من كرامات ابونا الشيخ عمر وابونا الشيخ حامد

عدد المساهمات : 131 تاريخ التسجيل : 08/04/2009

زي ما كلنا عارفين انه قبل عشرين او ثلاثين سنة كان زيارة القبور والتداوي عن طريق الشيوخ والفقراء هي السمة الغالبة في المجتمعات السودانية وبالذات المجتمعات القروية , وكان ليها الاولوية قبل زيارة الطبيب في كثير من الاحيان بالذات مع الامراض المتكررة والمستعصية , واذكر انه في طفولتنا امي كانت بتجمعنا انا واولاد فريق الدراشاب ( ياسر وعبد العظيم محمد مصطفي وعاطف وخالد عبد المتعال ) ومجموعة من اولاد الحله وتعمل القراصة وتسوقنا تودينا لي ضريح شرق جبل اللحو اسمه ضريح الشيخ (ود ايوب ) يقال انه رجل صالح , وبرضو كنا بنمشي نزور ضريح تاني قدام فريق الضحواب كنا بنسميه ( ود ابو شمال ) وهو عبارة عن سور من الحجارة مليان رمله وفيه مجموعة من الرايات البيضاء والخضراء , وحتي الآن انا ما متأكد هل فعلا في رجال صالحين مدفونين في المقبار دي والا هي كيمان تراب وبس. اما قبر ابونا الشيخ عمر كانت زياراتنا ليه بالعشرات في كل مناسبة نجاح او شفاء من مرض عضال, وياما شربنا فيه الشاي واكلنا الزلابية .

بعد المقدمة دي انا حا احكي (كرامتين) او سموهن حادثتين المهم كل واحد يسميهن حسب اعتقاده. والكرامة الاولي حكتها لي امي وقالت انه قبل فترة طويلة كان واحد من اخواني يعاني من مرض مستمر ومتكرر وقامت حبوبتي حواء ( الله يرحمها ويجعلها من اصحاب اليمين) قررت تمشي بيه هي وامي الي ضريح الشيخ حماد ابو عصايةً سيف في حلة جبل ام علي , وفي الوقت داك كانت وسيلة المواصلات الوحيدة هي القطارة , وكان لازم يوقتن لي يوم يكون فيه قطرين قطر الصباح ماشي الخرطوم وقطر العصر جاي من الخرطوم عشان ما يضطرن يبيتن في حلة جبل ام علي , وفعلا مشن في قطر الصباح ووصلن محطة ام علي وكملن باقي المشوار للحلة بي رجليهن , وبعد الزيارة ارتاحن في الحلة حتي مواعيد القطر الجاي من الخرطوم , والزمن داك التوقيت كان توقيت تقديري لانه الساعات كانت غير متوفرة والظاهر انهن ما قدرن الوقت تقدير مضبوط وبمجرد خروجهن من الحلة ما شات الي المحطة جاء القطار وطبعا اصبح من المستحيل يحصلنه لان المسافة بين الحلة والمحطة اكثر من كيلو او اثنين وايضا القطر ما بيقيف في المحطة الا دقائق معددوده , قامت حبوبتي حواء ندهت الشيخ حامد ( حسب تعبير امي ) وقال ليه يظهر كرامته ويلحقنا القطر , وواصلن المشي الي المحطة علي امل انهن يحصلن القطر , وفعلا املهن لم يخيب وشافن القطر خسران قبل المحطة بي مسافة واقف يصلحو فيه , وفعلا وصلن القطار وركبن وبعد فترة من الزمن تم اصلاح القطر ووصلن الي الحتانة في المواعيد المخططات انه يصلن فيها. وطبعا لو عملت المستحيل عشان تقنع امي وحبوبتي بانه الحصل ده مجرد حادث والشيخ حامد ليس له اي دخل في الموضوع ما حا يصدقن , واعتبرن انه الحصل كرامه من كرامات الشيخ حامد عليه رحمة الله . ومن الطرائف التي صاحبت الموقف انه لما ناس حبوبتي ركبن القطر جلسن جنب ولد شاب والظاهر انه استغرب لانو شافهن الاثنين ومعاهن طفل صغير في منطقة كلها جبال وما فيها اثر لاي بشر وقام سأل حبوبتي وقال ليها: يا حاجة الجابكن المنطقة المقطوعة دي شنو؟. ردت عليه حبوبتي بي بساطة وقالت ليه جينا نزور ابونا الشيخ حامد ابو عصايةً سيف. الولد قعد يضحك من كلامها وقال ليها : ( تراه ما قصر معاكن ضرب ليكن القطر بي عصايته وقفو ليكن).

اما الحادثة او الكرامة الثانية حكتها لي امرأة لاول مرة اشوفها في حياتي , وكان الكلام ده بعد وفاة حسن خالي ( الله يرحمه ويحسن اليه) جيت في بيتهم بعد الوفاة بكم يوم ولقيت اربعة نساء في البيت عرفت واحدة منهن وهي زوجة يس النجومي ( عليه رحمة الله ) اما الباقيات ما عرفتهن ولما سألتهن عشان اتعرف عليهن ردت علي اكبر واحده فيهن وقالت لي نحن من الزيداب وعندنا صلة قرابة مع حبوبتك حواء , واسترسلت في الكلام بدون اي مقدمات وقالت لي انا جيت حلتكم وبيته في بيت ناس حبوبتك والكلام ده كان بدري زمن السفر بالقطر, كنا جينا انا وولدي واختي زيارة للشيخ عمر ( عليه رحمة الله) وبعد الزيارة مشينا بيت ناس حبوبتك وبيتنا فيه لانه ما كان في قطر في نفس اليوم جاي من الخرطوم عشان كده اضطرينا بيتنا وانتظرنا قطر كريمة بكرة العصر , وفعلا بكرة القطر جاء في مواعيده بالتمام بس كان زحمة والابواب كلها مقفلة والقطر وقف لحظة بس وتحرك واختي وولدي قدرو يركبو وانا القطر فاتني واحترت جدا اعمل شنو ارجع بيت ناس حبوبتك والا امشي محطة المحمية وانتظر اي قطر جاي امشي فيه الزيداب , وولدي واختي حا يعملو شنو حا يجوني راجعين والا حا يمشو يخلوني , وفي النهاية رأيي استقر علي اني امشي المحطة وطبعا انا ما عارفة اي اتجاهات في البلد عشان كده باريت السكة حديد وفي الطريق لقيت قبة الشيخ عمر ( وندهت) الشيخ عمر اني الحق القطر وواصلت المشي ولما وصلت نص المسافة شفت ولدي من بعيد جاي يجري من جهة المحطه ولما وصلني قال لي يمه اسرعي انا خليت القطر خسران في المحمية يصلحو فيه وخالتي منتظرانا هناك , وفعلا قالت مشينا وحصلنا القطر وركبنا فيه حتي بعد داك بي مسافة صلحو القطر وسافرنا الي الزيداب وكرامة ابونا الشيخ عمر لحقتنا .

انا نقلت الروايات دي حسب ما سمعتها من اصحابها الحصلت معاهم دون زيادة او نقصان اللهم الا بعض العبارات التي لا تؤثر في مضمون الرواية . وبعد داك الحكم ليكم البشوف انها كرامة ده رأيه والبشوف انها مجرد حادث يمكن يحصل في اي مكان او اي زمان دي برضو رأيه . والله تعالي اعلم .

أولا أنا أول المعلقين فأقول :
ليس الخلاف فى المسميات ولكن القصتين تضمنتا عده محاذير
1/ النذر للقبور
2/الذهاب للقبور للشكربعد النجاح والشفاء
3/النديهة للشيخ (الدعاء)المتضمن إعتقاد النفع والضر فى غير الله فأقول:
قال الله جل وعلا (قُلْ لَا أَمْلِكُ لِنَفْسِي نَفْعًا وَلَا ضَرًّا إِلَّا مَا شَاءَ اللَّهُ وَلَوْ كُنْتُ أَعْلَمُ الْغَيْبَ لَاسْتَكْثَرْتُ مِنَ الْخَيْرِ وَمَا مَسَّنِيَ السُّوءُ إِنْ أَنَا إِلَّا نَذِيرٌ وَبَشِيرٌ لِقَوْمٍ يُؤْمِنُونَ) وقال سبحانه وتعالى (إن الذين تدعون من دون الله عبادا أمثالكم فأدعوهم فليستجيبوا لكم إن كنتم صادقين ) وقال جل فى علاه (قُلِ ادْعُوا الَّذِينَ زَعَمْتُمْ مِنْ دُونِهِ فَلَا يَمْلِكُونَ كَشْفَ الضُّرِّ عَنْكُمْ وَلَا تَحْوِيلًا) وقال سبحانه موبخا الذين يدعون الأموات الذين لا يسمعون وإذا سمعوا لم يكن فى إستطاعتهم الإجابة (إن الذين تدْعُونَ مِنْ دُونِهِ مَا يَمْلِكُونَ مِنْ قِطْمِيرٍ (13) إِنْ تَدْعُوهُمْ لَا يَسْمَعُوا دُعَاءَكُمْ وَلَوْ سَمِعُوا مَا اسْتَجَابُوا لَكُمْ وَيَوْمَ الْقِيَامَةِ يَكْفُرُونَ بِشِرْكِكُمْ وَلَا يُنَبِّئُكَ مِثْلُ خَبِيرٍ (14) وقال النبى صلى الله عليه وسلم ( لاتشد الرحال إلا إلى ثلاث مساجد ) وقال معلما إبن عباس ( ياغلام إنى إعلمك كلمات.....إذا سألت فسأل الله وإذا إستعنت فإستعن بالله ) والأدلة كثيره بل مانزل الكتاب ولابعث النبيون ولا رفعت رايات الجهاد ولا قام سوق الجنة ولا التحذير من النار إلا للدعوه للتوحيد ونبذ الشرك وإذا لم يكن دعاء غير الله فيما لا يقدر عليه إلا الله شرك فلا إدرى ماهو الشرك ولا يظنن ظان أن مشركى مكة كانوا لايعرفون الله قال جل من قائل (فَإِذَا رَكِبُوا فِي الْفُلْكِ دَعَوُا اللَّهَ مُخْلِصِينَ لَهُ الدِّينَ فَلَمَّا نَجَّاهُمْ إِلَى الْبَرِّ إِذَا هُمْ يُشْرِكُونَ )
بعد هذا السرد لايبقى شك أن هذه الأفعال من الشرك الأكبر الذى قال الله فيه ({إنّ اللهَ لايَغْفِرُ أنْ يُشْرَكَ بِهِ وَيَغْفِرُ ما دُونَ ذلِكَ لِمَنْ يَشاءُ} ففرّق بين الشرك وسائر الذنوب وحَتم على نفسه بأن لايغفر الشرك.
واما من فعل ذلك من إبائنا وإمهاتنا فهم معذورون بجهلهم ولأن الصوفيه طمثت معالم الدين الصحيح وعلينا أيها الإخوان أن نجتهد بقدر المستطاع أن نثقف إهلينا وننقذهم من الجهل والخرافة أما تحقق بعض الافعال فى القصتين فهذا من باب الإستدراج ليس إلا كيف وإبليس عليه اللعنه قد أقسم للرب جل وعلا فقال (فَبِعِزَّتِكَ لأغْوِيَنَّهُمْ أَجْمَعِينَ إِلا عِبَادَكَ مِنْهُمُ الْمُخْلَصِينَ) وقال (وَلا تَجِدُ أَكْثَرَهُمْ شَاكِرِينَ) وقال (قال فبما أغويتني لأقعدن لهم صرطك المستقيم (16) ثم لأتينهم من بين أيديهم ومن خلفهم وعن أيمنهم وعن شمائلهم ولا تجد أكثرهم شكرين (17) حتى قال الله عنه ({ وَلَقَدْ صَدَّقَ عَلَيْهِمْ إِبْلِيسُ ظَنَّهُ فَاتَّبَعُوهُ إِلا فَرِيقًا مِنَ الْمُؤْمِنِينَ ) والموضوع جد خطير ياإخوان كيف لا وهو جنه ونار وأخيرا قال الله (( إِيَّاكَ نَعْبُدُ وَإِيَّاكَ نَسْتَعِينُ) وقال (مَا خَلَقْتُ الْجِنَّ وَالْإِنْسَ إِلَّا لِيَعْبُدُونِ (56) مَا أُرِيدُ مِنْهُمْ مِنْ رِزْقٍ وَمَا أُرِيدُ أَنْ يُطْعِمُونِ (57)

والسلام عليكم

عدد المساهمات : 498 تاريخ التسجيل : 08/04/2009

مشكووور جدأً يا عبدالعزيز على هذه الذكريات الجميلة .. التي أرجعتنا فيها إلى الزمن الجميل والنفوس الطيبة
وأقول لأخي عبدو (إنما الأعمال بالنيات وإنما لكل إمرئ ما نوا) صدق رسول الله صلى الله عليه وسلم .. فلا أظن أن أهلنا الطيبين قد فعلوا ذلك بقصد الشرك .. ولكنه من باب التوسل بالصالحين .. والذي فيه خلاف بين الطوائف والعلماء .. فهناك علماء يجوزون ذلك .. وهناك آخرون ينهون عنه .. فلا نملك إلا أن نقول ( إنما الأعمال بالنيات) فنسأل الله أن يجزي أهلنا الطيبين أمثال الوالدة المرحومة (حواء) أن يجزيها خير الجزاء .. وعلى حسب نيتها الصافية الطاهرة التقية النقية .. آمين

فى البدء لابد من الإشادة بالأخ عبد العزيز و طريقة سرده لهذه القصص الطريفة .. و تطرقه لهذا الموضوع المثير .. موضوع الأولياء و الكرامات

كلنا يعلم أن أهلنا بالبلد يمتازون بالطيبة و العفوية و حسن النية .. و نذكر أن حبوبتنا حوه بت عبد الرحيم عليها الرحمة كانت معروفة بى طيبتها الشديدة .. وحبها لكل الناس .. الصغير قبل الكبير .. و لا و لن ننساها أبداً ما حيينا ... و لن ننسى وجهها البشوش الذى كان يشع بالمحبة و الحنان .. و لا تلقاها إلا والإبتسامة تعلو شفتيها ...نسأل المولى القدير أن يكرم نزلها .. و أن يجعلها فى عليين مع الصديقين و الصالحين .. آميين

أما عن الكرامات .. فنحن بلاشك نتفق مع الأخ عبده فى أن الدعاء بغير الله هو شرك

قال تعالى: ( ولا تدعُ من دون اللهِ ما لا ينفعك و لا يضرك فإن فعلت فإنك إذاً من الظالمين )ـ

فهذه الأحداث ما هى إلا محض صدف .. فكثيراً ماكان يتعطل القطار .. و هناك كثير من الأشياء العجيبة التى تحدث فى حياتنا و نستغرب لحدوثها .. و لكن كل هذا بأمر الله وحده

ولكن لا نستطيع أن ننكر أن هؤلاء المشايخ قد يكونوا من الصالحين ... و إذا كانت لهم كرامات رآها الناس فهى كرامات إختصهم بها الله و أكرمهم بها و لم يطلبوها منه ... بل أعطاهم لها لأنهم أولياء صالحين مؤمنين.. و لا يستطيعوا أن يضروا بها و لا ينفعوا أحد

نسأل الله تعالى أن يكون توقف هذه القطارة لصلاح أؤليك النسوة الطيبات من أهلنا الطيبين

عدد المساهمات : 78 تاريخ التسجيل : 10/03/2009

بعـــد طــول غياب عن المنتدي اسمحوا لي ان اعلــق علي الموضوع الشــيق من ناحية نفســية بحتة لا علاقة لها بالافتاء والحلال والحرام ..
انا بفتكر انو الموضوع كلو نفسيات يعني الزول البيعتقد نفسـيا انو ممكن يعمل حاجة او تحصل ليهو حاجة بتحصــل .. واحكي ليكم القصتين ديل :
حكي لي ابوي قال : في سنة يابســة (اظنها سنة ستة المشهورة بالمجاعة) قال كانت واحدة من حبوباتنا عيانة شديد قام اتلمـوا ناس الحلة عشان يلقـنوها الشهادة وقاعدين جمب راسها قامت حبوبتنا فتحت عيونها وقالت ليهم :هــوي يا ناس امشــو شوفوا ليكم شغلة انا ما المرة الشقـية البتمــوت في سنــة مجاعــة .. قام الجماعة اتفرتقوا ومشوا وحبوبتنا بقت كويسة وعاشت كم سنة كده وماتت في سنة خضراء فيها امطار وزراعة وخيرات .
القصة التانية قريتها في مجلة ماجد وحا احكيها باختصار :
قالو كان في واحد عيان شديد وراقد في السرير مطــل علي الشباك .. وبره الشباك عندهم شجرة فيها خمسة صفقات .. قام صاحبنا اعتقد نفســيا انو لما الصفقات الخمسة دي تسقط حا يقوم يموت .. فبقي صاحبنا يراقب كل يوم الصفقات .. صحي اليوم التاني لقي الصفقات بقت اربعة .. واليوم البعدو بقت تلاتة .. وهكذا لحدي ما قضلت صفقة واحدة في الشجرة قام صاحبنا خاف خوف شديد .. اها عندو صاحبو لما عرف انو نفسيات الزول دا مرتبطة بالصفقات دي ومعتقد انو حا يموت لما تسقط كلها قام قطع الصفقة الاخيرة دي وعلــق محلها صفقة صناعية .. فبقي صاحبنا العيان دا كل يوم يصحي يلقي الصفقة قاعدة وما سقطت .. ففكر بينو وبين نفسو طيب طالما الصفقة دي قدرت تقاوم ورفضت تسقط طيب ليه انا برضو ما اقاوم المرض .. فقاوم صاحبنا المرض وبقي كويس ونفسياتو اتصلحت ..
مما سبق انا بفتكر انو الزول دا لو نقسـياتو ما اتصلحت كان (مات وهــم ) رغم ايماني بان الاعمار بيد الله
عشان كده قلت ليكم البيعتقــد نفسيــا انو ممكن يحصل القطــر بيحصــلو . ودمتــــــــم سالميــن .
Rolling Eyes

الحمد لله كلنا متفقين إنو هذه الأفعال لاتجوز بغض النظر عن المسمى وزى ماقلنا أهلنا معذورين لكن أنا داير أحكى ليكم أغرب ماحدث والله والله ماأزيد غير أحكى :

أمس عندما بدأت أكتب الرد على موضوع عبد العزيز وأنا أجمع حتى وصلت النهاية قمت عملت إرسال مساهمة وأنا منتظر فإذا بى أتفاجأ أن الجهازخرج من المساهمة وعمل تسجيل دخول قمت سجلت وبدأت مرة أخرى فى الكتابة ولما إنتهيت وأرسلت المساهمة حدث نفس الشئ فإذددت إصراراً وخرجت من النت وفتحت الويرد وبدأت أكتب فى الرد حتى لا يضيع زى كل مره وأبدأ من الأول ثم رجعت وفتحت النت وقلت بسم الله وسجلت الدخول وفتحت مكان الرد وعملت نسخ للموضوع من الويرد ورجعت وقلت بسم الله وعملت لصق وهنا فقط نزل الرد والله ياإخوان هذا ماحدث وقد حكيت لناجى مباشرة

أخيراًعندى ملاحظة أولاد دويح كلهم كتبو وراء بعض ماشاء الله مايدوكم عين فــــــــ ( العين حق )

ومن الحتانة سلااااااااااااااااام

الاخوة الكرام / تعليقا على ردودكم وخاصة الاخوة الدحيش وهيثم -- انا اهدانى احد الاخوة كتاب يسمى كرامات الاولياء والزول العملوا من الصوفية والكتاب ده يتناول الكرامات من ناحية علمية ودينية ويفرق بين الكرامات والخوارق (واذا كان انت متمسك فى درب الله 100% احتمال كبير تحدث لك كرامة واذا كان متمسك فى درب الله 200% ممكن ماتحصل لك -- على العموم عبده انا اعطيتوا نسخة من الكتاب -- وباذن الله الاسبوع القادم سوف ارسل اخر نسختين عندى للاخوة الدحيش وهيثم (الكتاب ده نادر الوجود ) .

عدد المساهمات : 26 تاريخ التسجيل : 22/04/2009

الشباب اللذيذين إزيكم..جميعاً..
عبد العزيز الدرّاش ..شيخ عبده ..الدحيش ..عاشق الحتانة..هيثم ..وصاحبي حسن ..

الموضوع شيق بلا شك لأنه لامس ذكريات..وجزء من عادات أهلنا بالذات في موضوع الإعتقاد في الأولياء..

إنتا طبعاً - يا شيخ عبده يا صديقنا العزيز- أخدتا الناحية الدينية والموقف من الصوفية..وأن في القصتين محاذير..بحسب وجهة نظرك..
لاكين انا شايف الأجمل في موضوع الحكايتين هو الناحية الثقافية..وهي ناحية اراها مهمة وهي طقس الزيارة للشيخ عمر..او ود أيوب..او غيرو..وهو كما قال أخونا الدراش.. ضريح عبارة عن قلعة..وحجارة..
يعني زيارة الأولياء..هذا الطقس الذي يعكس معتقدات وعادات مجتمعنا ..يحتاج لوقفة قليلة للتمعن فيه..
(مع إنو يا شيخ عبده مناطقنا دي كلها بشكل عام..حسب ظني أن المد الصوفي فيها ضعيف ، مقارنة بمناطق أخرى في السودان..رغم انها مناطق كانت في السابق مناطق عامرة بوجود الشيوخ والأولياء..!!!)..
- والوقفة التي أقصدها طبعاً لا تعني الإتفاق معه ولا الإختلاف-
وإنما فقط تناوله في محاولة للبحث إن امكن - مع إني أتفق مع الأخ هيثم في أن الموضوع فيه جانب نفسي ساهم في تلك الإعتقادات..المربوطة بالشيوخ روحياً..
وعليه ، ما ذكره عبد العزيز في حكاياته عجبني جداً..لأنه موضوع حافل وقيم..وحقيقي الموضوع وقع لي في جرح..
لانني منذ فترة وانا مهتم بأن كل ظاهرة من ظواهر حياة اهلنا وتراثهم..فيها كثير من الجمال عندما نفحصها ونتمعن فيها..
وعليه فليسمح لي ببعض الإضافات..أتمنى ان تساهم في توسيع الموضوع وفتح جوانب اخرى فيه:

الشيخ عمر ودبلال..
وهو عَلم معروف فقد ورد ذكره في كتاب "الطبقات" لود ضيف الله المعروف والذي حققه د. يوسف فضل..وهو كتاب سرد سير الأولياء الصالحين في السودان مع بعض قصص كراماتهم..وقد اورد ود ضيف الله الشيخ عمر في عدة مقامات..حسب تقسيم الكتاب من حيث اسماء الشيوخ ومن حيث أسماء المناطق..
والشيخ عمر هو والد الشيخ حامد اب عصاة أو" اب عصاةً سيف" كما عُرف .. وايضاً عُرف بالشيخ حامد "صقر الغِبيشاء"..وكل هذه الالقاب مربوطة بقصص كراماته..وهي مذكور بعضها في كتاب الطبقات..
الغريب أن الشيخ حامد -حسب ظني- إشتهر ومعروف عند اهل السودان أكثر من أبيه الشيخ عمر كما أن قبابه في حلة جبل أم علي أعلى واكبر من ضريح والده..!!!
وهذا الكلام اقوله لأن شهرة الشيخ حامد واسعة بحسب الإعتقاد الروحي في الأولياء..حتى أنها دخلت في بعض الأغاني..ومن فنانين خارج المنطقة..(يا حامد عصاية السيف هيا للمنديل أقيف - مصطفى مضوي في أغنية "المنديل" ) مثلاً..كما ورد في بعض الدوبيت..أيضاً..
حسب ظني -والله أعلم- ان ذلك يعود لدور الشيخ حامد في تعليم الدين وخلاويه التي تتلمذ فيها كثيرون واصبحوا شيوخ في مناطق أخرى..وكذلك عمراب أم علي -لاحقاً- وتعليمهم المبكر وإنتشارهم الواسع بالسودان ساهم في نشر سيرته..

قبة الشيخ عمر..
أنا لحدي وكت قريب حتى عرفتا إنو الكُشك الاخضر الذي يقع غرب السكة حديد (شمال المُطمر) هو تحديداً ضريح الشيخ عمر ود بلال..(وهذه النقطة أكدها د. منصور خالد في كتابه "السيرة الماجدية" الذي تعرض فيه الى سيرة العمراب..فقد ذكر عن الشيخ عمر ود بلال:
((...كان يقيم الشيخ عمر ود بلال في قرية المطمر التي تبعد نحو عشرة كيلومترات من أم علي حلة الجبل، وتوفي وقبر فيها وله قبر يزار وقد شيّد فوقه الراحل الأستاذ الدرديري محمد عثمان كشكاً في عام 1953م.)))..
يعني الكشك الأخضر هو تحديداً ضريح وقبر الشيخ عمر ود بلال العمرابي..والد الشيخ حامد..والدرديري محمد عثمان المذكور هنا هو من عمراب أم علي وقد كان عضو مجلس السيادة في الخمسينات..ولعلنا جميعنا نعرف او نسمع بجنينة الدرديري..التي تقع جنوب أم علي وتحديداً عند قرب مصب "وادي الدان"..فهو نفس الدرديري المذكور..

بينما القبة البيضاء التي تقع شرق السكة الحديد -وسط المقابر- شمال المطمر هي قبة الشيخ عمر أبو سبيب وهو أحد أحفاد الشيخ حامد والشيخ عمر..فابو سبيب جد أسرة آل ابو سبيب المعروفة بالمطمر وأمدرمان..وأذكر أن الشيخ حسن ابو سبيب -القطب الإتحادي المعروف- وفي لقاء له مع جريدة الصحافة عام 2004 ..عندما سألوه عن مزجه ما بين شغل السياسة وشغل الشيوخ ذكرما يلي:
(الشيوخ دي اصلا مسألة اسرية .. نحن اسرة دينية ..انا مولود في نهر النيل في منطقة المحمية .. جعليين عمراب وجدنا الشيخ حامد ابو عصا المشهور وضريحه في جبل ام علي وجدنا ابوسبيب ضريحو في حلة المطمر في المحمية ونشأنا في جو ديني .. اباؤنا كانوا علماء من تلاميذ الشيخ محمد البدوي وعندهم مسيد وخلاوي قرآن .. المناخ ده اسهم في نشأتي الدينية...)
إذن القبة البيضاء لعمر اب سبيب والكشك الاخضر لعمر ود بلال..ولكل واحد مريدين ولكل منهم حيران ومحبين..
وقد نلاحظ ان حتى إستخدام المقابر للدفن كان -وما زال عند البعض- يتم لإعتبارات العلاقة مع اي من العمرين..فمثلاً نحن أهلنا يحرصون على ان يدفنوا موتاهم بجوار اب سبيب..في الجزء شرق السكة حديد وأقصد مقابر المطمر..بينما ناس النخل او القلعة مثلاً يدفنون غرب السكة الحديد بإعتبار أنهم عمراب يتقربون من الشيخ عمر ود بلال.
على أي حال هذه النقطة تحتاج لتصحيح من الذين يعلمون في الموضوع أكثر مني.

(* وهنا اسمحوا لي بإرسال شكري مع التحية لصديقي "الدفعة" الأمين حسن مدني..الذي صححني ولفت إنتباهي الى أن الشيخ عمر ود بلال هو والد الشيخ حامد..وكان ذلك عندما نشرت موضوعاً عن (طقوس عيد الضحية والخروف في بلدنا) على موقع التشكيليين السودانيين قبل عام تقريباً..وكنت أشرت فيه الى ان الشيخ عمر قريب الشيخ حامد..فكان لتنبيه صديقي اللمين فرصة لمواصلة البحث في بعض سيرة العمراب والشيخ عمر..وما حول سيرتهم. وبالفعل تصحح لدي كثير مما كنت اجهله..).
----------------------------------
ود ديوب..
أما في ما يخص ود أيوب..
بالفعل كما ذكر صديقنا عبد العزيز ود دراش..نحن أيضاً كانوا اهلنا الكتواب يزورونه خاصة في موضوع الجروح المرضية..وأعني تلك الحبوب التي تصيب الجسم..
كانوا يسمونه (ود أيوب ..ودّار الحبوب)..اي معالج الجروح ..وأذكر انني رأيت مشهداً مثل ما ذكره عبد العزيز..لا زلت أتذكره..حيث أنني ذهبت مع أحدهم -على ما أظن الخير محمد أحمد ..المهم واحد من شبابنا- ذات مرة الى ضريح وديوب هذا ونحنا صغار..وهو قبر عادي يقع على قلعة صغيرة..جنوب جبل اللحو وشرق السكة الحديد -جنوب الكبري تحديداً-كما اشار صديقنا الدراش..
وأذكر هناك أخد ليهو حبة تراب من المكان..ومسح بيها على جروحه..وهو يقول او فيما معناه Sad

يابا يا ود ايوب..يا ودّار الحبوب..تبري جروحي..وعلي أزورك واقسَّم سبعة "مُطالات")..ههههه..والمُطّالة طبعاً هي حرف القُراصة..
المهم عادة ما تتم زيارة أولى يسمونها "للنديهة" والنديهة أن تنده وتنادي /مستشفعاً ببركات الشيخ وعبر بركاته في ذلك المكان..ان يصير لك كذا وكذا..
ثم يقوم المريض بعد شفائه بزيارة ود ايوب لان ذلك نذر..ومعه مجموعة أطفال ليوزع عليهم السبعة حبات قراصة دي ..كما ذكر الدراش تماماً..والغريبة أن زيارته على ما أظن تكون يوم السبت تحديداً..
ونقطة تحديد يوم معين من ايام الاسبوع لزيارة الشيخ دي بنلقاها عند شيوخ آخرين- أظن ان الشيخ نعيم (غرب كبوشية) أظن -ولست متأكد- ان زيارته محبزة يوم الأربعاء..
ودليلي على ذلك انهم يقولون (أربحات نعيم) اي يوم الاربعاء بتاعت الشيخ نعيم..كما أتذكر ان زيارة الشيخ عمر تكون يوم الأحد بالتحديد اكثر من الايام الأخرى..اقول لست متأكد لأن ذلك ربما مربوط بأيام الاسواق في كل منطقة ويوم السوق ربما تكون المواصلات أكثر سهولة.. والله أعلم.
فيا للعجب..وفي نفس الوقت يا للجمال..
حتى هذه اللحظة لا أدري في موضوع ود أيوب لماذا القُراصة..ولماذا سبعة حبات تحديداً؟؟ ولماذا تقسيمها على الأطفال تحديداً؟؟ ولا أدري من هو ود ديوب..وما هي سيرته..
ولماذا هو تحديداً الذي يذهبون إليه في حالة الجروح او الحبوب؟؟
بالتأكيد ذاكرة اهلنا الكبار تحفظ جزء من سيرته..وجزء من الحكاوي حوله..
فشكراً مرة أخرى لصديقي عبد العزيز ود دراش على حكاويك ولفتح هذه السيرة..الحافلة بالجمال..كونها تحكي جزء جميل من طقوس وعادات اهلنا..
------------
* والله يا هيثم ..قصة حبوبتكم القالت قولتها الجميلة دي Sad

هــوي يا ناس امشــو شوفوا ليكم شغلة انا ما المرة الشقـية البتمــوت في سنــة مجاعــة ) دي مرة فارسة عديل..والقصة بتوري إنو الناس ديل مرات يشككوك في تفسير أفعالهم ..يعني هسه هل دا صلاح؟؟ ام رجالة وعدم خوف من الموت؟؟ أم ثقة في النفس..زائدة لدرجة تقرّب تلامس الكُفر؟؟ كونها مي مرة شقية بتموت هسه في سنة مجاعة..!!
ياخ ديل ناس عجيبين جداً..

مع التحايا للجميع

الشكر لكل من ادلى بدلوه فى موضوع الكرامات؟
علاقتى بهذه المواضيع تكاد تكون معدومة لكن حقيقة استفدت من الكم الهائل من المعلومات التاريخية الواردة فى تعليق عبد العزيز عبد الماجد وتدعيمه لكلامة بالمصادر المعروفة ردا على دراش فلكم التحية اخوتى.

عدد المساهمات : 95 تاريخ التسجيل : 20/04/2009

لكم التحية جميعا الذين كتبوا حول الموضوع من مختلف النواحى وقد غطوا مشكورين كل النواحى الشرعية والذكرياتية والتراثية وقد إتفق الجميع على إنها عادات إندثرث واصبحت من الماضى بدليل انه لاتوجد الآن
زيارات الأضرحة الا نادرا قلل العلم والوعى بأمور الدين الشرعية من تلك الظواهر ، الحقيقة تذكرت طرفة
وقصة قبل سنوات وكان بصحبتى أخونا العزيز شيخ عبدو المسلمابى ، يتحرك بص حلة المحمية من شندى
وهو فى طريقه الى البلد والكل قد أخذ مكانه من نساء فى مقدمة البص ورجال متفرقين فى الوسط ، البص ملئ
بحوائج الناس وتدور القصص بينهم فى الطريق كان المزاح مع شيخ عبدو والونسة مستمرة ومعروف البص ببطئه يقطع الفيافى ويتوقف على الطريق يحل فى قرية قليلا ثم يتركها لغيرها مستأنفا سفره كل من نزل ودعه
الناس على أمل اللقاء به وفى قرية من القرى ركب البص إمرأتين وطفل يحملن معهن ثلاث رايات بيضاء ووعنبلوك أوعتود بالدارجى رفع الكمسارى العتود وهو يصيح باعلى صوته قال لى شيخ عبدو أوا تعلم ما
وحقيقة الأمر ؟ قلت له لا؟ قال لى أن هؤلاء النساء ذاهبات لزيارة قبة شيخ ما ؟ فقلت له ومادليلك على ذلك؟
قال : الرايات البيضاء تدل على إنهم قاصدات لزيارة ضريح ما لكن أى ضريح ما معروف ؟ وكانت ظاهرة نادرة كما ذكرنا فى هذا الزمان فقال لى عبدو اريد أن أدخل فى حوار مع هؤلاء النسوة ، فقلت له سوف تعرض
نفسك للضرب وإنى لك من الناصحين وأنا اضحك معه ، يتوفق البص فى قرية الضيقة وينزل ويترجل عبدو يذهب الى مقدمة البص
ويقول ( يانسوان سلام عليكم ) الجميع يصمتن ؟ وبعد قليل ردت المرة على عبدو : وعليكم السلام ، عبدو : على وين ماشات ياحاجات ؟ الجميع يصمتن ؟ ردت واحدة على شيخ عبدو : شوف( ياوليد) انت ولد صغير
عامل( دقينتك) دى داير تقولنا الزوارة حرام مش كدى؟ انتو أولاد قمتو جداد مابتعرفوا الحاجات دى نحن من زمان بنمشى الزوارة ! وماشين وماشين ! أمشى شوف شغلتك( شوفى عليك الله الشفع الصغار القايمين الأيام دى)
وهنا إنفجرنا من الضحك من هذا الحوار رجع عبدو وهو يضحك متبسما مسرورا قلنا له الحمدلله الما استخدمن
الرايات والأحذية ،،،،، الكل يضحك مع عبدو يتوقف البص فى قرية الكتواب نزلت وودعت صديقى عبدو على أمل اللقاء به فقلت له احترز من النسوة حتى تصل حلتك الحتانة ! ههههههها فما أدرى ماذا حصل بعد ذلك ، هل المعركة إستمرت أم إستسلم شيخ عبدو للنسوة ؟ القصة مهداه لعبدو ومداخلة منى ولكم التحية والود Very Happy

،،،،،

القصة زى ماذكر أخونا عبد المنعم النسوان كانن جايات من أم على وماشات زى ماقالن لى جدهن الشيخ عمر وسبب الإشكال إنو بعد ماقمنا ليهن من الكراسى على إعتبار إنهن نسوان سطحنا فوق البص قامن دايرات يناولنى الرايات قمت رفضت ولما داير أبدا معاهن الحوار قالن لى دا أبونا وذكرن الكلام القالو عبد المنعم قلت ليهن غايتو جدنا محمدين عمل ليه قبة فى السوق العربى وضحكنا

شكرا للجميع روح الحوار الثقافى والدينى بدون إسفاف وهناك قصة طريفة فيها عبر حدثت لما كنت أمام مسجد أهلنا الكتواب كان يوسف ود على ومعاه زول تانى نسيتو جايين من سوق الأحد راكبين جمال عينم وقعت على زول دخل ضريح الشيخ عمر قام قال ود......... خالف رجيلتك ويجيبولك فى القروش ( نبذو يعنى ) وخلا الزاير فات وعقل الجمل ونزل عشان يشيل الزوارة لما دخل القبة لقى قروش وحولها ثعبان كبير ملتف فاتح خشموا ويعاين ليه قام جارى يتمتم بصوت عالى ( التمتمة دى أكتبوها إنتو بقى ) ماقادر يتكلم وركب الجمل بى عقلتو وبدإ يضرب فيه هد هد هد والجمل قام برجل واحدة .

حكيت لى هذه القصة من أحد الإخوة على إساس إنها كرامة قلت ليه شوف ياشيخ يوسف إتعدى ولم يتحصن بغض النظر كون الشيخ ولى أم لا هو إنسان ذهب لى ربو نسأل الله أن يتقبله فى الصالحين وأنا أتحداك نذهب سويا فرفض ذهبنا أنا وحسين حسن أحمد الأمين للقبة وقلنا والله ياشيخ عمر إنت بشر لا تنفع ولاتضر ومابتملك الحبة بل محتاج الناس تدعوا ليك والسلام وأهو نحنا عايشين ماجاتنا الحبة

ومن الحتانة سلااااااااااااااااااااااااام

هذا الموضوع جدير بأن يفتح مرات و مرات .. لأن المشاركة فيه كانت قمة فى الروعة .. بداية من مشاركة الأخ الدراش الذى نفتقد مشاركاته الممتعة هذه الايام .. مروراً بمداخلات الأخ المسلمابى و الدحيش و ناديه .. عبوراً بكرامات حبوبات هيثم .. ثم السرد الشيق من الاخ عبد العزيز عبد الماجد .. و القصة اللذيذة المضحكة من أخونا عبد المنعم ..

أود أن أحكى هنا قصتين .. الاولى منقولة من جريدة الصحافة .. و الثانية حكاها لنا الوالد عوض دويح ..

القصة الاولى بتقول بتحكى عن أول بعاتيه فى التاريخ ..

تقول القصة إن رجلاً ترك خادمته وتُدعى بقّارة أمانة عند شيخ من الشيوخ المعروفين بالصلاح والكرامات... وعندما عاد الرجل من سفره كان الموت قد اختطف بقارة (يعني سيد الوداعة شال وداعتو)... غير أن الرجل -ويبدو أنه كان من نوعية ود أب شبك- شكك في قول الشيخ مما اضطر هذا الأخير الذهاب معه الى المقابر... وعندما وقفا بجانب قبر بقارة ناداها الشيخ قائلاً: قومي يا بقارة... سيدك رجع! ويبدو أن الله تعالى أراد أن يبرئ عبده الصالح فإذ ببقارة (فرترب) تنتصب واقفة أمام الرجلين ويقال إنها أنزلت الجزء من الكفن الذي كان يغطي رأسها دلالة إحترام سيدها، وقالت مخاطبة سيدها: إن شاء يا سيدي تكون رجعت سالم وغانم؟ ما يهمنا سلم الرجل الصالح الجارية لسيدها وقال: أها يا أخوي دي خادمك ومع السلامة. «غادر الشيخ المقابر وفي نفس اللحظة غادرت الروح جسم بقارة ووقعت (فطيسة كنكشة)... وبهذا تم تسجيل بقارة كأول (بعاتية) في تاريخ العالم

وهذه القصة تذكرنى بالقصة الثانية التى تحكى عن واحد بتاع صلبطة برضو ..

حكى لنا الوالد عن رجل يدعى الجعيص .. كان يسكن فى قرية من قرى شندى .. فحدث أنه فى يوم من الايام إتصلبط ليهو فى عجل بتاع واحد من ناس منطقتو .. كل واحد فيهم يقول العجل ده حقو .. المشكلة كبرت .. و إتلموا الناس .. و لم يفلح تدخل الأجاويد فى حل المشكلة .. فكل طرف يصر على ملكيته للعجل . قام واحد من ناس المنطقة قال يا اخوانا مافى حلل إلا نجيب المصحف نحلف الناس ديل .. فقالو للجعيص تحلف فوق المصحف ؟ قال أيوه بحلف فوق المصحف .. فقال لهم صاحب العجل : يا اخوانا الزول ده نجس ما بخاف من الله .. انا ما دايرو يحلف على المصحف .. دايرو يمشى يخت إيدو فوق قبر الشيخ سلمان العوضيه و يحلف إنو العجل ده حقو ..

فقال لهم الجعيص آى بحلف فوق قبر الشيخ سلمان .

فذهبوا جميعاً إلى قبر الشيخ .. و فى الطريق و قبل أن يصلوا إلى قبر الشيخ قال أحد الإشخاص للجعيص : يا خوى يالجعيص اخير ليك ترجع .. لأنو الزول إن بقى ختى إيدو فوق قبر الشيخ و حلف بالكضب ، إيدو بتلصق فوق القبر .

فقال لهم الجعيص : أنا حا أمشى و اخت إيدى فوق قبر الشيخ و أحلف .. و الله والله إن مسك إيدى إلا أجيبو ليكم بره ..

عندها إحتار صاحب التور و قال لهم : يا اخوانا ارجعاكم .. انا العجل ده خليتو تب .. ما بدورو ...

عدد المساهمات : 26 تاريخ التسجيل : 22/04/2009

من كرامات ابونا الشيخ عمر وابونا الشيخ حامد Shaikh Omer1

هذه صورة لضريح الشيخ عمر ود بلال- الذي بناه الدرديري محمد عثمان عام 53 بحسب رواية منصور خالد.

وسلام وتحايا لكل من مر من هنا..
------------------------------
عزيزنا عاشق الحتانة..كيف حالك..

في الحكايتين ديل واضح جداً درجة الإعتقاد عند البعض في مسالة الأولياء.
حكاية الجعيص والسلبطة في العجل، وكون أن الحل الفاصل بدلاً من كتاب الله العزيز
هو الحليفة على قبر "الشيخ سلمان العُوَضي "، وهي فعلاً إشارة على مدى الإعتقاد عند هؤلاء.
الشيخ سلمان العوضي منطقة شمال غرب شندي -أظنه في منطقة الجوير ؟؟-
وهو شيخ معروف ولعل أغاني المنطقة ذكرته كثيراً. فمثلاً علي إبراهيم اللحو في أغنيته المعروفة(يا غزلية)
ذكر (يا البادراب بنيَّة بنيَّة..ويا سلمان راجل العوضية).
فالغناء الشعبي كثيراً ما يشير إلى هؤلاء الأولياء وذلك إشارة إلى مكانتهم عند الناس والكلام دا طبعاً في فترات سابقة..
أذكر أغنية سيرة في البلد تقول (يا سلمان تقيفولو..يدخل بيتو بي سرورو ؟؟ او حاجة زي دي).

منذ فترة وانا أعيد الإستماع إلى أغنيات الفنان الشعبي - عمر الحواري- الذي يتغنى بأغنيات فرقة حِميرا
فواضح جداً أن معظم أغاني حِميرا كانت إلى جانب مدحها لشخصيات لها مكانتها في منطقة الجعليين فتعدد
صفاتهم وكرمهم ومواقفهم المشهودة
فهي أيضاً تعظِّم الشيوخ والأولياء، وعبر الإستنجاد بهم في شكل تمنيات.
منها أغنية "يا صلاح أب حراز":
يا صلاح اب حراز
همِّوا بي ..
يعود الشريف من الحجاز
تقول:
يا الصُلاح أهل القُبب
انا بقول يا البدوي أب شنب
يحضر ليك الطرب
يوم سبعة وعشرين في رجب

جلس الباشا ورطن
إتصنتو يا أهل الفِطن
أكان ما إنقلب الزمن
عقيدتنا يا سيدي الحسن
هِمِّوا بي..يعود شريف من الحجاز

ويبدو هذا التناول أكثر وضوحاً في اغنية "العظيم الشان" التي تمجّد الختم عثمان:

(دا العظيم في الشان
جاني القاش ملان
جناح جبرين فوق الخَتِم عثمان

شدولو فوق خيلو
ومرقوا النحاس هيلو
يابا يا حليلو
البياباكُن يا ويلو
جناح جبرين فوق الخَتِم عثمان

يا يابا اب عصاة ..قُبة الجوير
يا مرت سِنكات يا أم باعاً طويل
قول لي اولاد بشير
كلِّم ود نصير
إن شاء الله الداعي خير
جناح جبرين فوق الختِم عثمان

يُمة رِيد الخير
بِلحق هواي بالليل
في الطليان بِغِير
نشلني من البير
جناح جبرين فوق الختِم عثمان

جانا سايق الفون والنحاس شمسان
الليلة قاموا الخلفاء وقفوا ريقان
شال الفاتحة ليهم طيّر الطِليان
جناح جبرين فوق الختِم عثمان

يا سِت الشرف
سِت الجبل السرف
جونا كف وكف
وقّفونا صف
والبيازانا يا سيدي أديهو كف
جناح جبرين فوق الختِم عثمان

وين المِتلُو هو
ومين البشبهو
شالو نمرة الليل ودخلوا يفتشو
ونهرت الملكة مين جالس مِتلوهو
جناح جبرين فوق الختِم عثمان)

وحقيقة اغاني حميرا- بإعتبارها أغاني ذات مكانة عند الجعليين وتطربهم جدا كلماتها- أغلبها تتناول السادة الختمية.
والختمية هم صوفية ولهم مكانتهم تصل عند البعض درجة الإعتقاد فيهم.
لاحظ عبارة "شال الفاتحة ليهم طيّر الطليان"..!!! ولاحظ جناح جبريل يغطي الختم عثمان.
اي أنه رجل واصل له مميزات خاصة من صلاحه. ولاحظ عبارة "البيازانا يا سيدي أديهو كف"
ولا حظ عبارة "يا مرت سنكات يا ام باعاً طويل" والمقصودة هي السيدة مريم بت الميرغني المعروفة بـ "مرت سنكات".

على اي حال الموضوع يطول ويحتاج لمزيد من التناول. لي معه عودة متى ما وجدت الفرصة. ولكن بشكل عام واضح تماماً مكانة الصوفية عند الناس.بغض النظر طبعاً عن الراي فيهم إختلافاً كان او إتفاق.

سلام وتحايا ..
وكل عام وانتم بخير..

يامجدى كيف عرفتو ا الجعيص متصبط يمكن العجل حقوا والتانى متصلبط

ومن الحتانة سلاااااااااااااااااااام

» نسب العمراب آل الشيخ علي
» نسب العمراب آل الشيخ علي
» قصة الشيخ الوقور وركاب القطار
» حباب الخال الشيخ الطيب (أبو أمير )
» قصه رووعه مع الشيخ محمد العريفي يحكيها بنفسه