هل مر عليك يوم وأنت شايف واحد لابس بنطلون جينز آخر موضة وتمنيت انو يكون عندك واحد زيه لكن ظروفك المادية ما كانت بتسمح ليه تشتريه ؟.
هل مر عليك يوم جيت ماشي جنب مطعم وشميت ريحة الدجاج المشوي أو السمك المقلي وكان نفسك تدخل المطعم وتأكل , لكن ظروفك المادية ما ساعدتك علي تحيق أمنيتك؟.
هل مر عليك يوم وأنت شايف واحد شاب سائق عربية آخر موديل , وتمنيت انو يكون ليك عربيتك الخاصة حتي لو كانت موديل 80 , لكن ظروفك ما ساعدتك ؟.
هل مريت بي منزل جميل وتمنيت في نفسك انو يكون ليك منزل خاص حتي لو كان حوش واوضة واحدة بس , لكن ظروفك المادية ما ساعدتك ؟.
أكيد كلنا مرت علينا المواقف دي , لكن الحمد لله كثير مننا تحققت معظم أمانيهم , وآخرين تحققت بعض أحلامهم , والبعض الآخر واقف في الصف عسي ولعل في يوم تتحقق ليه ولو أمنية واحدة من الأماني الكثيرة الكان بمني بيها نفسه في شبابه . لكن يا تري مين فينا بحس بي معاناة الناس الأقل مننا , وهم الآن بيمروا بنفس المواقف التي مرت علينا قبل كده , والواحد فيهم ما قادر يحقق ابسط أمنياته حتي ولو كانت وجبة دجاج مشوي من مطعم البوداي .
-------------------------------
بقولوا انه العايش في مستوي من الرفاهية والنعيم ما بشعر بي معاناة الناس الأقل منه وبفتكر انو كل الناس عايشين في نعيم ذي ما هم عايش . هل الكلام ده صحي ؟.
أنا أقول : نعم صحيح , وأسالوا مجرب .
•الرئيس العايش في القصر الجمهوري , ما بيحس بي معاناة المواطن العادي الما لاقي حتي عشرة ألف عشان يشتري بيها علاج لي ولده المريض .
• المدير العام الموفرين ليه سكن وعربية ما بشعر بي معاناة الموظف العادي الواقف ساعة في الشارع عشان يلقي عربية توصله للمكتب في المواعيد المطلوبة , ولو تأخر خمسة دقائق يقابلوه بي استيضاح .
•الساكن في بيت ملك , أو ساكن في بيت ورثة , أو أهله قاسمين ليه البيت وسكان في النص التاني , أو ساكن مع نسابته , ما بيشعر بي معاناة الساكن في بيت إيجار وتلقاه من نص الشهر شايل هم الإيجار , والمشكلة الأكبر لو جاه صاحب البيت وقال ليه يا إما تزيد الإيجار أو اطلع ممن البيت .
•العنده سيارة خاصة , ما بشعر بي معاناة الناس البيقيفوا ساعات منتظرين المواصلات , أو معاناة الما عنده حق التاكسي أو الأمجاد وجاه خبر وفاة في آخر الليل .
•البيأكل كل يوم بعد يوم دجاج مشوي أو بروست أو سمك , ولما يزهج ويحب يغير يجيب سندوتشات بيرقر جامبو أو بوفتيك , ما بشعر بي معاناة البيأكل كل يوم فول وطعمية ولما يحب يغير يأكل زبادي وطحنية .
•البيشتري كل أسبوع أتنين أو ثلاثة كيلو لحمة , ما بشعر بي معاناة الما بيأكل لحمة إلا مرة أو مرتين في الشهر أو ما يأكلها إلا في المناسبات .
•البيقضي إجازته السنوية في مصر أو بيسافر كل سنة في رمضان للعمرة والاستجمام , ما بيشعر بي معاناة المغتربين البينتظروا سنة أو سنتين عشان يجوا الإجازة , وأول ما تبدأ الإجازة يكون الواحد فيهم شايل هم الرجعة .
معليش لو رأس السوط وصل لي واحد أو مجموعة منكم , لكن دي الحقيقة , والحقيقة لا مفر منها , وزي ما قلت ليكم اسألوا مجرب , وأنا واحد من الناس انطبقت علي بعض الصفات المذكورة في بداية الشباب , وكنت أعيش في مستوي لا بأس به من النعيم , وكنت بفتكر انه كل الناس عايشين زي ما أنا عايش , و بفتكر انه كل واحد لو عاوز يأكل الحاجة الفي نفسه ما عليه إلا يدخل المطعم ويطلب الحاجة العاوزها , ونسيت انه في ناس مكتفين بي وجبة واحدة أو وجبتين في اليوم , ولو أكلوا فواكه ما بيأكلوها إلا مرة في الأسبوع , اما الدجاج والسمك يكفيهم منه الريحة البشموها لما يجو ماشين قدام المطاعم الراقية .
ولتأكيد ما سبق ذكره أنا حا احي قصة حقيقية ذكرها لي خالي حسن الإمام – عليه رحمة الله – قبل فترة طويلة , وكان بيشرح لي في نفس الموضوع وهو انه دائما الأغنياء ما بيشعروا بي حرمان الفقراء .
قال لي في الأربعينات لما كانت بريطانيا خاضت حروب كثيرة وفي جبهات متعددة , حصلت في بريطانيا مجاعة شديدة , و الملكة (اليزا بث) ما جايبة أي خبر للكلام ده , والمستشارين بتاعنها داسين عليها الخبر عشان ما يحصل شوشرة في القصر , تماما زي مستشارين رئيس الجمهورية حققنا , مصورين ليه انه الشعب كله مبسوط وما في أي واحد جيعان , طبعا الشعب البريطاني لما ضاقت عليه الحالة وانعدم الخبز وشعر بالجوع كله طلع الشارع وعملوا مظاهرات وتجمعوا حول القصر الملكي . الملكة لما سمعت صوت المظاهرات طلعت في البلكونة ومعاها مجموعة من المستشارين حقنها , ولما شافت ألاف الناس واقفين تحت القصر وبيهتفوا بي صوت عالي سألت المستشارين وقال ليهم : ديل مالهم جايطين كده ؟.
واحد من المستشارين ما قدر يسكت أكثر من كده , وقال ليها : يا جلالة الملكة الشعب جيعان وما لاقي خبز يأكله .
قامت ردت عليه بكل ثقة وعفوية وقال ليه : طيب ما يأكلوا ( بسبوسة ) .
وفعلا العايش في نعيم الغني ما بشعر بي جحيم الفقر .
انا كتبت الموضوع دا من باب التذكرة لنفسي و للجميع , { من كان له فضل زاد فاليعد به علي من لا زاد له , ومن كان له فضل ظهر فاليعد به علي من لا ظهر له .) وتذكر أن الأيام دول وان دوام الحال من المحال .
والعنده قروش محرقات روحه وما عارف يوديها وين , يوردها لي في حسابي في بنك العمال الوطني فرع ( المعذبين ) اقصد فرع المغتربين . وإنشاء الله حا نردها ليه ومعاها بوسه كمان .