يا حليل الطرادة

والله وجدت هذه الصورة واعجبتني جداً من ناحية تصميم وألوان وعجبتني جداً كلمة الجمهورية السودانية وما حصل سمعتها قبل كده لاني بعرفها بإسم جمهورية السودان .

صحى بتعجب.
لكن انت لميت فى القروش دى وين يا ايمن.
انا اهوى جمع العملات وعندى زخيرة معتبرة منها .
وفرصة اعرف هل هناك هواة لجمع العملات وتبادلها من رواد المنتدى.؟؟؟؟؟؟؟؟

ياسلااااااااااااام والله صورة جميلة لعملة اجمل في زمن جميل
والله رجعتونى بالذكرى لايام لها ايقاع ...
طبعا انا بعرف الطرادة لكن اول مرة اعرف ان كان مكتوب عليها الجمهورية السودانية
اشكرك جدا اخى ايمن على البوست دا والله المفروض كل الاعضاء يمرو
ويضربو تعظيم سلام للجمهورية السودانية [i][b]

فعلا يا ايمن يا حليل الطرادة ؟؟؟؟؟ وصدقني يا ايمن انا اذكر تماما لمن كنا ساكين في الديم قبل رحولنا للصحافة كانت مصاريف البيت اليومية ( 25 قرش ) يعني طرادة لكل الاسرة ؟؟؟؟؟ ووالدي الله يرحمه كان بيترك الطرادة للوالدة الله يرحمها تحت مخدته قبل الذهاب للعمل ؟؟ وكان عندنا غنماية حلوب بالبيت ومصارفها من ضمن الطرادة ؟؟؟ ومن الطرائف في مرة من المرات هذه الغنماية الله يطراها بالخير اكلت الطرادة وامام والدتي والوالدة تشاهد في المنظر وما عارف تعمل حاجة .. علي العموم الغنماية فطرت بالطرادة وجوعت كافة الاسرة في ذلك اليوم لحين حضور الوالد من العمل ... ويا حليل زمن الطرادة واخوانها واخواتها من ( التعريقة+ القرش+ ابو قرشين (الفريني) والشلن + الريال) ده العملات الكانت متحركة في السوق ؟؟؟؟ ودمت في رعاية الله ..

يا حليل زمان وسنين زمان يا يمه لو تتذكري ..
لو ليك مراد يا حاجة ما يطلع صباح ..
والليلة عندك زي أمـس .
الاخ الكبير ايمون تحية طيبة .. نحن طبعا ما بنتذكر زمن الطرادة دا لاننا ما قدرك لكن بجد حليل زمان .. انا ما عارف ليه الماضي احلي من الحاضر والمستقبل ؟ حاجة تحير .. واغرب حاجة قريت لي قبل كده لوحة مكتوب عليها ( بكره أحلي ) وتذكرت شعار ( فلــنضحك مما نســـــمع ).. ولنغني سويا" يا زمـــن وقـــف شويــة) . ودمتم

كانت القروش ليها قيمه ويا حليل الريال والشلن والفريني (قرشين) والقرش وحتى التعريفه(نصف القرش)كان لها قيمه ونشترى بها ونحن صغار ما لذ وطاب من دكاكين الحله