وغرقت جمرة ورحلت المكابرابية

قالت آمنة بت عبد الله والدة نعمة محمد زين:
ياحليل بنات حنى المابيعابنى
ياحليل بنات حنىالأبعدن منى
ياحليل بنات الخير الأبعدن بلحيل
نفبسة أم البشير ورابحة أم اللمين
بجهن مارقة الليل
ياحليل أم البشير
رابحة دى السلطانة الموجعنى ديوانا
ياحليلا فى بكانا
ودوها الحتانة
ياحليل بنات حنى الأبعدن منى
يحليلا بت العار أم عرضاً مو بطال
فى بيتا ساترة الحال
ياحليلا بت العار

بتجيب الكلام ده من وين.
من امك خديجة ولا شنو؟؟؟؟؟؟؟؟؟

والله تصدقى لقيت كل آل البشير الكبار حافظنها أمى وبت المنى وعلوية وست نور وهلم جرا

حكت لى حبوبتى خديجة بت عثمان من أشعار صفيه بت عاشة بت الفكى مهدى زوجة سليمان ود حاج حامد تصور فيضان 1946 وماأحدثه من خراب بلغة ذلك الزمن قالت صفية :

بنونة حرجانة موجعاها التكانة هى وإخوانها

بت حليتى تقول ياويكتى أم سرور العرض والطول ماضوقت زول

ود الفادنى يصيح مانى مستريح ياعيشى النصيح فى الموجات بطيح

عثمان يسوق والكركير مريوق طمح البحر لافوق قلع الفاشوق

ديناب مدينة يالضلك ضل جنينة نارو طالقة فينا

نسيبتك يالجدية أحمتنى الوطية عاشة خالتاً لى

قالت أجرن لى مين بترسو لى سيدو فى الودى

المجموع تحوم قالت ماكلانى السموم مين بترسو اليوم سيدو فى الخرطوم




وقالت تحكى عن صداقتها مع حبوبتنا الجدية بت عثمان رحمهم الله جميعا وقد فرق بينهم النزوح بسبب الفيضان :

ردوا السلام للرفيقة قولولها عينيك مستشيقة ولى دريبك مالقيت طريقة

ردوا السلام للجدية قولولها قالت لك صفيه ياحليل صحبتنا القوية

ردوا السلام لى حبوبة قولولها ياحليل لماتنا دوبا

ردوا السلام لى أخواتنا ولى بت خادم الله فاطنة

قولولها ياحليل لماتنا

رحم الله صفيه ورحم الله حبوبتنا الجدية وجميع أمواتنا وحفظ الله حبوبتنا خديجة كما حفظت لنا هذا التراث