زكرنى موضوعك يا حسن بموضوع كان وصلنى عبر الايميل من احدى الصديقات: عنوانو تخيل كيف يكون الحال لو ما كنت سوداني.
الموضوع طويل شوية .سوف انزله بالتدريج:
لو ما كنت سودانى
كنت ح تلتزم بالمواعيد - كنت ح تدفع فاتورة المحامي او الطبيب قريبك - كنت قاضيت المهندس الخرب ليك بيتك - كنت عملت مشروعك بنفسك من غير ما تحاكى - كنت بدأت دوامك في الموعد المحدد - كنت حتنطق حرف ال (ق) و ال) غ) كما ينبغي وما كنت حا تقول للتسعة تزعة - كنت بطلت تسف ساعوط - كنت صرت متخصص وعالم في مجالك - كنت حتلبس شيك جدا عند خروجك أمام التلفزيون وأجهزة الاعلام - كنت تتحدث بطلاقة وإنسيابية بدون أ أ أ أ أ أ–
ولو ما كنت سودانى كنت عرفت ان فى الدقيقة 60 ثانية وفى الساعة 60 دقيقة و باليوم 24 ساعة وفي اليوم ممكن تعمل كذا وتنجز كذا وكنت خططت لحياتك ومستقبلك و كنت اخترت المساق التعليمي بنفسك و درست الجامعة بالكلية اللي تناسب مقدراتك ومواهبك ورغباتك المستقبلية مش عشان ود جيرانكم اختار الكلية دى بالذات يعنى اخنق فطس..
كنت ح تتصل بالتلفون قبل زيارة أحد في منزله بدري شويه, مش و أنت في خشم الباب ده طبعا لو اتصلت وما جيت داخل زي قدر الله ... بدون حتي ماتدق الباب وتدقو ليه؟؟مش في سلك تجرو وتدخل!!بدون مراعاة لحرمة البيت..
ولو ما كنت سوداني...كنت انتظرت دورك في الصف وخلصت معاملتك بنظام بدل الململة البتتعمل وكنت ح تنهر أولادك لما يبهدلوا ليهم بيت زول ويعيثوا فيهو فسادا وانت قاعد تضحك ومغرور بأاولادك ورافع لي ناس البيت الضغط والسكري....كنت حا تتوقع بحصل شنو لما ترقد طفلك الصغير بدون بامبرز في سرير في بيت ناس!! واولادك الاكبر شوية بعملو شنو في نباتات وازهار الناس التعبانين عليها وزارعنها وراوينها بي دم قلبهم ...
و كنت ح تتردد في أخذهم معاك المرة الجاية لنفس البيت, علشان يبهدلوه مرة تانية...كنت ح تتردد في إعطاء رقم تلفون أو عنوان شخص ما.. دون إذنه او حتي سؤاله اذا كان عندو رغبة يتواصل مع الناس ديل أو مفهمم انو ما عندوا تلفون من اصلو بدل تورطو وتحرجو كدة!!!.وكنت امتنعت عن السماح بجلوس طفلك الرضيع في المقعد الأمامي على حجر والدته ولمن يحصل حادث الحبيب ياكلها لا لذنب جناهو سوي انو اهلو سودانين!!...
كنت ح تترد في زيارة شخص ما.. أنصاص الليالي و صبحان تاني يوم مدارس و عمل وتساهر بالناس وتطلع روحهم تشرب العصير والشاي ويعملو ليك العشاء علي امل انك تمشي وتخليهم ينومو وانت برضو قاعد تبرأ فيهم وما تحس الإ قبل آذان الفجر بشوية وتقوم تنكشح بعد ما الديك قرب يعوعي!!!
للموضوع بقية