يا البشير فيك ما مفرطين

بسم الوطن الدابو صحح للمسار
وبسم الوطن الدابو اتمطق حلاوة الانتصار وبدأ العمار
يكفي الدمار بيروت وبغداد وقندهار وزي ديل كتار
دي وصية للساسة الكبار النختلف يمنه ويسار
بس بالهداوه وبالحوار لا مدت ايد لا ضرب نار
ممكن نصل حد الكجار بس مانكون في يوم صغار
جايينا هم اكبر من الكرسي الرحيب
وقدامنا غم يتساوي فيهو عدو وحبيب
الفرصة جات النتفق أنا وابن عمي علي الغريب
بعدين كدي النجي نختلف بعد الجراحات ماتطيب
بعد الدخيل الجاي ظنو كمان يخيب
يلقانا قشطة علي عسل يلقانا كباية حليب
يلقانا فنجان جبنه فوق هباب في ضل الدليب
يلقانا دخان الرصاص حولناه نسمه وهمبريب
ويلقانا سودانية صح لا فينا جساس لا كليب
ايدينا في ايدين بعض يلقانا فوق فد عنقريب
نتناجا في الوحده السلام نتناجا في العشم القريب
بعدين كدي النجي نختلف بعد الجراحات ماتطيب
يامسلمين الراس منكس لا متين
دارفور منارة الصالحين نرميها في حضن الهجين
وحنمشي وين
اقسمت بالله العظيم وأقسم يمين
لو شارون لقينا يصلي في جامع الضعين
يا البشير فيك ما مفرطين
أقسمت بالله العظيم وأقسم يمين
لو بوش يأم الجمعة جوة معسكر أبو شوكة الحزين
يا البشير فيك ما مفرطين
أقسمت بالله العظيم وأقسم يمين
لو اولبرايت جات منقبه صايمة صوم الزاهدين
يا البشير فيك ما مفرطين
أقسمت بالله العظيم وأقسم يمين
لو كان بلير يدينا نبذه عن الرسول واصحابو عن موته وحنين
يا البشير فيك ما مفرطين
أقسمت بالله العظيم وأقسم يمين
لو مجلس الامن اجتمع في مكة جوها معمرين
يا البشير فيك ما مفرطين
ماتصدقوهم ديل أبالسه ومجرمين
ديل حكمتم فرق تسد ديل مكمن الحقد الدفين
قوات سلام هن السلام جابوهو وين وزرعوهو وين وعرفوهو وين
نحنا السلام بنعرفو بس في دولتين ياطوكيو يا اما بكين


حاتم حسن الدابي[/center]