(الحتانة ) بلدنا الجميلة - فتحية عثمان

عدد المساهمات : 11 تاريخ التسجيل : 03/04/2009

اهديكم هذه القصيده التي كتبتها الأخت فتحية عثمان محمددين و هي في الصف السادس

حتـــــــــانة الجــــمــيلة مــــا فــي ليـــــها مثــــــــيل
و هي مــحــحبــوبـة عند كــــل صغــيــر و كبـــيــر
من الشرق الهضاب حاداها و من الغرب كمان النيل
بالكـرم هــي معروفة بتكرم كــــــل عــــابر سبيــــل
ثوب العفاف ملبوس عند الشبــــــاب و عند كل جيل
البخون الشرف و الأمانه في الحتـــــانة ماليهو كفيل
التــــقـوى و الإيــــمان فــــي بلدنــا ليهــو دلــيـــــل
الصـــــــلاة و الــصـــيـــــام كـــمــان زكــاة نقـــدين
الله يحفظك يا بلدنا و تعلمي الشبــــــاب أصول الدين

و التحية للأخت فتحية و أسرتها

أعجب شى أنو الكاتبة العمة فتحية والأعجب من ذلك إحتفاظكم بيها كل هذه السنين شكراً وإلى الأمام

ياناجي .....صحي الحكاية دي ..وراثة والله شنو ....؟
ماشاء الله ..سادسة إبتدائي ....يعني لو كان في مواصلة في كتابة الشعر كان فاتت روضة الحاج ....
وبالمناسبة دي ..يا أم محمد ..نحن زمان لمن كنا صغار ..كنا بنسمع أغاني من بنات الحتانة ما قاعد نسمعها في أي مكان آخر ...ممكن تنزلوها لينا في المنتدى ..لو متذكرين ...
واعتقد إنو السيد / مدير المنتدى أشار لواحدة منهم وهي ( الحتانة الجنة ...الشرق النيل )
لو سمحتو لو في زول حافظة كاملة ينزلها لينا ..

التحية لبنت العمة فتحية وربنا يوفقك ومنتظرين المزيد .

بس انا سمعت انو( الحتانة الجنة الشرق النيل ) هي اصلا كانت ام علي بس نحن حرفناها .
الكلام ده صحي ؟؟ في واحد من ناس ام علي قال الكلام ده.

كلامك صاح يا أيمن وسألت ماجدة وهى التى كانت بتغنيها قالت إنو أصلا قاطعاتنها بنات أم على

يا جماعة بنات أم علي ....بنات الحتانة ...عايزين زول ينزلها لينا ...

على كل حال ماتزعل أنا عندى شريط منزلو فى الجهاز فيه أغانى البنات بصوت أمال محمد البشير نسأل الله لها الشفاء وماجده وغيرهم وفبه أحمد يوسف وسراج والصادق بغنو والكلام ده عرس عبد العزيز البشير ممكن تأخده لكن ماقدرت أنزلو فى الموقع وحتى عندى البنينة بصوت نفيسة البشير وبت العار رحمهما الله وأغانى السيرة بصوت بت المنى وست نور

كنت قدمت اقتراح قبل فترة وبعيدو ثانى وهو تجميع للعادات والتقاليد عن الحتانة بما فيها اغانى البنات، اغانى الكرامة،طرق الزواج وتقاليده المتبعة ،الجلد بالسوط، السيرة للبحر وغيرها.
وما لقيت رد ياريت يا عبده تتبنى الفكرة دى.

عدد المساهمات : 7 تاريخ التسجيل : 28/04/2009

التحية و التقدير لإبنتنا فتحية عثمان . و لعل من ما يذكرني الموضوع الذي طرحتيه عندما نظرت لأول مرةصورة قرية الحتانة ، و هي قطعا مصورة من(أم بور و عندما رجعت بشريط الذكريات لسنين طويلة تذكرت الأيام صورة قرية الحتانة ،و ليالي الأعراس و الحفلات ، و كان دائما بيوت الأعراس حافلة بصينية العشاء المدنكل , أهم شيئ اللقيمات ، و أراف العرس تمتد أيام و ليلي ما بين الحنة و الجرتق و الزينة(سبق الجمال) و الدلوكة و أغاني البنات و السيرة للبحر ، و أذكر تماما ( عريسنا ورد البحر و قطع جرايد النخل ، و عريسنا هي إنت يا بهانا المشي بالتقل و العجاج ملانا .. و آمل أن تسعفني الذاكرة لكتابة موضوع مطول في هذا الجانب ... التحية لكم جميعا و آمل تواصل الأجيال ... محمد عبدالماجد

عدد المساهمات : 11 تاريخ التسجيل : 03/04/2009

و من أغاني التراث الخاصه بالمنطقه المجادعة بين اهل العريس و العروس عند وصول السيره
واذكر منها بعض الأبيات

شِن ليك شِن ليك العرس مو ليك
فرشو البروش لملي الكروش
فاطمة جات تزح دست القمح
االعريس حبابو الصبر شن جابو

و اخلي ليك التكملة يا عبدو من الوالده فاطمة [center]

و نحن نقول سراج ده الجابدو منو ؟ اللتاريه ما براه

لكن بصراحة يا أم محمد الموضوع ح يحلو طالما فيهو فريش بروش و ملى كروش ... طبعاً هذه المخاتاة (إذا صح التعبير) نوع من المكايدات اللذيذة يوم السيرة .. و يمكن من أمتع اللحظات في أيام العرس .. و كتير من ناس الخرطوم ما بعرفوها

لكن هذه المكايدات التى تأتى فى شكل هظار نشم فيها ريحة المعركة الأزلية بين العروس و أهلها من جانب و النسيبة و الحموات من جانب آخر .ـ

المعركة معروف ليها عدة مراحل ..ـ

المرحلة الأولى بتكون قبل الخطوبة

طبعا مرات أخوات العريس بكونن حقارااات ... ـ

يا الغسلتى و كويتى
و يا الوجعتى إيديك
أخونا ومافى ليكى

تقوم ترد عليهن:ـ
لا غسلنا لا كوينا
و لا وجعنا إيدينا
أخوكى جانا و أبينا

لكن رغم حقارة الأخوات .. تتم الخطوبة
و هنا تبدأ المرحلة الثانية من المعركة و يدخل فيها بنات الحلة الشمشارات الحاسدات .. و تتمسكن فيها العروس المرتقبة

اللول لالِك يالشقيه
العريس قالو أمو حيه

و العروس ما دايره الزول يطير من يدها .. تقوم تقول ليهن:ـ
تعيش أمو كان حيه
و تمشى السعوديه
و تجيب الشيله ليا

و بعد الشيله تجى يجن الشمشارات يقولن لى أم العروس الشيله ناقصة ... أم العريس نقصت الحاجات الجابوها .. و ما بعرف شنو ..ـ
أمو السمينة النقصت الشيله
يا الله تهد حيلها
و تموت فى ليلا

و مع إستمرار المعركة تستمر الأمور على خير ... و يجو أهل العريس لأهل العروس

يا نسيبتو شن بتدورى .. جبنا ليك عقيد اللولى
جبنا ليك الغالى علينا .. جبنا ليك رموش عينينا

و بعد العروس إتمسكنت لامن إتمكنت ... توريهم الوش التانى

أمو الشنافه .. نكير ده ما شافا
العقرب فى أكتافا .. و الدابى فى لحافها

و كمان

إنت موزايه و أنا موزايه ناكل لما نشبع ... و نزلق أمك
إنت سمكايه و أنا سمكاية ناكل لما نشبع ... و الشوك لى أمك

و تستمر المعركة ......ـ

إبداع ياأبو المجد منك والله من هادية ياربى

» الامنيات الجميلة الصادقة
» مكتبة عامرة بالصور الجميلة لجدودنا واعمامنا
» الفنون الجميلة ورسالة مفتوحة للاساتذه :عبدالمنعم عبدالماجد وايمن فضل البارى
» ابو عثمان لك الشكر , وعدتوا واوفيتوا,,,,,,,,,,,,,
» ترحيب بمجاهد محمد أحمد عثمان