العديل والزين لحبوبة زمزم بت ودمدنى والدة جدنا البشير

العديل والزين الليلة العديلة وياعديلة الله
العديل والزين الليلة العديلةتقدمو وتبرا

فى اليوم البخيت عجنولك الحنة
وفى اليوم البخيت والدتو تتمنى
داروق الصفاح منو الخصيم جن
سيف الصاقعة أخوى المابدور سنة

أمك تقول عند الله ليك دايره
يكون عندك عيال وإيدك تكون طايلة
الليلة العريس ساير على النايرة
أبواتك تلوباً يدرجوا العايلة
فشاشين غباين للدمعتن سايلة

الليلة العريس من أموسار طربان
لاشرب المريسة لاجاجا فى الخيران
جبدوك جدودك رجال السبحة والإيمان
من بيت العلم لى مجلس الحيران

العريس سيرو والعقبى للأصحاب
شدولو وركب فوق قارحاً شباب
أب قلباَ شجيع من السلاح مابهاب
أكان جبدوك جدودك كان بدرسوا كتاب
وكان جيت متل أبوك لى قرشوا مو حساب

غنى وشكرى يامهيرة فى بطانة
أب راياً سديد أب فهماً مو لقانة
لى ضيف الهجوع يتكفوا ضيفانا
ضو الهجعه أبوك المابدور عانة

الليلة العريس عزل الشيوم جابو
نوى على الجى يرعى فى حقابو
أب جيباً ملان العندوبسخابو
ساير لى بت الرجال أب عرضاًمودابو

شدولووركب فوق مهرة مكلوفة
أب قلباً شجيع مابتدخلو الخوفة
أبوك يتكى السمينة ساحتو مضيوفة
مابدى العطية ويرجى معروفا

شدولو وركب فوق مهرة مقيودة
وقلبولو الدرع خايد مع الخودة
تطول إيدك على الفايدة يتم جودا
وبعد بيت الحلال الحجة والعودة

شدولو وركب فوق الزمن حيلو
والحمل التقيل تتولى لى شيلو
إن القاش طمح عم البلد خيرو
جيد ليك يانسيبتو ده الوفر كيلو

شدولو وركب فوق أم لجام عاصى
يادود الكوانى الفى البحر راسى
يسلم لى عشاى تلبى وقناع راسى
بإيدك ياعشاى للواقعة بتراسى

يارحل الحديد المابخشو هديد
ياود الرجال الكلمتم بتفيد
تبكر بالوليد والفايدة تملا الإيد
وللقصيدة بقية زمزم بت ود مدنى لإبنها البشير الأمين عبد السلام

الله عليك ياعبده

ناسف للانزال الخاطي

لك التحية أخي عبده أنت دائما تفاجئنا بالحاجات الجميلة والرائعة زيك ...... لك التحية