سلام من ذو الفقار

عدد المساهمات : 9 تاريخ التسجيل : 27/05/2009

االسلام عليكم اخوتي مشتاق بالحيل
أيا بناء بلدي البشدوا الحيل
جاكم ذو الفقار زول قعاد عديل
راكب أجود أنواع الخيل
علوقة محبة والفة ماهو عيش وبليل

مرحب أهل الديار .. أهل الحديث الحالى باقى رزين

أسياد القوافى .. المن قامو ما جابوهو داك الشين

حبابك ذو الفقار 000 اتاخرت ليه في الطله

حباب ود البلد0000 مز د ا نا بيك الحله

ادخل علي الديوان0000 تلقاها عامره الشله

مشتاقه جد لي شوفتك 000 ويا دوووووبه سيفا انسله

مرحب حباب الزين إتفضل على الراكوبة

باردة وزينة سمح نساما ضاربة هبوبا

إنت الزين وكلك زين وإنت ياكا فارس الحوبة

إتوهط عديل وإتحكر وسط الدائرة وأقلب هوبا

مرحب حباب الزين مرحب حبابو حبابو

من زمان ماسجل ماعرفنا إيه أسبابو

فرحانين عديل صالونا عادلو شبابو

ماتبقى زى القبلك بعد الطلة فرو وغابو

مرحب حباب الزين مرحب خريفنا الزارنا

راجنك زمن واليلة عمرت دارنا

ماهوكتير عليك نكتب نقول مسدارنا

إنت ياكا أخونا وإنت حبيبنا وإنت رفيق دربنا وجارنا

مرحب حباب الزين مرحب نجمنا الطل

مشتاقين كتير لى شوفتك ويادوبو شوقنا إتبل

القعدات لذيذة معاك و إصلو مابتتمل

يلا كتر نظمك أبدأ قول بسم الله

و الله يا عبده .. لقيتك زولاً مو هويّن

قارعت عمك فى الصعب و الهين

و بقيت تقول فوق الكلام البيّن

دى موهبه .. وللا عشان بقيت متديّن ؟

حباب الجودوا المسدار **** وحبابن كل من دخل الدار
حباب سراج الفارس المغوار*** وحباب سراج الاسد النتار
حباب عبده درٌاج الواقفة للمشوار**** وحباب عبده صلاٌح الكاسرة مسمار
حباب مجدي الحافظ لحقوق الجار **** وحبابوا مجدي حاشا مو فشٌار
حباب كل من دخل وزار ***** وحباب ذو الفقار سيف علي الكرار lol!

مرحب سلام
مرحب سلام
يا ناس عظام

مرحب حباب نفس الزهر
ريق النحل
صافى الحباب

مرحب حباب زولا سمح
ناضر صبح
كامل انساب
مرحب حباب
ريحة الدعاش
زمن اليباب

مرحب حباب ناسا عظام
ناسا تشع وسط الظلام
وناس تبين وسط الزحام

ياناس عظام
يا ناس عظام

ناساً دوام تنده تناديك بالســــــلام ناساً عزاز أهل الكرم أهل الوئام
ما فينا زولاً إلا كانت قامتو عالية وبســـــــمتو وطيب الكـــــــلام
مليــــــــــانة فينا نفوسنــا عــزة ماليــــاها أخـــــــلاقنا العـــــــلام

ياعبده
الكلام الفصيح مو محتاجلو لكراسة
والحديث السمح والزين مو دايرلو دراسة
والبحر الغريق بترسوهو بلا غواصة...
اقيف يا زول........
نحنا السم النجوع كم شتت قبايلا جاتو
نحنا الرعد الضرب الصعيد وشرقت مطراتو
اهل الكرم والجود وقت الضيق يمد جنحاتو
ويا الحتانة حبك فى القلوب كم غرس ونبتت شوكاتو..........

[size=24] اعجبنى المرور الجميل والشيق من الجميع
اعجبنى الترحيب والمداخلات المرهفة الحس
اعجبنى ان الجميع قادر اذا ما اراد ان ينسج الكلمات
بلاغة وفصاحة ويجود بالدرر وصفا ونظما ويغزل الحروف
جناسا وسجعا,,,, فقد اجدتوا نثرا وشعرا

اعيدت هذه المداخلات والمشاركات لنكتشف الكثير منكم من يطوعون الكلمات
وينظمون القوافى والذين ينثرون الكلمات نثرا منغما مموسقا ,,,,,,,

اتمنى ان تمتد المساجلات والتداخلات الجميلة,,,, لكم كل الشكر ,,,لكم كل الشكر ,,, لكم كل الشكر

ومن الحتانة سلاأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأم
[/siz
or]

عاجبانى القعده الكانت .. فوق قوز أمونه

و عاجبانى اللمه الكانت .. لى لعبة مجنونه

واحدين راجين القيم .. و الشوق مالى عيونا

و دقلاش خاتى السفه .. كبيييره .. ماهى صغيرونه

سراج بهناكَ يمطـّـر فى سعوطو .. مـِدينا العفـّـونه

إلا الصادق ماسك هارمونيكا .. من خشمو النغمه حنونه

***

و نحن بنلعب ... جابو الصينيه .. كبيره و مزيونه

كسره و لحمه و صلطه .. و عيشاً حاااار .. جابوهو من الطابونه

و كبو الكستر فوق للرز .. قالوا أخير معجونه

و عشانا مديدة حلبه ... حلوه و ما زايد عطرونا

بى مديدة الحلبة البارده إتعشينا ... و تانى كمان زادونا

***

حليلها طبيعتنا السمحة .. البى موية النيل معطونه

ما قايلين بتوه أقدامنا .. و نبقى بعاد من دونا

إلا بنرجع يوم باكر .. و تفيض أشواقنا المخزونه

دى البلد الجوه قلوبنا .. ما بنقبل تصبح محزونه

دى البلد الجوه قلوبنا .. ما بنقبل تصبح محزونه

والله يا سراج ويا الصادق ويا عبدو عاشق الحتانة سطر ووثق لكم ذكرى جميلة يلا ورونا وان شاء الله يوم شكر العاشق مايجى ,,,

منتظرين الرد من سراج وابو عروة فقد كانت ذكرى جميلة فى بيوتهم العامرة دوما ان شاء الله

ومنتظرين دراش يحكى لنا شىء من تلك الايام الجميلة واجترار تلك الايا م ينعش الروح ويرد لها العافية

فى تلك الايام , فى زواج ابن الاخت الشفيع (غليه رحمة الله) جلس الجميع فى وقت الغداء فى شكل حلقات الا من تطوع بتوفير او تقدبم الخدمات ..صبيان لتقديم الماء وصبية ينتظرون وفى ايديهم اليمنى اباريق الغسيل وفى الاخرى نصف صابونة ,, احد الشباب يحمل جردل ام رقيقة والكل يريد الملاح ولكنه يتفادى ان ينادى خوفا من (الكمشة) ومن سيلان( ام رقيقة) على ملابسه النظيفة فى ذهاب واياب الكمشة من الجردل لقدح الكسرة الكبير(العشاى) والذى يتوسط الصينية وبجانبه صحن اللحم وبجانبهما بعض الصحانة من صلطات سوداء وخضراء وصحن ظريييييف (كمونية) وانا احب الكمونية نجيضة ونية(مرارة)وبهذه المناسبة (مداخلة صغيرة) ارسلتنى امى وانا كنت فى عمر حاملى الاباريق والصابونة
لحسن ود اللمين (يوم ضبيحة ) عشان اجيب نصف كيلو لحم وكوم مرارة ,, اخذت اللحمة وانا راجع
الحدية كحلتنى ليك وهى فى علاها الفوق وماهى الا ثوان و( كفففففف) تخطف اكبر عظم وترمى منى الكورية فى الارض ,,, توسدت اللحيمات الارض واتضرضرت الكمونية بالتراب ,, ضحك بعض الحضور وانا خليت الكورية فى محلها ورجعت ابكى واشكى الحدية لى الله ولى امى ,, حسن ود اللمين (معلم جزارى منطقة المحمية عامة بشهود الجميع)طلب احضار الكورية المكندكة وامر بغسلها ووضع فيها نص لحمة وكوم مرارة وارسلها لنا فى البيت جزاه الله خيرا وبارك له فى ذريته ,,, كرهت اللحمة والكرشة ورفضت الذهاب للجزارة فترة من الزمن ولكن جبرنى ظرف للوالدة واجبرت للذهاب لطربيزة الضبيحة وانا كره لذلك , اخذت المعلوم (نصف وكوم مرارة)وانا راجع تذكرت (الحدية القبيحة) اخددتنى رجفة ولكن تمالكت وانا ماخذ حذرى ومسرع الخطى مع ان الكورية هذه المرة عليها غطاء (كان ذلك شرطى الاساسى لذهابى للجزارة مرة ثانبة) تذكرت الحدية وشنقت فى السماء عشان اشوف موقع الحدية واعمل دفاعاتى ومصداتى واحسنت مسكاتى وانا انظر الى السماء واجوبه مشرقا ومغربا خائفا من ان تعمل عملتها السودة ,, انا فى هذا الحال ومركز فى السماء ولكن هذه المرة جات من جهة تانية ,كان فى عود موضوع على جانب بيت عمى احمد ود اللمين , وانا فى تركيزى وخوفى من الحدية , العود يثر لى فى رجلى وفجأة اكون على الارض والكورية تطير بعيد هناك واللحيمات هناك.
لم اعوض بل نلت علقة شديدة هذه المرة من الوالدة ومنذ ذلك اليوم وحتى وانا فى الغربة عندما اذهب لشراء اللحمة لازم اتأكد من ان الجو خالى والسماء صافية حتى من الحمام .
اعود لزواج الشفيع والجميع جلوس والكل شمر عن ساعديه استعدادا لصافرة البداية واذا بالخال عبد المجيد محمد عبدالرحيم يجى حاملا صينبة مليانة بالفجل ومطلوب منه ان يوزع الفجل على جميع الصوانى ولم يعجبه كثرة الناس فى المجموعة الواحدة فاخذ يصيح ويستنكر(يا جماعة فجلتو.. فجلتو..فجلتو)

ومن الحتانة سلااااااااااااااااااااااااااااااااااااااااااااااااااااااااااااااااااااااااااااااااااااام

كلمة عاشق يامجدينا فيك والله صغيرونة
كلماتك فى الحتانة رائعة جميلة وموزونة
كلمات عاشق أشواقوا كتيرة المدفونة
ياحليل سهرات قوز أمونة
وياحليلا كمان المجنونة
وفى حمار مكى ياحليل مشوار الطاحونة
بتذكر
يوم السبت والقمرة حقيقة صغيرونة
من بربور بهنس جاتنا العيفونة
ومرة كمان أحفاد جارة وفى الذاكرة فعالم مخزونة
لفطيراَ حاااااااار من صاج كلتوم عزمونا
ويوم نتغدى على الديوان
كل الحبان شالوا صوانيهم جونا
شيتاً كستر وفوقوا مفلفل
وأبو التيمان مابدور المعجونة
وأحمد يوسف عامل شفتة
من كل الجابو لازم تدونا
لازم موز أوطحنية إن شاء الله كمان لو صابونة
ويوم الزين للقانون كسر
حرر عالم مسجونة
وفى حرينا الدفة دوام لياسر مضمونة
وفى الطائرة العامل سنير البورت أخونا
وجماعة إتنين نطوا الحيطة
والله يمين ماشافونا
شالوا شوية حاجات شعيرية معاها مربى
وبالشباك يلا سريع مايسكونا
حتانة بلدنا الحلوة
والله محال مابنخونا
أجيال وأجيال فاتت بعدت
ولليلة الشوق مالى عيونا
دى البلد الجوه قلوبنا
حياتنا محال تصلح دونا
دى البلد الجوة قلوبنا
حياتنا محال تصلح دونا

عبده مكتبة المجرة 3/10/2009

قصيدتك عينة ياعبده والى الامام مع ابداعات الحتانة وذو الفقار .

» من الرياض سلام للحتانه سلام
» سلام يا اهلنا
» سلام لاهلى فى الحتانة
» من جبال الحتانة سلام
» سلام ياناس الحتانة والمطمر