمة وتسأل نفسك يا ربي دا إبراهيم عبد الله؟ ولاّ واحد بيشبهو؟؟ تتردد ..ثم تستوقفه وتسألوا..وتلقاهو ياهو إبراهيم وهاك يا سلام وونسة..كما حدث لي معك ذات مرة بالرياض..ههههه..فكانت صدفة سعيدة أن نلتقي كل بأسرته وبعد شوية كمان يطلعن زوجاتنا الإتنين دنقلاويات.. حقيقي اليوم داك كانت فرصة سعيدة أنو الزول يلاقيك..).

- معرض شاركت فيه دولياً ومدي نجاحه ؟
- معرض دولي شاركت فيه كان (معرض تشكيلي مصاحب لدورة الألعاب الأولمبية في أثينا سنة 2004) نظمته منظمة ألمانية مختصة بالمعارض الفنية اثناء الدورات الاولمبية، شاركوا فيه أكثر من 350 فنان، من مختلف بلدان العالم، من السودان كنا إتنين أنا وأحد الزملاء، المعرض لقى رواج كبير، رغم أنني لم أتمكن من حضور المعرض. ولكن تلقيت مكالمات ومكاتبات إشادة بالمشاركة، رغم إنها كانت اول مشاركة دولية لي.لكنها خلقت لي كتير من العلاقات وأدتني دفعة كبيرة لان أواصل في ما افعله.

- معرض شاركت فيه أقليميا ومدي نجاحه ؟
- معرض إقليمي ، كان معرض أقامته إحدى تكوينات الجالية السودانية بالرياض بمناسبة الخرطوم عاصمة الثقافة، كان معرض جماعي لكنه حشد جمهور كبير جداً من جنسيات اخرى. فكان فرصة جيدة لملاقاة الجمهور في المعرض. وبالذات الجمهور من جنسيات عربية.

بقولوا الفنانون لهم عالم آخر ؟
في الحقيقة هذا الموضوع دائماً يدور فيه النقاش. وهو موضوع كبير ليهو علاقة بي علم النفس. وبالتأكيد للفنانين عالمهم الآخر من خلال خيالهم، لأن العمل الإبداعي عموماً والتشكيلي خاصة بيعتمد على إبتداع فكرة جديدة، او إضافة جديدة على فكرة قديمة، فهذا الإعتماد على الخيال والفكرة نجده يجعل للفنانين عوالمهم الخاصة.
والنقطة دي دائماً بتجيب الحديث عن الفنون وعلاقتها بالجنون وبكل ما هو غريب ، والرسومات الغير مفهومة والأفكار الغير عادية. وكثير من ماهو ملاحظ على ناس الفنون .لاكين بشكل عام الإعتماد على الخيال هو الذي يجعل للفنانين عوالمهم الخاصة.

- ما علاقة بين الفن التشكيلي ؟ والفن المسرحي
بالتأكيد هناك علاقة وطيدة، أولاً من التعريف المشترك بأن التشكيل والمسرح هما فنون تعبيرية. في التشكيل التعبير بتم عن طريق اللوحة او المنحوتة او التصميم او قطعة الخزف وغيرها. وفي المسرح التعبير بتم عن طريق الحركة والكلام الحوار والمشهد والموضوع..إلخ.
وهناك مقولة متعارف عليها هي أن المسرح هو أبو الفنون، او جامع الفنون لأنه يجمع كل أنواع الفنون، ففي المسرح ممكن نشوف التشكيل من خلال خلفية المسرح او مشهد ومنظر حركة الناس، وممكن نسمع شعر او قصة من الحوار بين الممثلين، وممكن نشوف رقص ونسمع موسيقى ..إلخ.بحسب ما تحتويه المسرحية.
لذلك هناك علاقة وطيدة ما بين الإثنين.بل وبين بقية الفنون.


شكراً كتير أخونا إبراهيم وأتمنى ان يكون في إجاباتي ما افاد ..

لك وللجميع التحايا..

يمكن يكونوا الشباب بعرفوا عبد العزيز عبد الماجد.

لكن انا شخصيا لا اعرفه نهائيا الا عن طريق المنتدى ( انه من الكتواب).

ارجو عند التقديم للقاءات القادمة ان تنشر بطاقة تعريفية بسيطة ومختصرة عن الشخص المعنى .اذا انا ما عرفتو كيف حا اقدر اسأله؟؟؟؟؟

عزيزنا العزيز / عبد العزيز عبد الماجد
ارد الله غربتك وارجعك الى اهلك سالما غانما
1/ ارجو ان تعرفنا عن نفسك كاملا .
2/ فنانك المفضل واغنيتك المفضلة .. واغنية ترددها لوحدك .
3/ ما هو اطرف موقف مر بك خلاف قصة السفاية .
4/ هؤلاء فى كلمات :
1/ منتدى الحتانة 2/ محمد العربى 3/ كلية الفنون 4/ المدام
5/ صف لنا شعورك فى الاوقات الاتية :
1/ الجمعة العصر زمن العالياب 2/ لحظة العقد فى زواجك
6/ اين كنت صباح الجمعة 30/6/1989. واين كنت ايام فيضان 1988.
لك خالص الشكر والتقدير يا عبد العزيز وانشاء الله نتقابل فى لحظة صفاء ونقاء .

استاذنا : عبد العزيز عبد الماجد .
تحية طيبة وانشاءالله تكون بألف صحة وعافية .
1- متى تخرجت من كلية الفنون في أي سنة ؟؟
2- ما هو تخصصك .؟؟
3- وهل تعمل الأن في مجال تخصصك (بالتحديد).؟؟
4- هل هناك نية للعودة للسودان (نهائياً) قريباً؟؟
ولك ألف تحية

الأعزاء ..نادية وحسن ..
اول حاجة معليش لو فات علي التعريف بي نفسي..وكويس إنو في اسئلة حسن ما يضيف كتير من التعريف..

1/ ارجو ان تعرفنا عن نفسك كاملا .
عبد العزيز عبد الماجد..ود فاطنة بت أحمد ود سليمان ..الأخ الأصغر لمحمد / حمد/عبدالمنعم/عبد العظيم والأخوات سعيدة / خادم الله / آسيا..يعني أنا "الحِتالة" في بيتنا..
الميلاد 1971 ..
المراحل الدراسية..روضة المطمر ..المطمر الإبتدائية المختلطة..العالياب المتوسطة..الدامر الثانوية..كلية الفنون.. إتخرجتا سنة 97..من قسم الطباعة والتجليد..
حالياً أعمل مصمم قرافيكي بشركة دار الاركان للتطوير العقاري..بالرياض السعودية.. وفي نفس الوقت منشغل بالفنون التشكيلية..
متزوج واب لـ "رِفقة"..عمرها سنة ونص ..

2/ فنانك المفضل واغنيتك المفضلة .. واغنية ترددها لوحدك .
مصطفى سيد أحمد..بالذات لما يغني "مزيكة الحواري"..
لاكين مرات بسمع فنانين آخرين وبي شكل أكتر من مصطفى..
الأغاني التراثية عندها مكانة كبيرة في ما أسمعه..يعني حتى في كمبيوتر المكتب بتلقى البِشيرة وعمر حواري وود الحوري وحِميرا وكثير من الدوبيت..!!


3/ ما هو اطرف موقف مر بك خلاف قصة السفاية .
المواقف كتيرة يا حسن..لاكين خليني احكي ليك طرفة حصلت لينا زمن المدرسة..خاصة وإنتا زول دفعة..
زمن العالياب كانت الدنيا برد..وكت المذاكرة زوغنا ومشينا السوق نتعشى..والفكرة كانت لأخونا العزيز الحسن المكي- الله يطراهو بالخير-..وتحديداً في مطعم عمك السيد..صلحنا الفول..وآخر إنبساطة..وفي ناس ولعوا سجاير..في الوكت داك أستاذ عبد الغفار ود اب صالح..
شكلوا كان متابعنا..دخل براااحة لي عمك السيد..وسألوا من الحساب حق العشا حقنا كم..وقام حاسبو وطلع طوالي..ونحنا ما جايبين خبر..ونحنا بناكل..جانا عمك السيد وقالينا حق العشاء دفعوا ليكم أستاذ ود اب صالح..
طبعاً الأكل طار لينا ..وطوالي سريع سريع رجعنا.. ود اب صالح لمدة أسبوع عامل لينا قلق..كل ما يلاقي واحد فينا ..يقوليهو "انا داير منكم قروش..رايكم شنو أحاسبكم الليلة؟؟"..ههههه لحدي ما يوم نادانا..رغم أنه عفانا من القروش ولكنه لم يعفينا من الجلد مع التحذيرات..!!
له التحية أينما كان..


4/ هؤلاء فى كلمات :
1/ منتدى الحتانة 2/ محمد العربى 3/ كلية الفنون 4/ المدام
منتدى الحتانة..
من الصورة الفوق للحلة..بتتذكر البلد..بعداك بتلقى روحك طوالي مشيت هناك..
انا مشترك في كم منتدى..لاكين بالجد منتدى الحتانة بقيت
ما بقدر افوتو..لأنو بربطني بي ناسي ..


محمد العربي..
..اخونا وفردتنا..زول مريح جداً العربي لأنو واضح..
تعجبني جدا تعليقاتو التي لا تخلو من الإستهبال..له التحية..


كلية الفنون..
عملت تغيير كبير جداً فيني..على مستوى التفكير..وعلى مستوى العلاقات
عرّفتني بقبيلة التشكيليين وإنشغالاتهم لحدي ما خفتا إنهم ينسّوني اهلي..!!

المدام..
اماني محمد حسن..دنقلاوية من ناوا لاكين ما بترطن..
رسامة ونحاتة قبلي ما تكون زوجة..في مجال معارض الفنون مشاركاتها اكتر مني..!!


/ صف لنا شعورك فى الاوقات الاتية :
1/ الجمعة العصر زمن العالياب 2/ لحظة العقد فى زواجك

الجمعة العصر..
زي ما قال أخونا عبد العزيز دراش..بالجد وكت مخيف جداً عصر الجمعة لأنو البص بجي يوديك داخلية العالياب وتاني حتغيب من بيتكم إسبوعين..!!
بتذكر اللمة والوداع اللطيف من ناس الحتانة..(الغربة مافي زول برحب بيها يا حسن يا صاحبي)..

لحظة العقد في زواجي..
أكيد الواحد كان جايط ..وملخبط..
المهم فجأة لقيت الناس بتتصل وتبارك..ساعات اكيد الواحد بكون مهموم بي لمة العشاء والحفلة..وأنو المناسبة تتم على خير..

6/ اين كنت صباح الجمعة 30/6/1989. .
والله يا حسن ما بتذكر بالضبط كنتا وين..لاكين أظن كنتا في البلد..ومنتظرين المدرسة تفتح..حقيقي ما بتذكر بالضبط..

واين كنت ايام فيضان 1988بتذكر ونحنا في مدرسة الدامر بداية سنة أولى..معاي الأعزاء خالد عبد المتعال والامين حسن مدني..طبعاً بعد مطر الخميس المشهورة..قفلوا المدرسة..ومشينا البلد مشوار نصوا بالكداري..
ايام جميلة وعصيبة كانت حيث تقطعت الطرق ..وأصبح كل شيء أزمة!!


شكراً كتير يا حسن..وأتمنى ان أكون قد غطيت على أسئلتك..بما هو مفيد.. ..

مع التحية للجميع

التحية لك عبد الماجد مع اني ما عرفتك والله

لكن الحوار لذيذ والله وبالاخص قصتكم بتاعة الفتة مع الأستاذ ....... هههههههههههه

لك التحية مرة أخرى

الاخ / عبد العزيز
اخبارك وصحتك واولادك عساكم بخير
1/ حدثنا عن تجربتك فى بلغاريا .
2/ ما هو لقبك
3/ هل تتذكر موقعك بمدرسة المطمر فى سادسة ابتدائى ومن كان بجوارك ومن هم الذين يجلسون فى الكنبة الاولى .
4/ صحابى اعجبت بقصته ومن هو الشخص الذى ترى انك تاثرت به .
لك كل الشكر وللاسرة الكريمة ودمت .

سلام على الجميع..
وعذراً يا شباب على التأخير..بسبب المشغوليات..
وأعذروني حأجاوب على أسئلتكم في مداخلة واحدة..
وإن كان كل واحد فيكم يستاهل رد لحاله.
فلكم العتبى حتى ترضوا..

*************


عزيزي أيمن فضل الباري..الفنان..
أظن بعد مداخلتي الفاتت في أسئلة جاوبتا عليها..لاكين عموماً انا إتخرجتا سنة 97 من قسم المطبعة..
بخصوص العمل في المجال..الحمد لله شغال في نفس المجال (تصميم المطبوعات..وبعض الأحيان مواقع الإنترنت)..مع إنو في قسم المطبعة بالكلية -زي ما إنتا عارف- درسنا كمية من المواد العملية..الآن أصبحت زي ما تقول تاريخ في مجال الطباعة..
بعد التقنيات الحاصلة في المجال..لاكين أكيد ما درسناه في الكلية كان أساس جيد لدخول عالم التقنية..

أما بخصوص السؤال
هل هناك نية للعودة للسودان (نهائياً) قريباً؟؟
فيا صاحبي أكيد مافي أجمل من الزول يكون شغال في بلدو..وبين اهلو..وأنا بتفق مع اخونا عبد العزيز دراش..في إنو الإغتراب ورطة..بتدخل فيها عدة أمور..
بكل صراحة مافي تاريخ معين للرجعة..ونحنا عادة -بكل أسف- حياتنا غالباً بتكون خالية من اي تخطيط طويل المدى..يعني بنخلي الحاجات ماشة ساكت بس..
لاكين بكل تأكيد متى ما الواحد إتهيأت ليهو سبل العودة..وإتخذ قرار الرجعة..أكيد بيصبح في البلد..وأكيد بكون أسعد..

شكراً يا صديقي وأكيد حنتلاقى..هنا وهناك..
وأبقى عشرة علي إبداعك..



**************************
--------------------------------------

أخونا العزيز جعفر العطا ..ياخ كيف حالك ..إن شاء الله بخير..
(تعرف كل ما ألقى سيرة "صالة النقر"..بتذكرك وبتذكر الاعزاء امير وعلم ..وتلك الايام.. )..

1/ حدثنا عن تجربتك فى بلغاريا .

بلغاريا يا صديقي العزيز..كان عندي فيها معرض سنة 2006 ..وبرضو السنة دي 2009 (قبل اسبوعين تقريباً جيت منها)..المعرض هو سنوي..مختص بي الرسومات ذات المقاسات الصغيرة..
والمرسومة عن طريق حفر الشكل المرسوم على سطح أملس ..ومن ثم توزيع الحبر أو الالوان على الرسمة المحفورة وطباعة هذا السطح على الورق لتحصل على رسمة مطبوعة..
وهي بإختصار نفس فكرة (الخِتم عندما تضغطه على الحبر ثم تطبعه على الورقة)..بس هناك بكون النتيجة شكل او صورة..وطبعاً فيها كتير من الطرق والتلاعب بطريقة توزيع الالوان على الشكل..لتحصل على نتيجة معينة..
المهم ..المعرض كان تجربة ممتازة أنو الواحد يشارك مع فنانين من بلدان تانية ..ويتعرف على تقنيات جديدة..وفي نفس الوكت فرصة جيدة للتواصل معاهم..وفتح علاقات ودروب جديدة في المجال دا..
الحاجة التانية بلغاريا بلد جميلة جداً..في المرتين انا بمشي وبندهش..بالذات الطبيعة العجيبة التي تتمتع بها..(وانا ساحاول رفع بعض الصور من بلغاريا ..متى ما ألقى طريقة..).

2/ ما هو لقبك
اللقب..
"شكلك كدة عارف لي لقب "..
والله يا جعفر ..صراحة كل البتذكروا..بالذات في كلية الفنون في ناس بقولوا لي عزيز ..وفي ناس بقولو لي عزيز العربي "ودا الكان أكتر"..
أما أخونا محمد العربي "المستهبل" فقد اسماني "الفننجي" ..

3/ هل تتذكر موقعك بمدرسة المطمر فى سادسة ابتدائى ومن كان بجوارك ومن هم الذين يجلسون فى الكنبة الاولى .
يا سلام ياخ.. أظن - والله أعلم - انا كنتا في الكنبة الورا..وكان معاي أمير
اللمين..ووليد يوسف..وعلي مدني وأظن إنتا برضو..
الكنبة الأولى دي المفروض يكون فيها صاحبي علم الدين وخالد عبد المتعال واللمين حسن وكمال عبد الرحيم ويوسف علي..
..التحية للدفعة جميعهم بدون فرز..ويا لها من ايام..

4/ صحابى اعجبت بقصته ومن هو الشخص الذى ترى انك تاثرت به .
أعجبت
بقصة سيدنا أبو ذر الغفاري..فهو غريب بالذات في زهده عن المال والجاه ..عرضوا عليه الإمارة فقال -او ما معناه- ( لا والله.. لن تميلوا عليّ بدنياكم أبدا)..
والسلطة والمال مغريات نادراً ما نجد من يرفضهما..إلا زاهداً مثل ابو ذر..
والله لا أذكر شخص محدد تأثرت به..ولكن أكيد هناك كثير من الأفكار والاشخاص الذين فعلوا ما هو قيم في هذه الحياة..فأكيد تجاربهم جديرة بان ناخد منها المفيد..

توصل تحياتك يا صديقي لأسرتي ..وشكراً جعفر..وأكيد حنتلاقى هنا وهناك بإذن الله..


*************************
------------------------------------

الدحيش..كيف حالك يا زول..أتمنى ان تكون بخير أنتا وأسرتك..

1- ما هي العلاقة بين كلية الفنون الجميلة .. والشكل الغريب في اللبس وعدم تسريح الشعر .. والبناطلين الجينز المشرملة ؟
هههههه.. ما حأقدر ازوغ من الجواب..لأنك كنتا معانا الايام ديك وشااااايف ههههه..بس اطمنك هسه الصورة إتغيرت تماماً..ههههه
على اي حال يا صاحبي الموضوع فيهو جزء من الحقيقة وفيهو جزء من التهويل الزائد..
جزء الحقيقة في علاقة الموضوع بأنو الفنان ليس عادياً في رؤيته للاشياء -او هكذا يجب أن يكون - عشان تبدع شيء جميل ومختلف وجديد - ودا حسب تعريف المبدع او الفنان..
يلا كيف تكون غير عادي في رؤيتك للاشياء دي بتختلف حسب المجال والبيئة التي حولك وحسب فكرك وحسب فهمك..والموضوع بيدخل فيهو إعتماد الإبداع على الخيال..والتفكير..في لوحة ما أو منحوتة ما..او موضوعات لوحاتهم..
اما جانب التهويل الزائد..فمرات كتيرة جداً ناس الفنون بيني وبينك قاعدين يزودوها حبتين ههههه..وانا من خلال التجربة بالذات في فترة الدراسة وفترة الشباب بيكون في تمرد زائد ..تمرد على الشيء السائد أو على الحياة العادية..ودا شيء معروف..في ناس بتخلصوا من الموضوع بمجرد تخرجهم وإندماجهم مع الآخرين..
وفي ناس بيمشي معاهم جزء من هذا التمرد..
لاكين في نفس الوكت صعب جداً فرز ما نراه غير عادي عند الفنان هل هو حقيقة أم تهويل منو ساكت..لأنو المجال نفسو مجال صعب تحديد الاشياء فيهو..!!

أحكي ليك موقف لا يخلو من طرافة ..زمن الكلية..
كان عندنا محاضرة بتاعت نحت..وكان الموضوع - الله يعزكم- "كلب نائم" والاستاذ طلب مننا تحضير سبعة رسومات للكلب من زوايا مختلفة..وفرّغنا للموضوع..شلنا اوراقنا والبوردات..ومشينا نفتش لي كلب نائم..هههههه
بتذكر انا ومعاي زميل تاني ..مشينا بيوت حي المقرن..في فيلا هناك وغفيرها عندو كلاب ..قلنا النهار بتكون مقيلة بي مزاااج..المهم مشينا ..وفعلاً لقيناها ليك نايمة في أوضاع نفس المطلوب ..وقعدنا نرسم..بعد فترة بالله فجأة الكلاب دي
تقوم ليك فينا..هوهوة ..وجوطة..وصاحبك الغفير جا جاري من جوة..يا جماعة الحاصل شنو؟ سلمنا عليهو وقلنا ليهو ياخ نحنا مغروضين في كلابك دي..لازم ترجع تاني تنوم عشان عندنا محاضرة وكدة وكدة..الراجل إتمّحن..عاين لينا وقال:
(والله يا أولادي كان عندكم شغلة امشوا عليها..البتسوا فيهو دا كلام فارغ ساكت)..هههههههه.
فكدي إتخيل إنتا زول شايل ورقو وقاعد يفتش ليهو في كلب نايم عشان يرسمو..في نهار الخرطوم داك؟؟

2- هل الرغبة تجعل من الإنسان فناناً بدون موهبة .. أم أن الموهبة هي الأساس في مجال الفنون الجميلة ؟
الرغبة وحدها قد لا تكفي..او قل تحتاج لجهد كبير جداً بالممارسة..ربما تكفي..ولكن أكيد عندما تكون هناك موهبة وتجي عليها الرغبة..بكون في ضمان للتفوق في المجال..

3- هل شعرت أن الأستاذ السوداني يعطي كل ما عنده بإخلاص لحظة التدريس .. أم أن هناك حدود معينة للسخاء ؟
والله ياخي بشكل عام الأستاذ السوداني سخي ..إلا نادراً..وبي طبيعتنا وتربيتنا السودانية..الاستاذ بيدي من غير خوف من أن "الحوار" ربما يفوت "الشيخ"..
والكلام دا يا الدحيش إتأكد لينا لما جينا السعودية..ودي واحدة من الاشياء الجميلة المحسوبة للسودانيين بالذات في مجال التدريس وفي المجالات الأخرى ايضاً..وبخلاف الجنسيات الاخرى..السوداني سخي وأمين في إعطاء ما عنده.

4- أنظر الى الصورة أعلى المنتدى بنظرة فنان بتجرد .. بعيداً عن العواطف والذكريات .. وأخبرنا ؟
المشهد واضح لقرية ..أشجار "السيال" وهي اشجار إقليم شبه الصحراء في السودان..بتدل على ان القرية في الشمال الأقرب للوسط ..
الصورة ماخودة من مستوى او منظور عالي..فغطت مساحة كبيرة من المشهد فهو مليان تفاصيل..جامعة ما بين طبيعة عادية وطبيعة صامتة..الصورة متعددة الالوان ..فالاشجار منحت المشهد درجات من الاخضر..
الرمال المحاصرة للبيوت منحت درجات من اللون الاصفر..تلاشى مع ألوان داكنة متدرّجة للجبال..ثم السماء والفضاء في خلفية الصورة..حركة الغنم السود..وبعض الاشخاص هناك ادت للصورة حركة هادئة..هدوء القرية..
أما في الطبيعة الصامتة فالبيوت وتوزيعها بيحكي عن تآلف حاصل بين اهلها وساكنيها وبيذكرنا بي كيفية إختيار الناس لمجاورة بعضهم البعض..ومن داخل البيوت هناك غرف من غير باب وذلك دلالة الأمان..الوان الأبواب وغلبة اللون الازرق
الفاتح "اللبني" دلالة على ان حتى في الذوق العام في إختيار الألوان هنالك تآلف وتقارب..!!

اها كدة كيف؟؟ مع إنو الكلام دا خالي من اي ذكريات..هههههه..

شكراً الدحيش على هذه الأسئلة التي أتمنى صادق ان توصل ماهو مفيد..




******************
-------------------------
ود الصول ..كيف حالك..وشكراً على المرور..
يا زول مافي مشكلة الجايات اكتر..وإن شاء الله نتلاقى في ساعة خير ونتعارف اكتر..


وسلام للجميع ..

يا عبد العزيز كيف اخبارك ود أبو صالح استاذ بمعني الكلمة وكان صديقنا من خلال صداقته باخواخنا الكبار لكن كان نعم الاخ وطريقة تصرفوا يدل علي الطريقة التربوية الصحيحة وفيها حكمة نتمني له كل خير ومشتاقين نشوفوا .

الاخ عبد العزيز تحية لك اعجبني ردك علي السؤال رقم 4 للاخ الدحيش انت بصراحة انسان مرهف الحس وتعبيرك بهذه اللغة التي تجمع الاكاديمية والعواطف الجياشة حقيقة تعبيرك غمرني بسعادة ما تتخيل اوصفها لك وفعلا لقد اوصفت تلك الطبيعة بعين انسان فنا ن فنان فنان بمعني الكلمة ..... هل تعلم يا عبد العزيز الفنون الجميلة كانت رغبة جامحة بالنسبة لي ... ولكن افلتت الطائرة عن المدرج واصدمت بحائط التدريب المهني الالماني بجوار المطار

أبو ريناد كتب:

... هل تعلم يا عبد العزيز الفنون الجميلة كانت رغبة جامحة بالنسبة لي ... ولكن افلتت الطائرة عن المدرج واصدمت بحائط التدريب المهني الالماني بجوار المطار

حلوه يا ابوريناد .. لكن يا اخوى جاي بى طيارة و ما عندك حق التكسى للمقرن ؟؟ ولّلا عجبوك الألمان ؟

لك التحية
**

شكرا أخوي مجدي ياريت كان عندي حق التاكسي كان الواحد فكر في الطريق حسب سرعة التاكسي المتواضعة ولكن الطيارة كانت اسرع ومافي وقت للتفكير ..... تحياتي

شكراً الأخ ود ماجد على الإبداع وإستنطاق الحروف والصور حقيقة بدون مجاملة لقاء روعة فشكراً مرة أخرى



ومن الحتانة سلاااااااااااااااااااااااااااااااااام