قرية الحتانة
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.


من الحتانه سلاااااااااااااااااااااااااااااااااااااااااااااااااااااااااااااام
 
الرئيسيةالرئيسية  أحدث الصورأحدث الصور  التسجيلالتسجيل  دخولدخول  

 

 من روائع محمد ود بادى

اذهب الى الأسفل 
كاتب الموضوعرسالة
عاشق الحتانة
مشرف قسم مرقنبو قرنبو
عاشق الحتانة


عدد المساهمات : 402
تاريخ التسجيل : 27/03/2009

من روائع محمد ود بادى Empty
مُساهمةموضوع: من روائع محمد ود بادى   من روائع محمد ود بادى I_icon_minitimeالسبت مايو 23, 2009 4:41 am


الرســـــالة

بت الخير يجيك الخير

وصل جوابك الكاتباهو للولد الحتالي

وكان الظن ترسلي ليه هين هينين من البركاوي

داك الطعمو حالي

ولو بالقل شخاليب دوم

وهنا والله ني ومسيخ وغالي

سؤالك يمة عن احوالي

كان شفتيها تغنيك عن سؤالي

انا اتوكرت في قلب البنادر

زي غريب شرقان مدلدل في الدوالي

جات شايلاني حرّة جوف

انا اتحديت مجالا مومجالي

مصايب الجامعة اكبر من جميع الشفتو

ولا سمعتو في ايام الخوالي

قعاد الكرسي كان شفتيهو

ورم ساقي زي سيد الزلالي

اقلب في الدفاتر من صباحا بدري

لامن تمسي ما بنسي انشغالي

اسوق الليل تحت ضوء الكهارب

وديمة هارب من فراشي

وهادو حالي

ده كلو عشان اجيب نمرا

انافس بيها واستر بيها حالي

والله عاد حالة ما بتسر البال

ومن يوم ما هديت ما انسر بالي

سلاطين العلم يايمة

ينسوا العشرة في فد يوم

يدفروك بره زي دفر الطبالي

وخايف من اجيك مرفود

وهادي الفكرة من ما جيت

معشعشه في خيالي

واخير افتح اضانك

قبل ما تلقي فوق اضني

ملويات حبالي

وكان حصل القدر يايمة لا تلوموني

لومي علي البنادر نورا اقوي من احتمالي

بناتا فيها رويانات جسومن بالدهون

تلصف بلا جلود السحالي

سبيبن ديمة بالحزم الكبار مبهول مردم

فوق قفاهن..وا حلالي

صدورن طامحة زي موية الدميري

الهايجي تكشح في العوالي

عيونن واسعة تبلع مية

زي ولدك تشرك للموحد والضلالي

وحاتك ضُمّه ما بقدر عليهن

ساعة اقيف قدامن

انكس راسي بي قدري وجلالي

مشيهن سوا زي سرب الغزال

لكن نفورن مو غزالي

عدادن مابخبرو

الا وين ما امشي الاقاهن قبالي

وقصاصن ينقّر بي عصاتو

ومايفرّق دربهن

من بين دريبات القماري

بخورن في سماء البندر

يدوخ متل مسك العشاري

رقيصن ينهزنو بلا الفلو

الّلماتو غابن منو في ضل الضهاري

يجمّع في قفاهو وينطرح

يتمطّى تتحتحت مفاصلو

وده ياهو الفاك جباري

دلاليكن تجيب الضلّ

علي متاهات الضهاري

غُناين اصلو ما سمعنابو

كنت بقول ليكي الا هسع ما ني طاري

وطنبورن مبرقع وحسو فاقع

لا في كنتر لا ودع فوقو بيراري

عشوقن في الرقيص

يتلوي متل سيد المغص

يوم يبقي في حالة طوارئ

والمداين ديمة فايري

زي وحوشا في البراري

والمـآسي كتيرة حاصلة

والمكضب يلاقي بوليس السواري

عاد دي حالتا بقدر اتستر معاها

خلاف احاكي الناس واجاري؟

وانتو راجيني يوم اجيكم بشهادتي

وينبسط ضهري وكباري

وبرضو خايفين من اجيكم بي غربية

وفي خجل قايد صغاري

والقدر بي غادي كاتب ليه شيتا

لاني حاري ولا ني طاري


حاجة واحدة تكون في علمك

اني جايي وتاني راجع لي دياري

وياني حمّيد القديم

الا بس فاقد حجابي وراح سواري

يمة كتري من رضاكي

وسلميلي علي المعاكي

وقولي لي حبوبة زيك

نحن شبنا وماك براكي

سلميلي علي جروفنا وحتى وزينا البكاكي

سلميلي علي بناتنا

وقولي ليهن ماني ناسي

طاري شلاخا مواسي

زي شقوق بيتاً سداسي

طاري نقشا فوق خدودن

بين ضفايرو وشوفو قاسي

جسمي في البندر ممدد الا بينكم بي حواسي

سلميلي علي البكادن والبشتت في التقاوي

في الكرد محراتو قالع

وصوتو فوق تيرانو عاوي

ماحزم بقجة ثيابو وقام فجر لاحق اللواري

اخيرو يحفر في جروفو

مالو مال حفر المجاري

سلميلي علي الضرايح

والفضل من الخلاوي

والفقير الفوق حصبرو

يكتب البخرة ويداوي

مع السلامة ودعتك الله

ولي وصيتك ماني ناسي

لي شفقتك مافي داعي

وابقي عشرة الراعي واعي

في بحور اهل البنادر من زمن طالق شراعي

كان نحجت بجيك غانم

وكان فشلت بجيك ضراعي

الرجوع الى أعلى الصفحة اذهب الى الأسفل
 
من روائع محمد ود بادى
الرجوع الى أعلى الصفحة 
صفحة 1 من اصل 1
 مواضيع مماثلة
-
» من أغاني الحقيبة - روائع الكلم
» ترحيب بلاخ يوسف محمد الامين محمد ابراهيم
» روائع ارض البطانة
» من روائع سيد خليفة
» من روائع صور الحتانة

صلاحيات هذا المنتدى:لاتستطيع الرد على المواضيع في هذا المنتدى
قرية الحتانة :: الفئة الأولى :: بيت القصــيد-
انتقل الى: