هؤلاء هم

..اذكر جنة الله فى الارض الحتانة من اركانا لى اركانا
تواصل اجتماعى ومتانة
رجال تلوب وضعوا ساسا وميزانا
جدنا عمر وددراش عصاتو المخلوفة
بالحكمة والطرفة معروفة
يخت الكية فوق الكية مخلوفة
ياحليلهم العين من بعدهم قل شوفا
عبد الرحيم وددراش ساسو غالب فى الحواطة
ايات الله كم رتبها بالعلم ما ساطا
طيب المعشر حاشاه العباطة
بابكر ود حاج الحسين فى ذكر الله متين
عامر مجلسه بالتحصين
ادب واخلاق كلهم زين فى زين
كمان اذكر عمر اخوه
نزاهة وظرافة للناس الشافوه
حليم وودود للناس الوالفوه
اذكر جدنا مصطفى ودحامد
الشيخ النشط ما جامد
ركازه واساس فى البلد صامد
طائع ربه شاكر وحامد
اذكر ابونا الفنقلن نظافة وظرافة
مشبع بالفهم والرقى والحصافة
البينفقا بيمينوا شمالو حاشا ما شافا
جدنا محمد سعد اساس
خليفة الشريف بالعلم مليان الراس
للبدو والحضر باقى نبراس
حكيم وحليم شديد الباس
كمان اذكر عمر ودنمر
مكافح فى ارض الله يمين وشمال يفر
قليل الحديث سارح فى الله بالفكر
ما جالسوا مخلوق صفاه عكر
اذكر ود النقر عبد السلام
الراجل المناضل الهمام
حافظ نفسه من سوء الكلام
بالادب ملجم لجام
كمان ماننسى حسن ود الامين
للديار الحارث الامين
كلنا من تحتوا طلعنا مودبين
ركازة للبعاد والوافدين
كمان شيخنا مكى ود الشيخ على
ابو المروة اب فزعا جلى
من ما شبينا معاه ما صر ويشيه
انت معاه يمين مشتهى
عبد الرحيم وجدى عثمان من قاموا زى التيمان
راتب المهدى حافظنه حرز وامان
حنكة وشدة محفوفة بالايمان
كمان نعم الرجل فضل المولى
كامل حافظ كتاب المولى
حرم التراب من جسده بالحفظ اولى
كمان جدنا محجوب من الرزاله والدنايا محجوب
قوى ساعة الجد وفى الهزل حبوب
فارس ساعة الحوبة ماهو العبوب
كمان اذكر شيخنا الباقر
متمعن فى السماء ناظر
يتامل مخلوقات الكريم القادر زاهد فى الدنيا غائب وهو حاضر
كمان عثمان ود حامد
ابو قلبا على المصائب جامد
كم لنيران الفتن خامد
ماهو الهراج دائما صامت
كمان خادم الله بنت ابو الجود
الكرم والفراسة دوام فى بيتها موجود
تسلم عليك بمحنة فى الخدود
بالجد صارمة والفوضى واضعة ليها حدود
كمان حبوبتنا جاره ند المحنة
ان دخلت بيتها كانك فى جنة
باقى عمرك القعاد معاها تتمناه
نحن والصبقونا بالادب ثقلت معدنا
كمان حبوبتنا مريم شاشوق
دائما متحشمة بى توبها ذى الطوق
خافضة صوتها ما سمعناها قالت عوق
حافظة رجلها الا لى لله المروق
كمان حبوبتنا عائشة بنت نفيسة
رقة وحنان وذوق حديثة
روحها فى التقوى والايمان حبيسة
خبيرة فى علم النسب واثقة من تدريسا .
ا اذكر حبوبتنا بنت العار
فى قولة الحق نفسها حار
تحسن التربية مابتدور الهظار
كلنا بادبها طلعنا اعزاء نفس احرار
ا
نعم الرجل عطا المنان البشير
فى الكرم ماخد درجة مشيييييييييير
مع الصغير صغير والكبير كبير
هاش وباش ماهو الكشيييييير
صلوات على سيدى المصطفى +++ بعدد الكواكب وذرات الرمل والحصى
بعدد عام الله الذى لايحصى +++ بها يكرم المسلمين واموات الزين
الاحصاه والما احصاه
جنة الفردوس تبقى لينا ملجا ++++ يارب من السعير ننجا

ذو الفقار الامين محمد احمد 13/4/2009

باحليلم أبواتى أنا الزينين بالسيف السنين والمدفع الرصين أتاريك يازمن سبابة للأوجاع اللهم أغفر لهم وأرحمهم وأجعلنا على آثارهم ممن يحفظ للحتانة مكانتها وشرفها شكراً ذو الفقار وحقيقة السماك ( الزين ) ماقصر

ديل أهلي .. واللــــــــــه ديل أهلي

البقيف في الدار في نص الدار

وأقول لي الدنيا. كل الدنيا ديل أهلي

عرب ممزوجة بي دم الزنوج الحارّة

ديل أهلي .. ديل قبيلتي لمّن أدور أفصل للبدور فصلي

ديل فصلي

أقول بعضي

ألاقيهم تسرّبوا في مسارب الروح

بقوا كولي

ألاقي قلبي والإحساس

وسافر في بحار شوقم زمــــان عقلي

أنا محل قبّلت ألقاهم معاي ، معاي زي ضليّ

أنا لو ما جيت من زي ديل كان وا أسافاي ، وا مأساتي وا ذلي

شكرا لأخونا الشاعر ذوالفقار الأمين ومزيدا من الإبداع

طبعا انا شخصيا حضرت معظم الناس بتاعين القصيدة دى وكل من تحدث عنه الزين اوفاه حقه.

نترحم علي جميع امواتنا ونسال الله ان يتقبلهم قبولا حسنا
حقيقة قصيدة جميلة ونشكر الاخ الزين علي هذا السرد الوافي لكل رجالات الحتانة ونتمني ان نحذ حذوهم في كل مااتصفوابه من صفات كريمة ومذيدامن القصايد ياالزين

لهم الرحمة جميعا مشكور الاخ الزين ودايرين واحدة لى ناس المنتدى .. نحن منتظرين عليك الله ما تتاخر علينا .

كلام جميل ورصين وقمة الابداع في الوصف لك التحية اخ ذو الفقار بس ياريت ماكنت تنسي حبوبتك أم سهمين بت حمرو وحبوبتك تقيتي بت ابراهيم والحبوبة الحننة رحمة الله عليهم جميعا

اعلام لايمكن تخطيهم ابدا ؟؟؟؟؟؟؟؟ ومشكوووووووووووووووووووور

مشكور الاخ ذو الفقار وبقية الاخوة
هؤلاء الناس الذين زكرهم ذو الفقار الى وقت قريب كانوا موجودين وكل واحد منهم كانت له ميزة او شى يميزه عن البقية ولكنهم يشتركوا كلهم فى السماحة وطيبة الاخلاق . اللهم ارحمهم واغفر لهم واجعل الجنة مثواهم يارب العالمين وانا شخصيا عاوز راى خالى شيخ الطيب فى هذه القصيدة ... ودمتم يا احبة