كلام حيشان ..و ونسة نسوان

بنقول :
الحجر وقع فى الموية جمبلغ.
فنيت ليك الحجر جنس فنة
وفنيتو فننننننن
فلان ادى فلان كف طااااخ
وقع فى الواطة تراااااح.


فى كلمات كتيرة الواحد بسمعها وبرددها بكترة لكن ماعارف مصدرها:
نغمة الزغاريد: ايوى يوى يوووووووى.
وليه بتتكرر.

والجمل والكلمات الآتيه:

وووب على وووب على مات متين( فى البكيات.)

الكلام ده برى ماسمعتا بيه يطرشنى طرش اماتى الفى القبور: (عند اماتنا).

وبنقول برضو:لو اتكلمت معاها قامت فوقى وشبت لى فى حلقى:


رمضان قرب:
وجينا نشرمط الشرموط ونحمر البصل

وبيتها معولق و ما مضاير

واكان شفتا
هناية ديك مجيهة جنس جيهة.

وعايزة اضافة ياشباب.
اه قوموا ارح......................

قاعدين كده فجاة النار بقت
2/ العجب شات الكورة فى القوون وقدت الشبكة وضربت دل فى الدعاية
3/ سفارى كجا امبيلى جنس كجة
4/ افتح الباب من تكنك غالبك .

ولك الشكر يانادية

مشكورة يا استاذة علي فتح موضوع جديد , مع انه كلام حروم لكن برضو حا نشارك فيه ..

سجم خشمك ..

سجم امك الراجياك ...

يتعال يا العشاء اب لبن ..

اجي يا بت امي ...

هي يهون الله ...

مرقت منها بصمة خشمي

سابلتني بعد حول ماله صغيرة ولا جاهلة

غسلت عيشي داك يا الغسيل المو خمجان

يطرشني ما سمعنا بيه

خلت شعري منقوض وراحت مشططت غيري التصبر

ما بستغني خليت قفاي اعوج

تعرفوا يا شباب والله ضحكت لمن دموعى جرن.
طلعتوا كلكم بتعرفوا كلام الحيشان وونسة النسوان.

طيب سؤال؟:
ليه الكلمات دى بقولوها النسوان بس؟؟؟؟
وما بقولوها الرجال؟؟؟

انا حقيقة ما عارفة الاجابة؟

كُر على ؟
سجم امو المتل قدومو.
اتشكلن ختنو قرض.
لحق امات طه.
وقع اندرش.
يخربنى. ماعندى. (عند الشحدة.)

عدمنا الحبة....

من الكلام الغريب واللذيد فى نفس الوقت و لسة انا مواصلة فى نفس الموضوع وبقيت كل ما اسمع كلام غريب بحفظو تلقانا لسة بنقول لمن وصلت جنب بابهم:

دقيت الباب كو كو كو ومرات بندخل الكلمة دى قبال الكلام كوكوت ليك الباب كو كو كو......

وعند جر الشوال او اى حاجة تقيلة بنقول.
جريتو كرررررررررر..

وفى حالة تدفق الحاجات السائلة بنقول انكشح او اندفق منى شووووووو...
ولمن ينزلق زول ويقع بنقول... انزلق زييييييط
او زوووووط...
وفى الكلام السودانى الكتير والكتير من الكلمات والجمل الغريبة ذات المعنى غير معروفة الجذور:
وفى ذلك يقال:

ان العاميه السودانيه لديها جزور عربيه ولكن حدث لها نوع من التغيير مثل عبارة (كر علي ) وهي تاتي من الكره
(وبري )عند النسوان)من البراءة .

حتى كلمة ( زول كلمه عربيه اصيله من الزوال اي التحرك وهي تعني الشخص ولكن السودانين الذين استخدموها من دون العرب عشان كده اشتهروا بيها ومن النادر تأنيث كلمة زول يعنى نقول ( زولة) الكلمة دى ما بنلقاها متداولة الاعند السودانين.

بنقول الكلام برضو بعد مرات معكوس
ومع انو غير منطقي نحنا برضو بنقولوا مثلا: ( يا بتاع الحمار ) او بتاع الدكان ) (وبتاع الغسال ) وهي في المعني الضمني للدلالة علي ان الرجل يملك حمارا او دكان او غسال ولكن في السياق تظهر..... وكأن الحمار يملك الرجل.

بنقول برضو كلمات بتجمع الكلمة وعكسها فى وقت واحد مثلا (قمت قعدت ليك) فمن المستحيل ان يرافق فعل القيام لفعل القعود في ان واحد وبرضو:

( بتكلم ساكت ) الواقع لا يمكن ان نصف الزول يتكلم وهو ساكت .

وحتى كلمة ليك بتخش فى نص الكلام بدون لازم او معنى....


وبالمناسبة كلمة (براي ) البتعني وحدي هي مجهولة المصدر ولا توجد الا في كلام العامية السودانيه.

لو زول اداك تشرب الموية وبزعل او عدم رضا يقول ليك( اها هاك اتجوغر) وبتقابلها بنفس الصورة فى الاكل كلمة( اندعس).

وبصف الموية الباردة بالساقطة.

وعند القول لك ان تترك هذا الشىء ( ادمسها)
او
اقعد اندمس هنا دا.......

تر لاجاى. قنب صنقر.

____________

عند الشباب تسمع:
خمشو ليك.....
وقبقبو ليك.

رصعو ليك جنس كف.



ولسه نحنا جوووووه الحوش...

أشيد بالكاتبة المميزة الأخت – نادية حسن ولها التحية ، الحقيقة مرات لانجد الوقت الكافى للدخول أوالرد على مواضيع
كثيرة فى المنتدى لكن كلام حيشان موضوع يستحق الوقفة والله ضحكت كتير جدا حتى خشيت أن يدخل على زول (
ويقولى يازول بتضحك براك مالك فكت منك ؟؟؟ لأنو اللغة دى إكتشاف لانحس به وهى لغة متداولة فى بيوتنا يوميا ولانعرف
أصلها وهى نسخة مخفية من العامية واللهجة حتى كلمت فكت منو ؟؟ تقال لى الذى خف عقله وفقد ذاكرته وكما يقال فكت منو
صامولا ؟؟ والنساء أكثر إستعمال للغتهم الخاصة فى البيوت مثل ياولد مابتشوف .؟ أعمى اريتك بعمى كباسة من هوكباسة
مامعروف وياولد تعال يرد الولد أنا ؟ آآى إنت النينى اليشقك ما هوالنينى؟ لانعلم ، إتصل صديق عزيز يسألنى عن معنى
(شنينة أم قرينات ) وهى تقال للولد (تعال ياولد يرد الولد قلتى شنو ؟ يجيه الرد شنينة أم قرينات وحينما سألنا لم نجد إجابة
من قريباتنا رغم إستعمالهن لها منهم من قال الحلة عشان بتشنشن منهم من قال الطيرة مازال صاحبى الى الآن يسأل، فى
إعتقادى هى لغة معتصرة من الضيق الذى تحسه النساء من تربية الأبناء ، ويستمر كلام الحيشان ياأمى أنا داير سكر ؟
يجيه الرد اريتك بالسكر وقلة الفكر أو سكرة ننا مامعنى ننا ؟ لاتعرف والليلة شيل شيلتك راجياك دقة ، يا أولاد الضرب
الولد منو ؟ يضربكم الضريب اليقصكم ويفصكم والولاد ديل سولى واكواكا فى رأسى تقصد الإزعاج والمجال طويل
وشيق لو إنتبه الواحد، وقد كنت دايما أسال ناس البيت عن معنى العبارات هذه التى يقولوها فيأتى الرد بالضحك والفكاهة
فى لغة أخرى نستعملها فى البيوت مجهولة الهوية فننادى الغنم (حى حى تعالن ؟؟؟ حتى عبدالعزيز أخوى كان فى زيارة
لبلغاريا منذ فترة فزار إحدى المزارع وكان بها غنم ( فنادى عبد العزيز الغنم حى حى تعالى ؟ والغريب إستجابت غنم بلغاريا
لتلك اللغة وجات جارية كذلك نقول للحمار حاو حاو ليتوقف وفعلا نجده عمل stop ، غايتو لغة البيوت حاجة تضحك كتير
تحية للذين كتبوا ونقول لنادية كلام الحيشان قاموس مضحك ، لكم التحية

شكرا يا عبد المنعم.

مرة ركبت المواصلات فى طريق رجوعى الى منزلى.
ركبت معاى مرة وولد صغير وراجل يمكن يكون زوجها.
الناس ديل نازلين السجانة.وشكلهم ما بعرفوا حاجة كلو كلو عن الخرطوم واسماء المناطق.

كل ما الحافلة تتحرك مسافة وتقيف المرة تقول للكمسارى ما تسقطنا.كررت الكلمة دى يمكن خمسة مرات وانا كلو كلو ما فهمت المرة بتقصد شنو لحدى ما فتنا منطقة السجانة قالت للكمسارى نحنا دلنا فى السجانة.

قال ليها فتناها ردت عليهو انا من قبيل بقولك ما تسقطنا هسع سقطنا؟ بعيدين ولا قريبين منها....
فى اللحظة دى انا فهمت المرة بتقصد شنو.

واول مرة اسمع كلمة كرد كانت فى البلد وبرضو ما عرفت معناها الا بالسؤال عنها.فلان كرد فلان


الشفع لمن يلعبو بنقول ليهم ماتلتخو الحيطة.. وما تتشعبطوا فيها.

اتنين يتشاكلوا فى حاجة واحدة كل واحد يقول حقتو بنقول اتسلبط

المرة دى شوبارة وخبارة:

لمن تقول للزول كلام صعب وتقيل ويخلع بقيف متسمر يعاين ليك:


يمرقن النسوان لمناسبة ما ويقولن للبنات الصغار اوعكن تبرننا ..يبرى يتبع او يلحق به.

وعند الشباب: والله القاك ازرك زرة.
زرة يعنى شنو؟؟؟؟

كل سنة وانت طيبة يا نادية والجميع في أطيب حال،،
فعلا (كلام الحيشان) فيه كلمات عجيبة .. وأحيانا كتابة ما بنكتب لأنه بيكون ما عنده حروف أبجدية محددة
مثلا (نعم و لا) أحيانا الزول ما بيتعب نفسه ويقولها قول ، وانما بس مجرد صوت من الفم لا يمكن كتابته
فلا هو كلمة ولا هو اشارة من الاشارات ..
وأحب أعلق علي تعبيرات زي دقيت الباب كوكو/ جر الشوال كررر/ اندفقت الموية شووو....الخ فهي
صوت الفعل نفسه لحظة حدوثه .. وعلي ما أظن انو الزول المتكلم بيلجأ ليهو أثناء الكلام عشان يوصل االقصة
زي ما حصلت ،، يعني موسيقي تصويرية مصاحبة للقصة .....
وشكرا ليك علي مواضيعك الجميلة وظريفة في نفس الوقت .........

والله حكايات ظريفة رغم انوا العنوان خاص بحواء المنتدي .. ولكن لاباس النساء شقايق الرجال .. وعندي اضافة للموضوع وبطلب من اصحاب التخصص التوضيح والاضافة هي : عندما يكون نساءنا وبالذات الكبار زعلانين من شخص حتي ولو كان من اولادهم بقوموا بتحريف اسمه مثل ( مقشر لمحمد وقاشرة لفائزة وغيره من هذه الاشكال :: فمن اين جاء هذا التحريف وما هو اصله ... ودمتم غير محرفين الاسماء ....

بسم الله الرحمن الرحيم

السلام عليكم ورحمة الله وبركاته


الابمن عبده واللة جزاكك 8اللة الف خير هذا عمل عظيم ورائع يا ابو عروة
حففظة اللة ورعاة

الابن عبدة عندى موضوع
مهم ألآ وهو الصندوق الخخيرى لاسسر الحتانة ارنجو ان تتبننى الفكرة وشكرآ
ونحن معك بإذن الله
الشيخ الطيب

بسم الله الرحمن الرحيم
معذره ده كلام رجال دخل خطأ
وشكرآ
الشيخ اللطيب

السلام عليكم يا ناديه موضوع لذيذ وظريف لكن الكلمات دى متداوله لدرجة متوارثه عندى ولدى مولود فى أمريكا وما شاف السودان يوم كبيت لي مويه حاره فى الحوض عملت صوت قال لي ماما ده شنو العمل شووووو!!! ولما يتناقر مع أخوهوا يقول امشى يا عُره ومرات يقول ليهوا فار الجُغب شئ عجيب ياناديه لكن جميل

تم اعادة الموضوع من اجل المتعة والترفيه وتحريك المنتدى شوية .... وكذلك نتذكر موضوع الصندوق الخيري حسب متابعة عمنا العزيز الشيخ الطيب لهذا الموضوع ... لكم التحايا جميعا ..