إقتراح

غايتو الناس الموظفين بكونوا متواجدين ايام الدوام العادى لكن اصحاب المطاعم بتواجدوا عادة بالليل لانو عندهم نت فى بيوتهم ودا ما متوفر لناس كتيرين

اصحاب المطاعم ديل منو يا نزار ما تقول الصادق( ابو منهل) عدييييل.

ولا خايف منو؟؟؟؟؟

والله يا نادية أصحاب المطاعم ديل كتر خيرهم .. أضافوا للمنتدى نكهة وتوم وشمار
وللا شنو يا صفصف

بما انك يا الدحيش تعتبر من اعيان الحتانة ( المقندلين ربنا يزيدك ( بس عشان ما نحسدك ) نتمني انك تحن علي الزينا ديل الاتقطعت جزمهم وحفت ارجلهم وافلست جيوبهم من التردد علي مقاهي الانترنت وتشتري لينا اجهزة كمبيوتر ونحن ما ناس طماعين يكفينا اجهزة لاب توب بس وحتي لو كانت من نوع (SONY - VAIO) وده كله عشان ما نكلف عليك وبالمرة ما تنسي ال ( D S L ) لانو زي ما انت عارف التلفون الثابت مقطوع ليه شهور اقصد ليه سنين ( عشان ما سددنا الفاتوره ) نعمل شنو ما المرتب ما حايق في الضروريات خليك من الكماليات , انشاء الله بعد داك حا نكون موجودين في النت في المواعيد الانت عاوزها .

اشكرك يا أخي عبدالعزيز على حسن الظن بي (وإنشاء الله أكون زي ما قلت) .. لكن دي مناورة منك .. خير وسيلة للدفاع هي الهجوم .. ياخي إنت مغترب بدل ما ترسل لينا (جهاز لابتوب) أو حبة ريالات نشتري بيها أجهزة كمبيوتر .. خاصة إنك مغترب في دولة بترولية .. ونحن المساكين قاعدين في البلد الشمسها حارة دي
مشكوووووووووووووووور أخي على المرور .. إعتبرتك موافق على الإقتراح

معليش نقول انت معذور لانك لس عايش في الزمن الغابر وغاشاك المظهار

اخي العزيز .. عبدالعزيز دراش
في زمن العولمة، لا يسع الإنسان إلا أن يعتبر الأرض كلها، من أقصاها إلى أدناها، وطناً له.. يعيش و يخلص العمل أينما حل ، كما لو كان في وطنه الأصلي الذي رحل عنه.
والاستمتاع بالحياة و طيباتها، لا ينبغي أن يكون رهناً على زمان ومكان بعينه ، بل على المغتربين أن يعيشوا في مواقعهم كما لو كانوا في مدنهم و بلدانهم التي هاجروا منها. أن كثيراً من المغتربين، لا سيما العرب، يعتبرون أنفسهم سواحاً في مواقع إقاماتهم الدائمة.

مفهوم الغربة اليوم تغير كثيراً يا أخي، حيث أن وسائل النقل و الفضائيات والجوال والانترنت جعلت ما هو بعيد قريب جداً إليك.

على المغتربين، تغيير مفهومهم للغربة، وأن يجعلوا العالم كله طناً لهم.

انا بقترح ان يكون يوم الجمعة .. صباحاً لانه معظم العائلات بتجتمع فى بيتها الكبيرة وندخل النت نرسل اخبارنا ونتبادلها مع عائلات التى لا تستطيع التعامل مع النت ..

والا يكون مساءاً من كل جمعة

سلام عليكم٠ ٠ والله ياالدحيش اقتراحك مقبول لكن نحن شغلنا بالليل يعني بنكون متواجدين في المساء فقط والنوم من الصباح يعني البجي ٤ صباحا بلقانا قاعدين لكن بالنهار مادايرين

انا غايتو ما بعرف ابرمج زمني نهائي ،، ما بعرف ادخل متين واطلع متين بس معظم الأوقات بكون متواجد الفترات الصباحية يعني دوام الحكومة ،، انا شايف انو الناس صعب جداً تتلمى في زمن واحد،، رايكم شنو نعملها ورديتين ناس الخرطوم براهم وناس هجليج براهم يعني ناس الولايات الجنوبية (سلفا وجون )

والله ده كلو جميل ويصب فى أهداف المنتدى ( التواصل ) وحسب متابعتى للأعضاء وبحكم أنى أكتر زول متواجد فى أكتر من وقت لاحظت
1/ الموظفين فى الخرطوم زى ( نادية ونزار وأيمن وحسن ) دايماً الصباح متوجدين عدا الجمعة والسبت
2/ ناس السوق زى ( الصادق وعبده وعماد ) وممكن نضيف ناجى وهيثم وناس هجليج ( مجدى ومعاوية ) باليل وكذلك ناس المملكة والأمارات وأمريكا
3/ مع ملاحظة إ نو ناس المملكة يستغلون عطلة الخميس والجمعة للتواجدليلة الخميس
4/إذن لو ضمينا إقتراح الصادق لإقتراح الدحبش مع وضع كلام أيمن فى الإعتبار ممكن يكون فى أكتر من وقت
أ/يومياً من الساعة 9 صباحاإلى الساعة 10 عدا يومى الجمعة والسبت
ب/يومياً من الساعة 10 مساء إلى الساعة 11 مساء عدا يومى الجمعة والسبت
ج/ يوم الخميس من كل أسبوع من الساعة 9 إلى الساعة 11 يحرص كل مستطيع على التواجد
د/ أوقات متفرقة عشوائية ممكن تصادف أكثر من عضو كل زول حسب فراغو
وشكراً