العيد بعيد

العيد بعيد

العيد.. بعيد ..والفرحة أشوفا.. رهـــاب.. رهـــاب
والدنيا مسودة وكئيبة .. تملى ماليها الضبــــــــــــاب

وأنا فى المتاهات والضياع شقيشق أقبــل مافى بـاب
تعبت من فرط الألم .. ومن كترة الهم راسى شـــــاب

وين الزمان الكان سعيد .. لا وحدة لا هم لا إغــتراب
وين الليالى الحالمة ديك .. والقعدة ما بين الصــحاب

ناسين هموم الدنيــا .. ما بنعرف معانـى الإكتئــــــاب
تكفينا قراصة قمح .. بالويكى أحلـى مـن الكبـــــــاب

وقعداتنا فى ضو القمر ..و شلتنا من خيـرة الشبـــاب
بينن تحس بى روعة الإلفة .. وحقيقـة الإنتســـــاب

فى الحارة تلقاهم أسود سنو الرماح سحــبو الحـراب
وفى فرحتك دقو الطبول أشجوك بى نغـم الربــــــاب

ما هُنْتَ يوم دايماً عزيز وقدْرَكْ معَّلى مـع السحــــاب
والليلى من كل الكؤؤس تملا وتكيل مُرَّ الشــــــــراب

من يوم بريت درب السفر وبقيت جارى ورا السراب
لا اتحقق المنى والأمل .. ومستقبلك كاسى الضبـــاب

وبقيت تشابى على الرجوع وتمنِّى فى الروح بالإياب
تلقى الظروف قاسية وعنيدة رجاك فى تذليلا خـــاب

وترجع تصارع فى الهموم والغربة والضنى والعذاب
ما ليكّ غير ترجـو الرحيم تدعوهو علو دعاك يجاب

يشيلو رزقك من هنا .. ويكون مع الأهل .. القــــراب
ويتلم من تانى الشمل .. وينسد باب الإغتــــــــــراب

منقول من منتديات البركل بقلم الطيب طمبل

قصيدة روعة والله يا عبدو انا في البداية افتكرتك كا تبها انت .